Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Ngaceku ineh anunké luk miak belén tau? Do'ké tau tudo bang sala', pad katu Allah amé' mula'?
2 Na tu-tu! Idi tau ini pangeh naté nepuit ratnan sala', kudeng apehké tau miak mulun bang neneh?
3 Naké muyuh kali' idi tuda'-tuda' tau luk pangeh rireb bang Keristus Yésus ineh, pangeh rireb bang atéNeh?
4 Dengan rereb ineh tau tinanem dengan Keristus bang atéNeh, idi mepad kudeng Keristus pangeh netumui rat arang lun naté ngaceku rayeh TamanNeh, kudeng ineh teh tau ini pana' miak mulun bang ulun luk mebaruh.
5 Ngaceku kudeng tau pangeh mangun ku sebuleng denganNeh, dengan ngalap babpat bang atéNeh, kudeng ineh teh tau mangun ku sebuleng denganNeh bang tuiNeh.
6 Tau kali' ini, ieh ineh burur tau luk mon pangeh sinalib dengan Keristus pad burur luk nganau' sala' ineh miak maté, pelé tau na mangun ku demulun sala' teh.
7 Ngaceku lemulun luk pangeh naté ineh pangeh pinuit ratnan sala'.
8 Kudeng tau pangeh naté dengan Keristus, tau merapet ngalap ulun denganNeh.
9 Ngaceku tau kali', idi Keristus luk pangeh tinui rat arang lun naté ineh na miak maté peh; idi até ineh pana' na miak ngimet Neneh.
10 Ngaceku ratnan até Keristus, idi Ieh naté sekua' mo' kuan sala', iamo' ratnan ulunNeh ineh, Ieh mulun kuan Allah peh.
11 Kudeng ineh teh do' muyuh ngerawé burur muyuh maté mepuit ratnan sala', iamo' mulun kuan Allah dengan Keristus Yésus.
12 Ngaceku ineh, aleg nima' sala' mangun ku raca' bang burur muyuh luk miak maté, pad muyuh maya' pianneh.
13 Aleg muyuh maré sebabpat burur muyuh ineh kuan sala', pad uen makai ku kekamen luk dat. Iamo' maré burur muyuh kuan Allah, mepad kudeng lemulun luk pinuit ratnan até amé' nan ulun teh, idi do' maré amung babpat burur muyuh kuan Allah, pad uen makai ku kekamen luk matu.
14 Aleg nima' sala' mangun ku raca' bang ulun muyuh, ngaceku muyuh baken pa liang Ukum iamo' pa liang katu Allah.
15 Kudeng apehké? Miak tau nganau' sala' ngaceku tau baken pa liang ukum iamo' pa liang katu Allahké? Na tu-tu!
16 Naké muyuh kali', kareb muyuh maré burur muyuh mangun ku demulun, pad maya' bala seburur lemulun, setuneh muyuh mangun ku demulun kuan lemulun luk bén muyuh ineh, do' kuan sala' macing inan até, kian kuan baya' luk macing inan luk matu?
17 Iamo' ngubur Allah, ngaceku atun muyuh mangun ku demulun sala', iamo' nekini dengan niat luk matu, muyuh maya' ayu bada' ineh luk pangeh bida' kuan muyuh.
18 Muyuh pangeh pinuit ratnan sala', idi muyuh mangun ku demulun kuan luk matu.
19 Ui pebala maya' ayu lemulun ngaceku ratnan laya' burur muyuh, ngaceku mepad kudeng mon muyuh nemaré amung-amung babpat burur muyuh mangun ku demulun kuan luk melutak idi kuan luk dat pad nganau' kekamen luk dat, kudeng ineh teh nekini do' muyuh maré amung-amung babpat burur muyuh mangun ku demulun kuan luk matu pad nganau' kekamen luk meligan.
20 Kareb muyuh demulun sala', idi muyuh mepuit ratnan luk matu.
21 Anunké bua'neh luk ilap muyuh ratnan amung-amung kekamen luk inan muyuh migu' nekini? Ngaceku kekipedneh maté.
22 Iamo' nekini, ngaceku muyuh pangeh nepuit ratnan sala', idi mangun ku demulun kuan Allah, idi muyuh miak ngalap bua'-bua' luk macing inan luk meligan, idi kekipedneh ulun luk meruked.
23 Ngaceku tabpar sala' ineh maté, iamo' katu Allah ineh ulun luk meruked dengan Keristus Yésus Tuhan tau.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA