Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Aka natua, onu im mota'au singogon soaáḷ ki Abraham, mogoguyang naton tatua? Naonda im pongalamannya?
2 Aka soaáḷ mita inta inaidannya tua bo nobalií dodoyonan pinotarima'an i Allah ko'inia saḷaku intau inta mokosanang kong gina-Nya, daí oyuíon doman in dodoyonannya dumodia. Ta'e sia in diaíbií mota'au dumodia kon tayowon i Allah.
3 Sing kom bonu im Buk Mosuci pinais nana'a, "Ki Abraham nopirisaya ko'i Allah, bo lantaran pirisayanya tatua daí sinarima i Allah in sia saḷaku intau inta mokosanang kong gina-Nya."
4 Intau inta mogaid im motarimabií kom boli im pinogaidannya bo tua in diaíbií inanggap saḷaku pinomorosen sin haknyabií intua.
5 Ta'e oyuíon in intau inta dia'bií gumantong kon usahanya tontanií; sia im moposarakanbií ing kobiagan-Nya ko'i Allah inta moposaḷamat kon intau mita baradosa. Daí pirisayanyabií tatua in nobalií dodoyonan pinotarimaan i Allah ko'inia saḷaku intau inta mokosanang kong gina-Nya.
6 Natua doman in singog i Daud; manangka intua sia noguman doman nana'a, "Kosanangdon totok in intau inta ain sinarima i Allah saḷaku intau inta mokosanang kong gina-Nya, ta'e inta de'emanbií pinodoyon kon oaíidnya mita." Ki Daud noguman nana'a,
7 "Kosanangdon totok intau inta taḷaínya mita ain inampungan bo dosanya mita inampungandon i Alllah!
8 Kosanangdon in intau inta dosanya mita diaídon irekengmai i Tuhan!"
9 Degaí singog ḷunganga na'a tongaí pinotuju kon intau mita inta ain sinunat andeka degaí ko'i monia doman inta diaí sinunat? Sin munadon pinogumanku, kong ki Abraham sinarima i Allah saḷaku intau inta mokosanang kong gina-Nya, de'emanbií lantaran oaíidnya, ta'e lantaranbií pirisayanya ko'i Allah.
10 Daí degaí dodai onda tua pino'ontong i Allah? Kowakutu degaí sia diaípa sinunat ande kowakutu in sia sinunatdon? Tantuí kowakutubií in sia diaípa sinunat, de'emanbií bain sinunat makow.
11 Sia sinunat bambií no'iduduimai, tongaí sunatnya tatua in tongaíbií saḷaku tanda kon sia ain sinarima i Allah saḷaku intau inta mokosanang kong gina-Nya, lantaran mopirisaya ko'i Allah. Sia sinarima i Allah kowakutu in diaípa dinumudui kon atorang in sunat tatua. Bo ki Abraham nobalií guyanga im bayongan intau inta mopirisaya ko'i Allah, bo lantaran tua, daí sia sinarimadon i Allah saḷaku intau inta mokosanang kong gina-Nya, umpakahbií mosia diaí sinunat.
12 Ki Abraham guyangabií doman in intau mita inta ain sinunat. Sia in nobalií guyanga monia, de'emanbií tongaí lantaran mosia ain sinunat, ta'e lantaranbií mosia nopirisayadon ko'i Allah bo nobiagdon naonda bo ki Abraham wakutu in diaípa sinunat.
13 Ki Allah ain nodandi ko'i Abraham bo katurunannya, kon dunia na'a im mobaliíbií kapunya'an i Abraham. Dandi tatua in de'emanbií pinodoyon kong kotoindudui i Abraham kon hukum in agama Yahudi, ta'e lantaranbií sia mopirisaya ko'i Allah, sahingga sinarima i Allah in sia saḷaku intau inta mokosanang kon gina-Nya.
14 Sin aka tongaí intau mita motoindudui kon hukum in agama Yahudi i motarima kon onu inta pidandi i Allah, daí pirisaya ko'i Allah im beresibií diaí im baragunanya bo dandi i Allah tua diaíbií im mangalenya.
15 Hukum agama Yahudi na'a mokopoaíngoi kon hukuman i Allah. Ta'e aka diaí in hukum tatua, yo diaíbií doman i moḷawang.
16 Dandi i Allah tatua im pinodoyonbií kom pirisaya in intau tatua ko'i Allah. Tua in nobalií tobatuí jaminan kom bayongan katurunan i Abraham, kon dandi tatua inogoi ko'i monia saḷaku tobatuí o'ogoi inta pinonotabi i Allah, de'emanbií tongaí ko'i monia inta motoindudui kon hukum in agama Yahudi, ta'e ko'i moniabií doman inta mopirisaya ko'i Allah. Naí ki Abraham inta totok im mopirisaya ko'i-Nia. Ki Abraham tua ing ki amaíbií naton komintan inta mopirisaya.
17 Sing ki Allah in nogumandon ko'i Abraham nana'a, "Ikow aim binalií-Ku ki amaí im bayongan intau inta mopirisaya." Tua in dandi inta inogoi i Allah ko'i Abraham. Bo ki Abraham nopirisaya ko'i-Nia. Sia tua ing ki Allah inta nomiag kon intau minatoi, Siabií doman tua ing ki Allah inta tongaí takin singog mogaid kom bayongan yagi-yagi inta diaípa, mobalií oyuíon.
18 Ki Abraham in umuran makow moharap bo mopirisaya umpakahbií diaídon in harapan. Tuamai sia nobalií ki amaí im bayongan intau inta mopirisaya, naí inta pinais kom bonu im Buk Mosuci, "Katurunanmu im mobalií mobayong totok."
19 Kinota'auan bidon i Abraham tungkuḷ intua, kon diaí bidon kuma'an kon akaḷ aka sia bo moko'uliípa kong katurunan, sin nogoguyangdon in sia, bo umurnya im modiugdon mogatut notaong; apadoman ki Sarah ki buḷoinya tua im bantoí, tongaí umuran moḷoben im pirisaya i Abraham.
20 Sia umuran mopirisaya bo diaíbií in lia-liaw makow ing ginanya kon onu inta pinodandi i Allah tua. Pirisayanya mokodugang kon ropotnya, sahingga umuran sia modayow ko'i Allah.
21 Totokbií im moyakin sia kom mokosanggupbií ing ki Allah momia kon onu inta aim pinodandi-Nya tua.
22 Tuamai sinarima i Allah in sia saḷaku intau inta mokosanang kong gina-Nya.
23 Singog "sinarima saḷaku intau inta mokosanang kong gina i Allah", pinais de'emanbií tongaí ko'i Abraham tontanií;
24 ta'e ko'i natonbií doman. Kita in tarima'anbií doman i Allah saḷaku intau inta ain nokosanang kong gina-Nya, sing kita in nopirisaya ko'i Allah inta ain nomiag bui ko'i Yesus, ki Tuhan naton.
25 Ki Yesus tua im pinosarakandon kon intau mita sin limodon sim potobus kom bayongan dosa naton. Tongaí Sia biniagdon bui i Allah simbaí kita buidon moyodame takin i Allah.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA