Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Do' perurum nelun luk melaya' anuneh ineh. Aleg pesaad neneh ratnan terawéneh.
2 Inan lemulun luk merapet miak kuman amung-amung luk kenen, iamo' lemulun luk melaya' ineh kuman kikid irin mo'.
3 Aleg lemulun luk kuman anun-anun ngebeneh luk na kuman, idi aleg lemulun luk kuman kikid irin mo' ngesala' lemulun luk kuman anun-anun, ngaceku Allah pangeh nengalap neneh.
4 Idéké iko ini luk ngesala' demulun lun baken? Tuanneh sebuleng luk kali' kudeng ieh do', kian dat lek. Idi ieh miak tuped meraben, ngaceku Tuhan melalud ngetueh neneh.
5 Inan teh lemulun luk ngerawé seaco meluun do' ratnan aco luk baken, iamo' inan teh luk baken luk ngerawé anid-anid aco ini mepad mo'. Do' anid-anid burur lutep bang niatneh sebuleng.
6 Lemulun luk ngerawé aco sineh, nima' neneh ngimet ineh ngaceku Tuhan, idi lemulun luk kuman ineh, nima' neneh kuman ngaceku Tuhan, ngaceku ieh maré ubur kuan Allah; idi lemulun luk na sikal kuman ineh, nima' neneh na kuman ngaceku Tuhan, idi maré ubur kuan Allah teh.
7 Ngaceku rat arang tau, seburur pana' na miak mulun kuan bururneh sebuleng, idi seburur pana' na miak maté kuan bururneh sebuleng.
8 Kudeng tau mulun, tau mulun kuan Tuhan teh, idi kudeng tau maté, tau maté kuan Tuhan. Kudeng tau mulun idi maté pana', tau ini pupu Tuhan teh.
9 Ngaceku Keristus naté idi muli' mulun teh, pad Ieh mangun ku Tuhan kuan lemulun luk pangeh naté idi luk mulun pana'.
10 Iamo' iko ini, anunké punneh iko ngesala' kinanakmu? Idi iko, anunké punneh iko ngebeneh kinanakmu teh? Ngaceku amung-amung tau miak amé' matun kerusi besara' Allah.
11 Ngaceku pangeh inayud, "Ratnan ulunKu ini, kebala Tuhan, idi anid-anid aleb miak tekeradung pa kiungKu, idi anid-anid dila' miak ngamo Ui ini Tuhan."
12 Ngaceku ineh, idi anid-anid burur tau na miak na ngor ratnan bururneh sebuleng kuan Allah.
13 Ngaceku ineh aleg tau ngesala' seburur dengan seburur teh, iamo meluun do' muyuh mutut ini, pad aleg seburur ngesabeng kinanakneh pad ieh mebpeh.
14 Idi ngaceku rurumku dengan Tuhan Yésus, ui kali' na luk idi akan anun-anun pana' luk melutak, iamo' kuan lemulun luk ngerawé akan ineh melutak, idi kuanneh kali' rungen melutak.
15 Kudeng iko ngesabeng kinanakmu ngaceku luk kenenmu ineh, idi baken iko maya' dalan mawa teh. Aleg ngeraruh neneh ngaceku ratnan luk kenenmu ineh, ngaceku Keristus pangeh naté ku libalneh.
16 Aleg nima' luk do' sirenmu ruen lemulun ngedat.
17 Ngaceku Imet Allah ineh baken ratnan kuman idi ngirup, iamo' luk matu idi awang idi mawang niat luk biré Roh Meligan.
18 Idé-idé luk mangun ku demulun Keristus bang luk kudeng ini, idi ieh luk petulu dengan pian Allah, idi ieh luk buren lemulun.
19 Ngaceku ineh do' tau nakap anun-anun luk ngacing inan awang idi luk ngepicet niat tau seburur dengan seburur.
20 Aleg ngusag luk inau' Allah ngaceku ratnan luk kenen. Amung-amung luk kenen ineh meligan peh, iamo sala' muyuh kudeng luk kenen muyuh ngesabeng nelun baken.
21 Meluun do' kudeng na kuman uang pung, idi ngirup abpa' anggur, idi anun-anun pana' luk miak ngesabeng kinanakmu.
22 Idi anu luk namu ineh, ngimet kuan bururmu sebuleng pa kiung Allah teh. Samal kuan lemulun luk na ngesala' bururneh ratnan anun-anun luk bang terawéneh do'.
23 Iamo' idé luk kuman dengan merapang, ieh ineh miak kumin, ngaceku na ieh kuman dengan manu. Idi anun-anun luk na ratnan manu, ieh ineh sala' peh.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA