Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Intau inta diaí moyakin kon onu inta pinirisayanya mustibií tarima'anmu kon sigad in intau mita inta mopirisaya. Dikabií mobobayowannya soaáḷ pendiriannya tatua.
2 Oyuíon intau kopendirian kon sia i mota'aubií moka'an kom bayongan yagi-yagi. Ta'e intau inta diaípa moyakin kon onu inta pinirisayanya tatua, kinota'auannya in tongaíbií kuyat im mota'au ka'anonnya.
3 Intau inta moka'an kon onukadon dona'aibií mopo'ompaímai kon intau inta tongaí moka'an kong ka'anon inta ain sinantuínya mota'au ka'anon. Naí doman tua, intau inta tongaí moka'an kon onu inta ain sinantuínya mota'au ka'anon, dona'aibií mopotaḷaí kon intau inta moka'an kom bayongan yagi-yagi, sin ain sinarima i Allah in sia.
4 Ki inebií in ikow utat, sahingga i musti mopotaḷaí kon ata intau ibanea? Mo'ibanting ande mo'isindog in ata tatua, tua in urusanbií i tuangnya. Bo totu'ubií kon ata tatua i mo'isindogbií motorindog, si mokomampubií ing ki Tuhan moḷukad sahingga in sia tantuí simindog motorindog.
5 Oyuíon in intau monganggap kon oyuíonbií in tobatuí singgai inta paling moponting nongkon singgai ibanea, ta'e oyuíonbií doman intau monganggap kon notongkaibií im bayongan singgai. Pomayakdon makow i mosia monantuí kon onu ing koyakinan monia tontanií.
6 Intau inta nonantuí kon oyuíonbií in singgai inta totok moponting, tua in inaidannya sim mohormatbií ko'i Tuhan. Intau inta noka'an kom bayongan yagi-yagi, tua in lantaranbií doman sia mohormat ko'i Tuhan, sin sia mosukur kon onu inta inogoi ka'anon tua. Natua doman, intau inta tongaí moka'an ka'anon inta ain sinantuínya mota'au ka'anon, yo intau tatua im mohormatbií doman ko'i Tuhan bo mosukur ko'i Allah.
7 Kon sigad naton na'a diaíbií im mobiag tongaí kong kopontingannya tontanií, bo diaíbií doman in tobatuímai im matoi ko'inia tontanií.
8 Aka kita mobiag, yo kita im mobiagbií kong kopontingan i Tuhan. Bo aka kita matoi yo matoibií doman kong kopontingan i Tuhan. Daí mobiag andeka matoi, kita na'a ing kapunya'anbií i Tuhan.
9 Ki Kristus aim minatoi, ta'e buidon nobiag. Manangka intua sia nobaliídon Tuhan kon intau mita inta nobiag bo kon intau mita doman inta aim minatoi.
10 Daí utatku mita! Onubií im mangalenya kita mopotaḷaí kon intau mita inta tumpaḷa mopirisaya ko'i Kristus? Bo onubií im mangalenya ki utat mopo'ompaímai ko'inia? Kita komintan im mayakbií kon tayowon i Allah sin hakimon.
11 Kom bonu im Buk Mosuci aim pinais nana'a, "Totu'u kon nana'abií im pirman i Tuhan, pomuḷoi intau mamangoibií tumungkud bo mosumbah kon tayowon-Ku. Bo pomuḷoi intau mongakubií kon Aku'oibií na'a ing ki Allah."
12 Daí kitabií tontanií im motanggung jawab kom bayongan oaíid naton ko'i Allah.
13 Manangka intua dona'aidon mosipotaḷaían ing kita. Ta'e aidai in na'a, poramiji simbaí mo'ikow diaí mogaid kon onukadon inta mokopopisií ko'i utatmu inta tumpaḷa Keresten mogaid kon inta mo'itaḷaí.
14 Lantaran aku'oi bo notobatuídon i Tuhan Yesus, daí mopirisayabií totok in aku'oi kon diaíbií in tobatuímai monajis. Soaáḷ tatua najis podudui intau tobatuí, aka tua inanggapnya najis.
15 Sin aka ikow bo moposakií kong gina i utatmu tumpaḷa Keresten tongaí lantaran onu ing kina'anmu tua, daí aidmu tua in diaídon pinodoyon kon tabi. Dona'aibií pomayakmu makow ki utatmu tua mobodito tongaí lantaran onu ing kina'anmu, sing ki Kristus aim minatoi lantaran intau doman tobatuí tatua.
16 Manangka intua dona'aidon pomayakmu makow onu inta mopia ko'inimu, anggapon intau ibanea diaí mopia.
17 Sin aka ki Allah im momarentah kong kobiagan intau, yo soaáḷ onu im mota'au ka'anon ande inumonnya, tua in diaíbií moponting. Soaáḷbií dumudui kon onu ing kino'ibog i Allah, mokorasa kom mo'onow ing gina bo motarima kong kasanangan gina inta inogoi in Roho i Allah, tua im moponting.
18 Intau inta nobantung natua ko'i Kristus, sia tua inta mokosanang kong gina i Allah, bo sia in hormaton doman in intau ibanea.
19 Tuamai koligai baí tayakon naton onu inta mokopoaíngoi kon dodamean bo mosibiagan.
20 ḷukadaibií simbaí diaí tongaí soaáḷ koka'anon, ikow momoguya'at kon onu inta ain inaidan i Allah. Komintan ka'anon diaíbií im pinoton, mota'aubií modait ka'anon, ta'e aka onu ing kina'anmu tua mokopopisií kon intau ibanea baradosa'an, daí ikow kotaḷaí.
21 Manikah dikadon moka'an kom ponoyak ande monginum kon anggur, ande mogaid kon onukabií inta mokopopisií ko'i utatmu tumpaḷa Keresten tua, mogaid kom mokobaradosa.
22 Onu inta pinirisaya i utat, yo tongaídon tua in aidan kon tayowon i Allah sing kopontinganmu tontanií. Mosanangdon totok im mosia inta diaí morai kon no'itaḷaí kon onu inta inanggapnya no'itutui.
23 Ta'e intau inta mo'ondo-ondok moka'an kon onu inta mota'au ka'anon, tongaí pangabisannya noka'an doman kong ka'anon tatua, yo potaḷaían i Allah in sia, sin tua inaidannya diaí pinodoyon kong koyakinannya soaáḷ onu in no'itutui bo onu inta no'itaḷaí. Onukah in aidan takin diaí podoyon kong koyakinan yo dosabií intua!
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA