Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Jadi aha ma hatahononta, na dapot si Abraham, ompungta ai mangihutkon pardagingon?
2 Porini ipintori si Abraham halani horjani, adong do sipangunsagahkononni, tapi seng dompak Naibata.
3 Aha do na hinatahon ni Surat in? “Na porsaya do si Abraham bani Naibata, gabe ai ma ihira gabe hapintoronni.”
4 Bani halak siparhorja, upah do ai ihira, sedo songon idop ni uhur, tapi songon hakni do.
5 Bani halak na so marhorja, tapi na porsaya bani Sipintori halak na jahat in, haporsayaonni ai do ihira gabe hapintoronni.
6 Sonai homa si Daud, iparhatuah do halak na gabe pintor ihira Naibata, seng humbani horjani,
7 “Martuah ma halak na dob sinasap salahni, anjaha na dob nirungkub dousani!
8 Martuah ma halak, anggo lang ihira Tuhan in dousani bani!”
9 Ise do na iparhatuah ijai? Halak na marsunat do hansa, atap dihut do na so marsunat? Ai ihatahon hita do, “Ihira do haporsayaon ni si Abraham gabe hapintoronni.”
10 Ai sonaha do iparhirahon bani? Dob marsunat do ia, atap lape marsunat? Sedo dob marsunat, tapi sanggah lang marsunat ope.
11 Ijalo do parsunaton ai songon tanda atap lak ni hapintoron na humbani haporsayaon ai, sanggah lape tarsunat ia, ase bapa ia bani sagala na porsaya na so marsunat, gabe iparhirahon homa bani sidea hapintoron ai.
12 Bapa do ia homa bani na marsunat, tapi seng asal tarsunat, sihol ma iirikkon haporsayaon ni si Abraham, bapanta ondi, sanggah lape marsunat ia.
13 Ai seng marhitei titah in roh bagah-bagah bani si Abraham atap bani ginomparni, paboa ia do sitean dunia on, tapi marhitei hapintoron na humbani haporsayaon in do.
14 Ai ambit sihorjahon titah in do gabe sipanean, seng marguna be haporsayaon in, anjaha seng be asi bagah-bagah in.
15 Ai ringis do ihorjahon titah in, tapi anggo seng dong titah, seng dong panlanggaron.
16 Ase humbani haporsayaon in do in, ase maronjolan bani idop ni uhur, totap bagah-bagah in bani haganup ginomparni, seng pitah bani na humbani sipartitah, tapi dihut do bani na porsaya songon si Abraham. Ia do bapa ni hita haganup,
17 (songon na tarsurat in, “Hubahen do ho gabe bapa ni buei bangsa”) i lobei ni Naibata, na hinaporsayaanni ai, Sipagoluh na dob matei anjaha na mandilo na so adong hinan gabe adong.
18 Marimbang sagala pangarapan do haporsayaonni na mangarap ai, ase gabe bapa ni buei bangsa ia, domu hubani hata ai, “Sonai ma magira ginomparmu.”
19 Anjaha seng roh galekni haporsayaonni paidah-idah angkulani na matei-matei ai, age pe domma hira-hira saratus tahun umurni, sonai age mangidah si Sara na dob hasayoban ai.
20 Seng ra bungbang uhurni manadingkon haporsayaonni bani bagah-bagah ni Naibata, tapi lambin toguhni do tene haporsayaonni anjaha ipasangap do Naibata.
21 Tenger tumang do uhurni, paboa tuk do kuasa ni Naibata pasaudkon bagah-bagah-Ni.
22 Halani ai do ase ihira ai gabe hapintoronni.
23 Hata “iparhirahon bani,” seng pitah halani ia tumang, ase tarsurat ai,
24 tapi dihut do halani hita, anjaha iparhirahon do ai banta, na porsaya bani Sipapuho Jesus, Tuhanta in, humbani na matei.
25 Ai iondoskon do Ia halani panlanggaronta, anjaha ipagoluh halani pamintorion banta.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA