Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Mageng kerene, apạe ikawerang kitẹ mạanung Abraham, i upung u wanuang kitẹ e? Kereapạ e apang kinahombange?

² Kereu manga hal᷊ẹ̌ apang kinoạe e makariadiwe sarang Mawu Ruata měnarimạ i sie kụ makal᷊uasẹ̌ naungu Ruata, tangu piạbe pinẹ̌buakenge si sie waugu lumesạ. Kaiso i sie tawe makal᷊esạ su těngon Duata.

³ Su ral᷊ungu Winohẹ Susi mạbawohẹ, "I Abraham nangimang su Ruata, dingangu ual᷊ingu pangangimange ini, i sie nitarimạ u Ruata nakoạ taumata makạl᷊uasẹ̌ naung u Ruata."

⁴ I sain mělẹ̌hal᷊ẹ̌, makạtarimạ gadine; kụ gadine wal᷊inewe irẹ̌dekeng kere sěmbaụ gaghěllị, batụu ene kawe hakẹ̌ e.

⁵ Kutẹu piạbe taumata tawe měngangumbala sutawakal᷊ine hala e, kaiso mạnarakangu watangenge su Ruata kụ seng něliwirẹ̌ taumata warạdosa wọu pẹ̌sasal᷊ane. Sural᷊ungken pangangimange ene e Mawu Ruata manarimạ i sie makoạ sěngkatau makal᷊uasẹ̌ naungu Ruata.

⁶ Kerene lai su sipirang i Daud; hakịu i sie nakapẹ̌berang kariangkamang su taumata kụ kahian Duata e seng nitarimạ kere taumata makạl᷊uasẹ̌ naung'E, maningbe Mawu Ruata e tawe kumakělla manga kakanoạ u taumata ene. I Daud nẹ̌bera kere ini,

⁷ "Kariangkamang taumata apam pẹ̌sasal᷊ane niampungang dingangu kal᷊awọu manga rosane niampungang u Mawu Ruata!

⁸ Kariangkamang taumata apan dosan sire tawe tatuntukang u Mawu!"

⁹ Apa pẹ̌kakariangkamang ěndaị tumange kẹ̌tạeng su manga taumata kụ tutuhụ atorangu sunatẹ̌ samatang? Arau kai lai tumange su taumata kụ tawe tumatuhụ atorangu sunatẹ̌ ngae? Seng nisěbạ i kami kal᷊imona, u i Abraham nitarimạ u Ruata kere sěngkatau makạl᷊uasẹ̌ naung'E, ual᷊ingu i Abraham mạngimang su Ruata.

¹⁰ Kụ ange wue Mawu Ruata e mělahẹ u hal᷊ẹ̌ ene? Kal᷊imona arau samurin Abraham nipakisunatẹ̌? Těngadẹ̌, těntal᷊ang i sie ren tawe nịsunatẹ̌ bal᷊inewe seng bọu.

¹¹ I sie nisunatẹ̌ samuri, kụ sunatẹ̌ ene kětạeng kere tatiala u Mawu Ruata seng nanarimạ i sie kere taumata makạl᷊uasẹ̌ naung u Ruata, ual᷊ingu mạngimang su Mawu Ruata. I sie nitarimạ u Ruata su tempon i sie wẹ̌dang ta tumatuhụ atorangu sunatẹ̌ e. Kụ i Abraham nakoạ amang tuhụ marohkẹ̌ baugu kěbị apan mạngimang su Ruata, dingangu ual᷊ingu ene ute seng nitarimạ u Mawu Ruata kere taumata makạl᷊uasẹ̌ naung'E maningbe i sire tawe tumatuhụ atorang u sunatẹ̌.

¹² I Abraham mal᷊aing nakoạ i amang marohkẹ̌ baugu taumata tutuhụ tiahan sunatẹ̌. I sie i amang marohkẹ̌ baug'i sire wal᷊ine kětạeng ual᷊ingu i sire tutuhụ sunatẹ̌, kaiso kawe lai ual᷊ingu i sire mẹ̌bẹ̌biahẹ̌ dingangu pangangimang su Ruata mẹ̌sul᷊ung i Abraham su tempong i sie wẹ̌dang ta tumatuhụ atorangu sunatẹ̌.

¹³ Mawu Ruata nẹ̌kẹ̌do si Abraham dingangu pal᷊ahitene u dunia ini e sarung mariadi pusakạ i Abraham. Mawu Ruata e nẹ̌kědo kerene bal᷊inewe ual᷊ingu i Abraham matuhụ su torat'u Yahudi, kaiso kawe ual᷊ingu i sie mạngimang su Ruata hakịu i sie nitarimạ u Ruata kere taumata makạl᷊uasẹ̌ naung'E.

¹⁴ Kai kereu kětạeng ual᷊ingu apan tụtuhụ torat'u Yahudi samatang makatarimạu apan seng nikẹ̌don Duata, nal᷊ahẹu mangimang su Mawu Ruata e mamben tawẹ kěhase marihutu ringangu pẹ̌kakakẹ̌don Duata e mal᷊aing tawẹ lohone.

¹⁵ Torat'u Yahudi e makakạděntang hukumang u Mawu Ruata. Arawe kamageng beng tawẹ toratẹ̌ ute tawẹ apa ral᷊awang.

¹⁶ Kụ kědon Duata e nẹ̌buạ bọu pangangimang u taumata su Ruata. Ene mariadi sěmbaụ papaiang su patikụ hěnton Abraham u kědo ene nionggọ si sire kere sěmbaụ gaghěllị matagẹ̌ kahian Duata, bal᷊inewe kětạeng si sire apan matuhụ su torat'u Yahudi kaiso mal᷊aing baugi sire apan měmpangimang su Mawu Ruata mẹ̌sul᷊ung i Abraham mạngimang si Sie. Batụu i Abraham kai i amang i kitẹ kěbị tuhụ marohkẹ̌.

¹⁷ Batụu Mawu Ruata e něhengetang kere ini si Abraham, "Iạ seng napakariading kau i amang u kal᷊awọu umatẹ̌." Kerene Mawu Ruata e něngonggọ kědo ene si Abraham. Kụ i Abraham nangimang si Sie. I Sie kai Ruata kụ mạmiahẹ̌ taumata nate; i Sie kai mal᷊aing Duata kụ kětạeng ual᷊ingu měhengetang seng makariadi apan nạung tala makoạ piạ.

¹⁸ I Abraham měngkatewe tinalung mělẹ̌harapẹ̌ dingangu mạngimang maning seng lai sal᷊a tạ harape. Ual᷊ingu ene i sie nariadi i Amang u patikụ umatẹ̌. Kerẹe mạbawohẹ su ral᷊ungu Winohẹ Susi: "Hitenu e sarung mahuntinambang kal᷊awọe."

¹⁹ I Abraham su tempo ene masingkạ u i sie seng tawe měhite, watụ u seng tumanịu maghurang dingangu umure seng masandigẹ̌ mahasụ su taunge; kutẹu l᷊ai i Sara kawinge kawe wantọ. Kaiso pangangimang i Abraham tawe manga nělome.

²⁰ I sie mang tatapẹ̌ mạngimang dingangu tawe nẹ̌bimbong u kẹ̌don Duata. Kaiso pangangimang sahuneng nahuntinambang katoghase, hakịu i sie měngkate mědẹ̌dalo Ruata.

²¹ I sie mangkewen mangimang u Ruata mapakasěhụ'u apan seng nikědon'E.

²² Hakịewen ene i Abraham nitarimạ u Ruata nakoạ taumata kụ makạl᷊uasẹ̌ naung u Ruata.

²³ Bawera, "nitarimạ kere taumata makạl᷊uasẹ̌ naung u Ruata" mạbawohẹ bal᷊ine kětạeng baugi Abraham sẹ̌sane,

²⁴ kaiso mal᷊aing baugi kitẹ. I kitẹ mal᷊aing sarung itarimạ makoạ taumata kụ seng makạl᷊uasẹ̌ naung u Ruata, ual᷊ingu i kitẹ mạngimang su Ruata kụ napẹ̌bangung i Yesus, Mawung kitẹ bọu papate.

²⁵ I Yesus e seng nisarakang tadeạu pateěng ual᷊ingu kal᷊awọu rosang kitẹ; mase i Sie niapẹ̌bangung kapia kahian Duata mědeạu i kitẹ e mẹ̌sěngkapia saụ dingangu Ruata.

Roma

Video Roma 4

Ikuti Kami:

KONTAK | PARTISIPASI | DONASI