Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Jadi pekirimo i Abraham, totua *ntoYahudi nggaulu. Berimba sampe ia najadi nanoa ri panggita nu Alatala?

² Ane rapana i Abraham nireke nanoa sabana pokaingguna nabelo, mamalamo ia mantoiya karona mboto. Tapi ledo namala ia mantoiya karona ivesia ri ngayo nu Alatala,

³ apa nitulisi riara Buku Gasa ivei: "I Abraham nomparasaya Alatala, bo lako ri pomparasayana haitu ia nireke nu Alatala nanoa."

⁴ Rapana, ane tona nokarajaa nangande gaji, gajina ledo nireke pedekei, tapi anu masipato ratarimana aga sambei nu lengena.

⁵ Tapi ledo ivesia kita ante Alatala. Alatala nombareke kita nanoa, ledo sabana kita nokarajaa nompasimbuku nokainggu nabelo. Tapi kita nireke nanoa sabana kita nomparasaya Alatala anu nompakule nombareke tona nadosa eva tona ledo nasala. Jadi kita nireke nanoa lako ri pomparasayata.

⁶ Pepatuduki haitu nasimbayu nte tesa Magau Daud nggaulu. Apa i Daud notesaki kasana ntona anu nireke nu Alatala nanoa, ledo lako ri pokaingguna.

⁷ Ivei tesa i Daud: "Nasana mpuu tona ane salana niampungimo, bo dosana nilalisimo.

⁸ Nasana mpuumo tona ane dosana domo nireke nu Alatala."

⁹ Kasana nitesa Magau Daud haitu ledo aga nambela nte toYahudi anu nangoseaka *ada posuna, tapi nambela muni nte tona ledo toYahudi anu ledo nangoseaka ada posuna. Evamo niuliku pangane, i Abraham nireke nu Alatala nanoa lako ri pomparasayana.

¹⁰ Ipia i Abraham najadi nanoa ri panggita nu Alatala? Naupu ia nisuna? Atau dopame ia nisuna? Natantu ia nireke nanoa dopame ia nisuna.

¹¹ Damo nggapurina pade nisuna ia, bo posuna haitu najadi tanda ia nanoa ri panggita nu Alatala. Nalantomo i Abraham najadi nanoa ri panggita nu Alatala sabana pomparasayana dopame ia nisuna. Jadi haitumo sampe namala raulita i Abraham rapotuama ntona pura-pura anu nomparasaya Alatala. Apa nau ira ledo nangoseaka ada posuna, ira muni nireke nu Alatala nanoa sabana pomparasayara, nasimbayu mpo i Abraham.

¹² Bo i Abraham muni rapotuama ntoYahudi, haitumo ira anu ledo aga nangoseaka ada posuna tapi nangoseaka jonjo pomparasaya i Abraham dopame ia nisuna.

¹³ Tempo nggaulu Alatala nojanji ka i Abraham bo muli-munina, dunia majadi bagiara. Alatala nojanji ivesia ledo sabana i Abraham nangoseaka Atura-atura agama, tapi sabana niparasayana Alatala bo Alatala nombareke ia nanoa ri panggitaNa.

¹⁴ Ane aga topangoseaka Atura agama mantarima anu nijanji nu Alatala, batuana ledo ntoto maria gunana momparasaya Alatala, bo ledo madupa pojanji nu Alatala apa ledo nipakuleta mpuu-mpuu nangoseaka Atura agama.

¹⁵ Ane kita aga mompasimbuku mangoseaka Atura agama, kita aga mambela pehuku nu Alatala sabana kita nasaro nombaliunaka AturaNa. Ane rapana ledo maria Atura agama, tantu ledo maria nuapa-nuapa raliunakata bo kita ledo masala.

¹⁶ Jadi kita mantarima anu nijanji nu Alatala sabana pomparasayata nggoo, ala malanto anu nidekeiNa haitu nidekeiNa bayangi lako ri kabelo nu raraNa. Jadi, anu nijanji nu Alatala nambela ka pura-pura muli i Abraham, ledo aga ka toYahudi anu nompasimbuku nangoseaka Atura agama, tapi isema-sema nanjarumaka Alatala nasimbayu mpo i Abraham nanjarumaka Alatala. Apa i Abraham rapotuamata mpasinggani, haitumo, ia najadi jonjo pomparasaya ka kita pura-pura.

¹⁷ Riara Buku Gasa tesa nu Alatala ka i Abraham nitulisi ivei: "Yaku nanganggataka iko majadi tuama ngata mbaso dea." Bo i Abraham nomparasaya tesaNa. Alatalamo nakuasa nompakatuvu tomate, bo nipakuleNa nombasovadaka tesaNa nanggasangai anu dopa naria, najadi naria.

¹⁸ Nau domo ria panjarumaka i Abraham momuli, ia batena nomparasaya bo nanjarumaka Alatala. Niparasayana ia majadi tuama ngata mbaso dea, nantuntuni tesa nu Alatala ka ia ivei: "Kadea nu mulimu bara maipia masimbayu mpo betue ri langi."

¹⁹ Tempo i Abraham nangepe pojanji haitu domo masae magana saatu-mpae umuruna bo karona mpo karo ntomate sabana natuamo, bo domo rapakulena momuli. Tapi nau nisanina karona natuamo bo bereina i Sara naliumo umuru poana, ia bate-batena nomparasaya.

²⁰ Ia ledo nolengga-lengga nomparasaya anu nijanji nu Alatala ka ia, bo pomparasayana nompakaroso rarana. Ia nantoiya bo nombabila Alatala sabana

²¹ niparasayana mpuu Alatala nompakule mompakadupa pojanjiNa.

²² Jadi i Abraham nireke nu Alatala nanoa sabana pomparasayana haitu.

²³ Nitulisi ri Buku Gasa ivei: "ia nireke nu Alatala nanoa." Tesa haitu ledo aga nipambela ka i Abraham,

²⁴ tapi nipambela ka kita muni. Kita muni rareke nu Alatala manoa ane raparasayata Alatala, anu nompakatuvu mpanjili Tuputa i Yesus lako ri kamateNa.

²⁵ I Yesus nidekei nu Alatala rapatesi mombasompo dosata bo naupu haitu Ia nipatuvu mpanjili ala kita mamala majadi manoa ri panggita nu Alatala.

Roma

Video Roma 4

Ikuti Kami:

KONTAK | PARTISIPASI | DONASI