Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Wali re’e pua’i ngkita to samba’a pangaya to tawa maroso pangayanya, see naka sira bata-bata rayanya mangkonong lengko ngkatuwu ntau to mangaya. Wali ane tau to ewa wetu, anu kita mangantima ri kasanang ndaya. Nempo yusa pampobuuka nsira, ne’e kita masibanta resi sira.
2 Rapanya, tau to maroso pangayanya manganto’o samparia ngaya mpangkoni tare to taa maya rakoni. Pei tau to taa maroso pangayanya re’e to manganto’o i Pue Allah taa mangawaika kita mangkoni nae, ojo ira ngkaju to maira to maya rakoni.
3 Wali tau to mangkoni samparia ngaya mpangkoni, ne’e mangkaengas tau to taa mangkoni. Pasi tau to taa mangkoni samparia ngaya mpangkoni, ne’e mangabotus tau to mangkoni. Apa i Pue Allah room mangantima yunu ngkita etu.
4 Wali yunu ngkita etu to papolaong i mPue Allah semo, wali taa masipato kita mangabotus to papolaong nsa’e. Puenya semo to maya mangabotus tau etu pei manganto’o bara sala bara taa. Pasi yununta etu damangika anu to masipato raika, apa i Pue re’e kuasa mangansawang ia see ia mangika anu to masipato etu.
5 Wali re’e wo’u tau to manganto’o re’e eo to bae-bae batuanginya resi i Pue Allah pei eo to yusa. Pasi re’e to manganto’o tare pasisalanya eo. Pei ane mangkonong anu to ewa wetu, matao ane kita mampakatantu ri pampobuuka ngkita ewa wimba pampobuuka ngkita samba’a pei samba’a.
6 Ane tau to mampobuuka samba’a eo to bae batuanginya etu, ia mangika apa ewa wetu nikanya manga’angga i Pue. Pasi tau to mangkoni samparia ngaya mpangkoni, ia mangika apa ewa wetu nikanya manga’angga i Pue, apa ia manganto’oka i Pue Allah tarima matao. Pasi tau to taa mangkoni samparia ngaya mpangkoni, ia seja mangika apa ewa see nikanya manga’angga i Pue, pasi ia seja manganto’oka i Pue Allah tarima matao.
7 Wali ne’e mangabotus yunu ngkita to mangaya seja i Pue Yesu. Apa samparia kita to mangaya, nempo tuwu nempo mate, kita tiroo paka i Pue Puenya. Wali see naka ane ewa pamporani ngkita Ia semo to ra’angga ri raya ngkatuwu ngkita pasi ri raya ngkapate ngkita, si’amo kita to ra’angga.
8 (14:7)
9 Wali naka pei i Kerisitu mate pasi tuwu muni see Ia maya mawali Pue ntau samparia, nempo to matem pasi to tuwuwa.
10 Wali maka pei komi mangabotus pua’i ngkomi to samba’a pangaya? Pasi maka pei komi mangkaengas pua’i ngkomi to samba’a pangaya? Apa darata temponya kita samparia damampotango gadera to napotunda i mPue Allah damangabotus kita samparia.
11 Kita tansani palaong etu damawali apa re’e ratulis ri raya ntuntu i mPue Allah, to’onya, “I Pue manganto’o, ‘Matantu kojo katuwungKu, pasi ewa wetu seja katantunya samparia tau damambokotu ri tangongKu, pasi nganga ntau samparia damangabarong i Pue Allah.’” Etu semo gombo i mPue to ratulis tempo owi.
12 Wali kita samparia damangansono pampotanaka i mPue Allah resi kita samba’a pei samba’a mangkonong ewa wimba lengko ngkita ri raya ngkatuwunta ri lino, bara kita nangika pamporani i mPue Allah tempo etu, bara taa.
13 Wali see naka kuto’oka komi, ne’e kita masibotus. Pei, anu kita mampobuuka samba’a pei samba’a, “Aku taa damangika palaong to mangagoda pua’ingku to samba’a pangaya naka ne’e ia damangika dosa.” Ewa wetu to matao kita mampobuuka.
14 Wali aku kunsani kojo tare pangkoni to mampakarikasika kita ri pangkita i mPue Allah, apa room i Pue Yesu mampakanasaka aku. Pei tau to mampobuuka re’e pangkoni to mampakarikasika kita ri pangkita i mPue Allah, wali ane ia mampobuuka ewa see, monso pu’u i Pue Allah taa rani ia mangkoni pangkoni etu.
15 Wali ane kita mampakamawo raya mpua’i ngkita apa kita mangkoni pangkoni to ia mampobuuka mampakarikasika kita ri pangkita i mPue Allah, batuanginya kita tamo mamporayang ia. Pei i Kerisitu bae kojo pamporayangiNya resi ia, see naka Ia mangkapateka ia. Wali ne’e kita mampakaja’a yau pangaya ntau etu apa saba kita mangkoni anu to ia mampobuuka mampakarikasika kita ri pangkita i mPue Allah.
16 Wali bara kesaa to kita mampobuuka matao, ane masusa raya nu yununta mangkita, to tao-tao kita ne’e mangika see lengko ngkita taa darato’o maja’a.
17 Apa tempo i Pue Allah mawali Makole ngkita, tempo etu si’a porenta mangkonong pangkoni pasi mangkonong anu to rainu to bae batuanginya. To bae batuanginya etu semo kita nato’o i mPue Allah tare dosanta, pasi kita masingkatao pei sa’e, pasi kita bae kandende ndaya to nawaika i Nosa Mapasing kita.
18 Wali tempo kita mangika palaong i ngKerisitu, tempo etu ne’e kita mangalulu pamporani ngkita. To taotao kita mampobuuka to bae batuanginya, etu semo kita masingkatao pei yununta. Apa tau to mangika palaong to etu, tau etu mampakasanang i Pue Allah pasi to lino manga’angga seja ia.
19 Wali anu kita mangaliwu kojo jaya see kita datuwu masingkatao, pasi masisawang mampakaroso raya ngkita samba’a pei samba’a.
20 Ne’e kita mampakaja’aka yau palaong i mPue Allah apa saba kita mangkoni anu to nato’oka nsa’e taa matao rakoni. Kamonsonya samparia ngaya mpangkoni paka matao rakoni. Pei taa matao kita mangkoni ane damawali dosa resi sa’e.
21 To taotao kita tamo mangkoni nae pasi bara manginu tule, bara mangika anu to yusa sakowa mangika palaong to damawali dosa resi pua’i ngkita to samba’a pangaya.
22 Wali ane kita mangepe taa sala lengkonta, anu kita mangika, pei ojo ri pangkita i mPue Allah. I sema tau to rayanya taa mangepe sala tempo ia mampolengkoka aya ndayanya, ia masanang.
23 Pei tau to bata-bata rayanya mampobuuka, “Wimba pangkoni si’i, bara maya rakoni, bara taa,” ane tau etu mangkoni, ia sala apa ia mangkoni si’a mangalulu aya ndayanya. Apa nempo bara kesaa palaong to kita mangika, ane taa singkonong pei aya ndaya ngkita samba’a pei samba’a, palaong etu mawali dosa resi kita.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA