1 Aka natua, onu i mota'au singogon naton? Mustipa doman degaí mogaid kon dosa ing kita simbaí modugang in tabi i Allah ko'i naton?
2 Tantuí diaíbií natua! Dosa diaí bidon nongawasa ko'i naton, manangka intua kita diaí bidon mota'au aka dongka umuran mogaid kon dosa!
3 Baí kota'auan monimu ko wakutu ing kita binaptis, kita in notobatuí bidon takin i Kristus! Tua im mangalenya kong kita in sinobatuí domandon takin kinopatoian-Nya.
4 Wakutu ing kita binaptis, kita iḷobongdon takin i Kristus bo minatoidon noyotakin-Nya, simbaí naí doman ki Kristus inta aim biniag nongkon kinopatoian-Nya takin kamulia'an i Amaí, yo natua doman ing kita mokoaílami doman kong kobiagan mobagu.
5 Aka kita bo ain notobatuí i Kristus sing kita ain noyotakin-Nya minatoi, daí kita im motobatuíbií doman takin-Nya sing kita im mo'itakin biagon naí Sia.
6 Kinota'auan bidon naton kon tabiat naton saḷaku intau aindon no'itakin pinopopakuí kong kayu pinoyotalempang, simbaí kawasa in awak inta binaradosa na'a inggamaíandon, sahingga kita diaídon umuran tonggata'an in dosa.
7 Sin aka intau bo aim minatoi; yo sia im pilatan bidon kong kawasa in dosa.
8 Daí aka kita bo ai minatoi takin i Kristus, yo mopirisayabií ing kita kong kita im biagonbií doman moyotakin-Nya.
9 Sing kinota'auandon naton kong ki Kristus aim biniag nongkon kinopatoian-Nya bo Sia in diaí bidon matoi bui. Popatoi diaí bidon mongawasa ko'i-Nia.
10 Sia minatoi sin lantaran dosa intau. Bo tongaíbií komintan mobalií intua. Bo Sia nobiag tana'a, nobiagdon sing kopontingan i Allah.
11 Natua doman mo'ikow, musti monganggap minatoidon kom bonu in dosa bo mobiagdon motompia takin i Allah inta pinongin i Kristus Yesus.
12 Dika pomayak makow ing kobiaganmu inta diaí mononoi kon dunia na'a kawasa'an in dosa, simbaí diaídon ikow dumudui kon ibognya inta mora'at.
13 Bo dika domandon posarakan in awakmu kong kawasa in dosa sim pakeíonnya mogaid kon inta mongora'at. Ta'e posarakandon in awakmu ko'i Allah saḷaku intau inta aim pinamping nongkon kawasa im popatoi bo pinobayak ing kawasa inta mokobiag. Posarakaidon in awakmu komintan ko'i Allah simbaí pakeíon mogaid kon onu ing kino ibog-Nya.
14 Dosa diaí bidon mongawasa ko'i monimu, sim mo'ikow diaídon nobiag kom bonu ing kawasa in hukum agama Yahudi, ta'e kom bonu bidon kawasa in totabi Allah.
15 Tana'a, onu degaí ing kasimpulannya? Degaí mota'au ing kita mogaid kon dosa, sing kita in diaídon nobiag kom bonu ing kawasa in hukum agama Yahudi, ta'e nobiag bidon kom bonu ing kawasa in totabi i Allah? Diaíbií mota'au!
16 Baí kota'auan monimu, kon aka mo'ikow bo moposarakan in awakmu kon tobatuí intau sim mogaid kon onu inta kinoibognya, yo mo'ikow im mobalií bidon ata in intau inta dinuduian monimu tatua. Ata in dosa modia ko'i monimu mayak im popatoi, ta'e aka ata inta motoindudui ko'i Allah yo tua im modiabií ko'i monimu mayak ing kobiagan.
17 Ta'e sukurdon ko'i Allah! Sin tungkuḷ intua mo'ikow nobalií ki ata in dosa, ta'e masai na'a mo'ikow motoinduduidon totok kon totunduí inta no'itutui inta ain inogoi ko'i monimu.
18 Mo'ikow pinilatandon nongkon kawasa in dosa, bo tana'a ain nobalií ata inta mogaid kon onu inta kinoibog i Allah.
19 Lantaran mo'ikow nobodokpa, daí aku'oi moguman kon contoh tana'a simbaí mogampang komangalean monimu. Tungkuḷ intua mo'ikow noposarakan im bayongan awak monimu saḷaku ata mogaid kon soaáḷ mita inta mongoromuí bo mora'at sim makusud doman mora'at. Tuamai natua doman masai na'a, posarakaidon im bayongan awakmu saḷaku ata mogaid kon inta kino'ibog i Allah sim makusud mopia i Allah.
20 Si wakutu mo'ikow sinonggata in dosa, yo mo'ikow in diaíbií kinawasaan in ibog i Allah.
21 Ko wakutu intua onu ing ka'untungan no'ulií monimu, dodai in nogaid kon soaáḷ mita inta tana'a makow mo'oyakdon im mo'ikow mogaid? Aid mita tatua tongaíbií modia mayak im popatoi!
22 Ta'e tana'a mo'ikow aim pinilatan nongkon kawasa in dosa bo nobaliídon mogogaid mita kon oaíidan i Allah. Ka'untugannya kon tua mo'ikow nobiagdon umuran ko'i Allah, bo bungainya mo'ikow moko'ulií kong kobiagan inta mopia bo mononoi.
23 Sin aka bungai in dosa tua im popatoibií, ta'e kobiagan mopia bo mononoi moyotakin i Kristus Yesus, Tuhan naton, tua inogoibií i Allah pinomorosen.

Studi Alkitab lengkap, silahkan lihat Alkitab SABDA :: Roma 6
Studi Alkitab mobile, silahkan lihat Alkitab Mobi :: Roma 6

Download Aplikasi Alkitab Karaoke (BETA) Android:
https://play.google.com/store/apps/details?id=org.sabda.alkitabkaraoke