Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Lamun maraq nike napi saq bau ite raosang malik? Napi ite tetep doang gawẽq dose, adẽq rahmat Allah sayan beromboq?

² Pasti ndẽqne maraq nike; dose ndẽq bekuase malik lẽq ite, jari segerah ite bau terus-terusan idup dalem dose?

³ Semeton senamian, napi side pade ndẽq nenaoq bahwe sewaktu ite tebaptis lẽq dalem Almasih, artine ite tebaptis dalem ninggal-Ne.

⁴ Siq baptisan ite tekubur bareng kance Almasih dait milu ninggal bareng Ie, adẽqne pade maraq Almasih teidupang lẽman ninggal-Ne siq kemuliean Bapa saq mulie, maraq nike ẽndah ite gen idup dalem idup saq baru.

⁵ Lamun ite sampun jari sopoq kance Almasih dalem ninggal-Ne, ite ẽndah gen jari sopoq kance Ie dalem idup-Ne saq sampun teidupang malik.

⁶ Selapuqte sampun nenaoq, bahwe tabiat ite saq laẽq sampun tematẽqang bareng Almasih lẽq kayuq salib adẽq awakte saq bedose nike telang kuasene, adẽq ite ndẽqne malik tekuasein siq dose.

⁷ Sẽngaq lamun sopoq dengan ninggal, dengan nike tebẽbasang lẽman kuase dose.

⁸ Laguq lamun ite sampun ninggal kance Almasih, ite percaye bahwe ite ẽndah gen idup bareng kance Ie.

⁹ Sẽngaq ite nenaoq bahwe Almasih sampun idup malik lẽman ninggal, dait Ie nẽnten gen ninggal malik; kematẽan nẽnten bekuase malik lẽq diriq-Ne.

¹⁰ Ninggal saq Ie alamin, nike ninggal tipaq dose, hal nike telaksane cume sekali doang jari selaẽq-laẽqne. Dait kehidupan-Ne nike idup bagi Allah.

¹¹ Maraq nike ẽndah side pade harus anggep bahwe diriq side pade sampun ninggal tipaq dose, laguq idup bagi Allah dalem Deside Isa Almasih.

¹² Ndaq malik alurang dose nguasein awakde saq iniq binase, adẽq side pade ndaq turut kemẽlẽqne saq jahat.

¹³ Ndaq ẽndah side pade nyerahang bagian-bagian awakde tipaq kuase dose jari tekadu lẽq maksut-maksut jahat. Laguq serahang diriqde tipaq Allah sebagẽ dengan saq sampun tealihang lẽman kematẽan tipaq idup. Dait serahang bagian-bagian awakde tipaq Allah adẽqne tekadu jari maksut-maksut saq kenaq lẽq arepan Allah.

¹⁴ Dose ndẽqne kanggo nguasein side pade, sẽngaq side pade ndẽq malik idup lẽq bawaq Hukum Taurat, laguq lẽq bawaq rahmat Allah.

¹⁵ Mangkin napi kesimpulante? Napi ite gen gawẽq dose lantaran ite ndẽq lẽq bawaq Hukum Taurat, laguq lẽq bawaq rahmat Allah? Pasti ndẽqne maraq nike!

¹⁶ Napi side pade nenaoq bahwe lamun side pade nyerahang diriq tipaq sopoq dengan jari taat lẽq ie, make artine side pade jari pelayan dengan nike --lẽq dalem dose saq jauq side pade ojok kematẽan, atao dalem ketaatan saq jariang side pade kenaq lẽq arepan Allah sehingge hubungan side pade kance Allah jari solah malik.

¹⁷ Laguq syukur tipaq Allah, sẽngaq laẽq side pade jari panjak dose, laguq mangkin siq sepenoq angen side pade taat lẽq pengajahan saq sampun teajahang tipaq side pade.

¹⁸ Side pade sampun tebẽbasang lẽman dose, dait sampun jari hambe saq tejariang kenaq lẽq arepan Allah.

¹⁹ Lantaran penenaoq side pade kurang gati, tiang kadu conto-conto mengenai hambe, adẽq side pade bau ngerti. Laẽq side pade sampun nyerahang bagian-bagian awakde sebagẽ panjak hal-hal saq kotor dait jahat. Hal nike jauq side pade tipaq maksut-maksut saq jahat. Maraq nike ẽndah mangkin side pade harus nyerahang awak side pade sebagẽ hambe saq tejariang kenaq lẽq arepan Allah. Hal nike jauq side pade tipaq penyucian.

²⁰ Sewaktu side pade jari hambe dose, side pade ndẽq lẽq bawaq kuase saq jariang side pade kenaq lẽq arepan Allah.

²¹ Napi saq jari keuntungan side pade lẽq waktu nike? Mangkin selapuqne jari hal saq merilaq, sẽngaq perbuatan-perbuatan side pade nike cume jauq kematẽan.

²² Laguq mangkin side pade sampun tebẽbasang lẽman dose, dait side pade jari pelayan Allah, keuntungan saq side pade mauq mangkin, penyucian saq ahirne jauq side pade tipaq idup sejati dait kekel.

²³ Sẽngaq upaq dose nike kematẽan; laguq paice Allah nike idup sejati dait kekel dalem Junjungante Saq Mulie Deside Isa Almasih.

Roma

Video Roma 6

Ikuti Kami:

KONTAK | PARTISIPASI | DONASI