Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Doba sug Allah eic gesgigouhwesa dou lusud dau sug len merdoc ebdebin an gin dous, kaba, dan deic dau emeng Yahudi emen emjemouwa Abraham en aimo ucina dag ara naugb Allah eic gesgigouhwesa dou ena?
2 Anai sug Allah eic gesgigouhwesa ucugb dou en ogdoc men geicara, kaba, men goubesa inggebga naugb sug en eic ara ara baigdoumesa en moho deseino Allah namcir. Dobnaro. En emeic ara ara ingma naugb sug en eigdoumesa en moho deseino Allah mougwa hom touwero.
3 Anai lusud log se Surad Injil Meb Mohon eisaugb en deb sug nosohob, lendagai: Abraham, kaba, en medoc ebdebin Allah an areg en os dou en dous. Hang en emeigdoumesa Abraham en moho naugb en emeic gesgigouhwesa ogdoc gini dag mogud dou en toua.
4 Anai sug sud hom eicara naugb sug lusud lohw en momsi dou en, kaba, len lemeigdoumesa en moho an dag len lemoho en momsi dag mogudero. Doba gini aimo dau enin mesira eigdara dous.
5 Doba gareg en emeicara naugb sug Allah eic gesgigouhwesa dou enero, hanoba en medoc ebdebin an areg Allah os dou en gin dous, kaba, Allah eic gesgigouhwesa dag mogud ucugb dou en, aimo dau areg sud hom gini en medoc ebdebin an gin toua. Anai en od mena debsa Allah dag enin eng men goubesa inggebga naugb en ouma debin dou lusud dag meren sesar emeb naugb len deitero. Doba augwan ediyebeiya dau len namcirohob.
6 Augwan gini aimo dau aremeijouhw areg Daud erba Ugwaremer an deb sug nosohob. Anai en ens dau sud hom areg en emaimo Musa men gomnomna naugb sug Allah eic gesgigouhwesa dou en deitero, doba en od mena debsa Allah an gin dous, kaba, dag en medoc momogo deitero, doba en medoc agahugouhw namcirohob. Hang en emenara dou maman, endagai: Lusud areg Allah aigdougwo meren sesar dau len, kaba, len merdoc agahugouhw namcir. Anai len gin, kaba, Allah oguc dougwo meren geicara gecgu augwan gin dau lenohob. Dara sud hom areg Allah emecic dau men sesar toua deitero, kaba, en medoc agahugouhw toua terimda.
7 (4:6)
8 (4:6)
9 Doba merdoc gagahugouhw areg Daud erba Ugwaremer an ginohob, kaba, en erba eisaugb emeng Yahudi gedig emen emec emus dauwohob emen dousei? Naro, en emerba an gini eisaugb emen dousero, doba naugb yeng yugmahara gedig yen yemec meijus daubuma yen toua. Anai Surad Injil Meb Mohon enara deb, endagai: Abraham medoc ebdebin an areg Allah os dou en dous, kaba, edeinyum naugb sug Allah eic gesgigouhwesa dou en ucugb. Dan dens dau aiyad gini dou yen graga touohob. Hang medoc gagahugouhw gin, kaba, emediyebeiya dau yen yugmahara touwero. Doba eb naugb yen yaugwan toua namcir.
10 Anai sug Allah eic gesgigouhwesa dou Abraham ucugb, kaba, en eic gini dou en se lona giro? Sug en ec mos dauwohobei? Era, narobmei? Naro, Allah eic gesgigouhwesa dou en ucugb sug en emec mos daubuma.
11 Hanoba en arougb Abraham naugb sug en ec mos dau se lona daiyamo ansins debin gin toua. Dauntoba Abraham ecinaga dag Allah eic gesgigouhwesa dou en ucugwohob sug en emec mos daubuma. Anai en emohoiya Allah en mer an areg en os dou enero. Doba en medoc ebdebin an areg Allah os dou en gin namcirohob. Dangga hang, gareg en emec mos daubuma, hanoba en medoc ebdebin an areg Allah os dou en eisaugb Krisdus gin toua, kaba, Abraham en edag len meraguna mebin goc ino naugb len laugwanohob. Anai Allah eic gesgigouhwesa dou len ucugb, aninim dag en eic gesgigouhwesa dou Abraham sug en emec mos dau sug nosa touebma.
12 Dara en emedag leng lemec merus daubuma len meraguna mebin gin dousero. Doba en edag mamang Yahudi gedig maman mac mamus dauwohob, maman mamaguna mebin goc ino naugb maman toua. Dara en emedag maman mamaguna mebin dau sug maman mac mamus dau gin touwero. Doba en edag maman mamaguna mebin goc ino naugb maman, anai maman toua mamohoiya Allah en mer an areg en enara dou maman eisaugb Krisdus gin touwero. Doba maman masogwa deisa Abraham mohotimei mohw naugb maman mamdoc ebdebin an areg Allah os dou maman gini toua terimda. Aninim dag Abraham emohoiya Allah en mer an areg en os dou en eisaugb en medebeito hom, moho Krisdus gin, sug nosa touwero. Doba en medoc ebdebin an areg Allah os dou en terimda touohob.
13 Dangga areg Allah os dou Abraham an en medebeitor dag en eic cinogo augwan dou len dag lenin meren, kaba, en emos dou Abraham dau sug en emaimo Allah men gomnomna geic dou Musa ginero. Doba en os dou Abraham dau sug en medoc ebdebin an areg en os dou en dous. Hang emogdoc gini, kaba, Allah emeic gesgigouhwesa dou en ucugb touohob.
14 Anai sug Allah eic areg en os gini dou lusud gedig len laimo Musa men gomnomna gin dous, kaba, maman mamdoc ebdebin an en naugb ara? Naro, emera mera dau maman touwero. Dara areg Allah en os dou mamanohob, kaba, dag augwougb toua namcir.
15 Dobnaro. Allah emeic areg en os dou maman dau sug maman maimo men gomnomna geic dou Musa ginero. Doba en eic gogom medam ogdoc gini dou maman dous. Anai maman madreg dau gini mougwa einyanohob. Doba sug maman mamaimo gomnomna gin deitero. Hanoba maman mamdoc ebdebin an areg Allah os dou maman dous, kaba, eic dag maman mamedreg gomnomna hom. Hang gogom emeb naugb maman touwero, doba maman marges dau gin namcirohob.
16 Dangga hang, areg Allah en os dou Abraham sug nosa, kaba, en emos dou en dau sug en aimo Allah men gomnomna ginero. Doba Allah os dou en ogdoc sug Abraham medoc ebdebin an en dous. Dauntoba areg Allah os dou en gin, kaba, emeb naugb en medebeitor gedig len laimo Allah men gomnomna geic dou Musa gin dousero. Doba eb naugb en medebeitor dau lugmahara gedig len merdoc ebdebin an Allah dous len laugwan toua, aninim dag Abraham medoc ebdebin an Allah sug nosa touohob. Anai Musa men gomnomna gin, kaba, emeb naugb lenero. Allah eicara dag gini dauntoba areg en os dou Abraham gini, kaba, emediyebeiya dau en medebeitor hom touwero. Doba en eic dou len laugwan dag mogud namcir, aimo dau areg en medoc eigouhw an lenohob. Dangga Abraham gin, kaba, en edag meijemouwa mebin naugb emen gedig emen emec emen emus dau dousero. Doba en edag mebin naugb yen gedig yen yemec meijus dauwero maman maugwanohob.
17 Augwan gini esogwa deisa areg Allah en os deb dou Abraham se Surad Injil Meb Mohon deb sug nosa touohob, endagai: Dan deigdoumesa ban bedag meijemouwa mebin naugb lusud leinyana se cinogo augwanohob. Dara Allah gin, kaba, en mobisamougb namcir naugb sug en eigdoumesa lusud dau gomom aud maireseb ucugb. Dara areg emagunyabuma, kaba, en esa augwan agunya toua, aimo dau areg enin mer ogod an dous. Dangga hang, Abraham emesbes an areg Allah os dou en gini touwero. Doba en medoc ebdebin an en terimda. Anai en ecinaga dau sug Allah en mobisamougb dag ginohob, kaba, dag en emarges dau areg en os dou en gin touwero. Doba en eigdoumesa augwan gini deseino en namcir naugb en aimo an en toua terimda.
18 Dangga Abraham en emeija medocesa an enin maga dag eni deinyor omom touwero. Doba en medoc ebdebin an areg Allah os dou en gin namcir. Anai se lona sug Allah os meisi hom dou en, kaba, men arisogomoc edebeij deinyor huntun homohob. Dara en emeiya dau Sarai en maga dag en edreg dau sug en ouwadan mehohob gin touwero. Doba en od mena debsa Allah dag cum, kaba, Sarai en ouwadan meisi hom toues. Anai en medoc eica dag areg Allah os dou en ginohob, kaba, en mobisamougb edeinyum naugb sug en emaimo augwan gini an en toua. Hang en emarges dau areg Allah os dou en dara en emeija medocesa augwan gin mougwa hom touwero. Doba en medoc ebdebin an gin, kaba, eic goubesa dou en naugb en es agadgeij namcir. Dara en eigdoumesa Allah en moho an areg en os dou en gin toua terimda. Hang en emedag meijemouwa mebin naugb lusud areg len merdoc ebdebin an Allah se cinogo augwan toua. Anai en medoc ebdebin an areg Allah os dou en ginohob. Dara sug en medoc obsara dau, doba en od mena debsa areg Allah os dou en gini terimda, aimo dau areg Allah enara dou en se Surad Injil Meb Mohon deb sug nosa touohob, endagai: Cum, kaba, ban abdebeitor leinyana gougwa aninim dag tebeij se bogo meniha augwan namcir.
19 (4:18)
20 (4:18)
21 (4:18)
22 Sug en medoc ebdebin an Allah dag gin terimda, kaba, Surad Injil Meb Mohon enara dag Allah eic gesgigouhwesa dou en ucugb touohob.
23 Doba areg len log gin, kaba, len lemog naugb Abraham enin dousero.
24 Doba len log gin, kaba, naugb maman toua. Dangga sug maman mamdoc ebdebin an Allah dag en eigdoumesa maman Adehsud Yesus dau gomom ucugwohob, kaba, en emeic gesgigouhwesa dou maman maugwan ucugb toues.
25 Anai Allah ogugwo en se lusud merisira, dauntoba len leic gomom dou en icira maman sesar. Hanoba en eigdoumesa en dau gomom ucugb, dauntoba en edag maman gembala gesa taij naugb sug Allah eic gesgigouhwesa dou maman ucugb touohob.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA