Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Salingou niakidawongo 'o nyawa gee manga ngo-ngaku koikua-kuatuwa, 'uwa nimakaba-baili de de 'ona ma ngale to 'ona ma sirete manga di-dibangi.

² Naga munuka yamaoku 'ato 'ona kaidadi ya'odomo 'okia naga bato. Ma naga munuka gee manga ngo-ngaku koikuatuwa; 'ona yamaoku 'idadi ya'odomo duga ka 'o sayoro.

³ 'O nyawa gee kaidadi ya'odomo 'okia naga bato, 'uwa yositi-tingoono 'o nyawaka gee ya'odomo 'o 'inomo kaita-tantuu duga. Mita 'uwa yakisisowono 'o nyawa gee ya'odomo 'okia naga bato, sababu ma Jo'oungu ma Dutu wakidawongokau.

⁴ Ngini koyadaenuwa niakisisowono 'o nyawa 'iregu manga gilaongo, koge'enali mita koya'akunuwa niakisisowono ma Jo'oungu ma Dutu 'awi gilaongo. 'O gilaongo gu'una wadiai 'iti-tiai bolo 'isowo-sowono ge'ena 'awi tuangi 'awi 'urusangi. De dua 'o gilaongo gu'una 'asa wodiai yaowa-owa, sababu ma Jou wa'akunu widiai koge'ena.

⁵ Naga munuka yamaoku 'o wange moi 'ita-tantuu 'ifoloi 'iparaluu de 'o wange 'iregu-regu, 'ena munukali yamaoku 'o wange 'iodumu ge'ena kaimatero. Madaka la moi-moi yositantuu to 'ona manga di-dibangi ma sirete.

⁶ 'O nyawa gee yosilamo-lamo 'o wange 'ita-tantuu, 'ona yodiai koge'ena ma ngale ma Jou wihoromati. 'O nyawa gee ya'odo-'odomo 'okia naga bato, koge'ena yodiai ma ngale ma Jou wihoromati, sababu 'ona yo'amalaha ma Jo'oungu ma Dutuka ma ngale 'o 'inomo ge'ena. Koge'enali mita gee 'o nyawa ya'odomo 'o 'inomo kaita-tantuu duga, 'o nyawa go'ona mita ma Jou wihoromati de yo'amalaha ma Jo'oungu ma Dutuka.

⁷ Sababu ngone ge'ena ma ngale powisitedene ma Jo'oungu ma Dutu so po'ahu bolo posongene ge'ena ko ngonewa ma sirete nanga mau.

⁸ Nako ngone po'ahu, po'ahu ma ngale ma Jou. De nako ngone posongene, posongene ma ngale ma Jou. So po'ahu bolo posongene, ngone ne'ena to ma Jou.

⁹ Ma sababu ge'enau so ma Kristus wosongenokau de womomikokali. La 'una wodadi Jou ma ngale 'o nyawa yo'ahu-'ahuosi de yosonge-songenokau.

¹⁰ So 'Esa moi! Ngini koidadiwa niakisisowono nia 'esa moi ka 'o ngo-ngaku moi, de koya'akunuwa niakisiti-tingoono. Niongano-nganono! Ngone poodumu 'asa potaari ma Jo'oungu ma Dutuka ma ngale wonalega ma diai.

¹¹ Sababu naga 'o Buku 'Itebi-tebinoka 'isilefoku, "Ma Jou wongose, 'Ngoi ne'ena ma Jo'oungu ma Dutu to'ahu-'ahu. 'O nyawa moi-moi 'asa yosuba 'ai bionoka; de 'o nyawa moi-moi 'asa yongose 'ato ngoiou ne'ena ma Jo'oungu ma Dutu.'"

¹² So ngone moi-moi 'asa potaari de pomadasango ma Jo'oungu ma Dutuka ma ngale to ngone nanga di-diai.

¹³ Sababu ge'ena 'uwau ngone pomasikasala moi de moi. Ma 'ena 'ifoloi yaowa 'uwa niodiai 'o kianikia gee ma duanguku 'ania 'esa moi ka 'o ngo-ngaku moi yosowono.

¹⁴ Ngoi de ma Jou Yesus mimarimoi, so ngoi tanakokau ma Jo'oungu ma Dutu wosidabi 'o 'inomo 'iodumu kaidadi pa'odomo. Ma 'o kianikia 'o nyawa koidadiwa ya'odomo, nako la 'ona yamaoku koidadiwa ya'odomo.

¹⁵ Ma nako 'okia naga gee ngini nia'odomo, so moi gee ka 'o ngo-ngaku moi de de ngini manga singina 'isiri, ge'ena ngini niodiai moteke ko 'o dorawa. 'Uwa niodiai 'ania 'esa moi yoliba sababu 'okia naga gee nia'odomo, sababu ma Kristus wosongenokau ma ngale wakisilaha 'ona.

¹⁶ Ge'enau so 'uwa niadiai 'okia naga gee ngini niamaoku yaowa, ma 'o nyawa 'iregu yamaoku 'itorou.

¹⁷ Sababu nako ma Jo'oungu ma Dutu wapareta 'o nyawa moi-moi nanga 'ahu, ge'ena koisilamo-lamowau 'okia naga gee pa'odomo de pa'okere. 'Isilamo-lamo ge'ena la pamoteke ma Jo'oungu ma Dutu 'awi mau, nanga singina 'iriidi de padawongo 'o morene 'o Ngomasa 'Itebi-tebinino.

¹⁸ 'O nyawa gee ma Kristus wileleani ma ngekomo kone'ena, 'ona ge'ena ma Jo'oungu ma Dutu 'awi singina yasanangi, de 'o nyawa 'iregu-regu yakihoromati.

¹⁹ Sababu ge'ena to ngone nanga dumutu ge'ena la salingou posidadi 'o rimoi de pomasikakuata moi de moi.

²⁰ 'Uwa ma sababu ka 'o 'inomo de niatorou 'okia naga gee ma Jo'oungu ma Dutu wamanaramokau. 'O sagala 'inomo ge'ena ma goungu kaidadi pa'odomo, ma ngone posowono nako la 'okia naga pa'odomo de ma duanguku 'o nyawa 'iregu yosowono.

²¹ 'Ifoloi yaowa 'uwau nio'odomo 'o siode bolo 'uwau nia'okere 'o 'anggur bolo niodiai 'okia naga gee ma duanguku moi gee ka 'o ngo-ngaku moi de de ngini yosowono.

²² Niaga-gaono 'okia naga gee ngini niangaku-ngaku ge'ena, niadiai ge'ena ka ma Jo'oungu ma Dutu 'awi bionoka duga, ma ngale duga ka ngini ma sirete. Yosanangioka 'o nyawa gee koyomasisalawa yadiai 'okia naga gee yamaoku 'iti-tiai.

²³ Ma 'o nyawa gee ya'odomo 'o kianikia la manga singina kailio-lio ma ma duanguku kaya'odomoka, 'ona ge'ena yosowono, sababu 'ona yodiai moteke ko manga ngo-ngakuwa. De 'okia naga bato yadiai moteke ko manga ngo-ngakuwa ge'ena 'o sowono.

Roma

Video Roma 14

Ikuti Kami:

KONTAK | PARTISIPASI | DONASI