Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Lamun maraq nike napi pendapet ite mengenai Ibrahim, leluhur bangsente? Berembẽ pengalamanne?

² Lamun hal-hal saq ie laksaneang miaq ie tejariang kenaq lẽq arepan Allah sehingge hubunganne kance Allah jari solah malik, make araq ẽndah alasan Ibrahim jari nyombongang diriqne, laguq ie ndẽq bau nyombongang diriqne lẽq arepan Allah.

³ Lẽq Kitab Suci araq tetulis, "Ibrahim percaye tipaq Allah, dait lantaran percayene nike ie teterimaq siq Allah sebagẽ dengan saq tejariang kenaq lẽq arepan Allah."

⁴ Dengan saq begawẽan nerimaq upaq dait upaqne nike ndẽqne teanggep jari hadiah sẽngaq nike hakne.

⁵ Sebalikne dengan saq ndẽq begawẽan laguq percaye lẽq Allah saq bau jariang dengan jahat tejariang kenaq lẽq arepan-Ne, nike lantaran imanne ndẽqne lantaran hasil perbuatanne mẽsaq.

⁶ Pade maraq basen Daud ẽndah, bahagie dengan saq sampun teterimaq sebagẽ dengan saq tejariang kenaq lẽq arepan Allah sehingge hubunganne kance Allah jari solah malik, ndẽqne lantaran perbuatanne,

⁷ "Bahagie dengan saq kesalaqanne teampunin dait dose-dosene sampun teapus siq Allah!

⁸ Bahagie dengan saq dose-dosene ndẽq tetuntut siq Allah!"

⁹ Napi ucapan bahagie niki cume tetujuang tipaq dengan-dengan Yahudi doang? Atao tipaq dengan bangse-bangse lain ẽndah? Sendẽqmanne sampun tiang sebut bahwe Ibrahim teterimaq siq Allah sebagẽ dengan saq tejariang kenaq lẽq arepan-Ne, sẽngaq Ibrahim beriman lẽq Ie.

¹⁰ Nah, piran Allah nyatayang hal nike tipaq Ibrahim? Sendẽqman atao sesampun Ibrahim tesunat sesuai prẽntah Allah? Mule sendẽqman ie tesunat, ndẽqne sesampun ie tesunat.

¹¹ Ie tesunat mudian, dait sunatne nike jari tande bahwe Allah sampun nerimaq ie tejariang kenaq lẽq arepan Allah, sẽngaq ie beriman tipaq Allah. Ie teterimaq siq Allah sewaktu ie ndẽqman ngelaksaneang sunat saq teprẽntahang siq Allah. Dait Ibrahim jari bapaq selapuq dengan percaye saq ndẽq besunat, dait ie pade teterimaq siq Allah sebagẽ dengan saq tejariang kenaq lẽq arepan-Ne.

¹² Ibrahim ẽndah bapaq dengan-dengan saq besunat, nike dengan-dengan saq ndẽq cume taat tipaq aturan sunat, laguq lantaran ie pade ẽndah idup beriman tipaq Allah, pade maraq Ibrahim saq beriman sendẽqman ie ngelaksaneang sunat saq teprẽntahang siq Allah.

¹³ Allah bejanji tipaq Ibrahim dait keturunanne bahwe dunie niki gen jari dowẽne. Allah bejanji maraq nike ndẽq lantaran Ibrahim taat lẽq Hukum Taurat, laguq lantaran ie beriman tipaq Allah sehingge ie teterimaq siq Allah sebagẽ dengan saq tejariang kenaq lẽq arepan-Ne sehingge hubunganne kance Allah jari solah malik.

¹⁴ Sẽngaq lamun cume dengan-dengan saq taat tipaq Hukum Taurat doang saq gen nerimaq napi saq tejanjiqang siq Allah, make ndẽq araq artine dengan beriman tipaq Allah, dait janji Allah niki ẽndah batal.

¹⁵ Hukum Taurat datengang murke Allah, laguq lamun ndẽq araq hukum nike make ndẽq gen araq ẽndah pelanggaran.

¹⁶ Keranaq nike, janji Allah jari dasar dengan beriman tipaq Allah. Hal nike jari jaminan umaq selapuq keturunan Ibrahim. Janji nike teicanin tipaq ie pade langan rahmat lẽman Allah, ndẽq cume jari dengan saq taat tipaq Hukum Taurat doang, laguq umaq ie pade saq beriman tipaq Allah, pade maraq Ibrahim nike sebagẽ bapaqte selapuq.

¹⁷ Sẽngaq maraq niki Allah bemanik tipaq Ibrahim, "Tiang sampun jariang side umaq selapuq bangse." Ibrahim nike bapaqte lẽq arepan Allah. Dait Ibrahim percaye tipaq Allah. Ie Allah saq ngidupang dengan ninggal, Ie ẽndah Allah saq cipteang siq manik-Ne napi saq ndẽq araq jari araq.

¹⁸ Timaq sampun ndẽq araq harepan malik, laguq Ibrahim tetep doang beharep dait percaye. Keranaq nike ie jari bapaq luwẽq bangse. Pade maraq saq tetulis dalem Kitab Suci, "Keturunan side gen jari luwẽq gati."

¹⁹ Ibrahim nenaoq lẽq waktu nike bahwe ie ndẽq mungkin malik gen bedowẽ keturunan, sẽngaq ragene sampun lingsir gati dait umurne gen satus taun; maraq nike ẽndah Sarah, sebiniqanne nike bangkol, laguq iman Ibrahim ndẽq jari kurang.

²⁰ Ie tetep percaye dait ndẽq ragu-ragu tipaq janji Allah, malahan imanne jariang ie sayan kuat -- sehingge ie mulieang Allah.

²¹ Ie yakin gati bahwe Allah pasti bau ngelaksaneang napi saq sampun Ie janjiqang nike.

²² Keranaq nike Ibrahim teterimaq siq Allah sebagẽ dengan saq tejariang kenaq lẽq arepan Allah sehingge hubunganne kance Allah jari solah malik.

²³ Manik Allah lẽq dalem Kitab Suci, "Teterimaq siq Allah sebagẽ dengan saq tejariang kenaq lẽq arepan Allah sehingge hubunganne kance Allah jari solah malik," tetulis ndẽq umaq Ibrahim doang,

²⁴ laguq umaq ite ẽndah. Ite ẽndah gen teterimaq siq Allah sebagẽ dengan saq tejariang kenaq lẽq arepan Allah sehingge hubungante kance Allah jari solah malik, sẽngaq ite percaye tipaq Allah saq ngidupang Junjungante Saq Mulie Deside Isa lẽman ninggal.

²⁵ Deside Isa niki sampun teserahang jari tematẽq lantaran dose-dosente; terus Ie teidupang malik siq Allah adẽq ite bau tejariang kenaq lẽq arepan-Ne sehingge hubungante kance Allah jari solah malik.

Roma

Video Roma 4

Ikuti Kami:

KONTAK | PARTISIPASI | DONASI