Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Terimaq dengan saq lemah imanne, ndaq hakimin pendapetne.

² Araq dengan saq bedowẽ iman bahwe ie bau ngelorang napi juaq, laguq araq dengan lain saq ndẽq kuat imanne; cume bau ngelor sayur-sayuran doang.

³ Dengan saq ngelorang napi juaq, ndaq menghine dengan saq cume ngelorang keloran tertentu doang. Dait dengan saq ngelor keloran tertentu doang, ndẽq ẽndah ngukum dengan saq ngelorang selapuqne, sẽngaq Allah sampun nerimaq ie.

⁴ Sai side pade setetune sehingge side pade bani ngadilin pelayan dengan lain? Timaq pelayan nike rebaq atao nganjeng, nike urusan majikanne. Dait mule pelayan nike pasti gen nganjeng malik sẽngaq Allah sanggup piaq ie nganjeng.

⁵ Araq dengan saq merase bahwe araq jelo-jelo tertentu saq pentingan lẽman jelo-jelo saq lain, laguq araq ẽndah saq bedowẽ pendapet bahwe selapuq jelo pade doang. Alurang sopoq-sopoq dengan beranggepan menurut pikiranne mẽsaq.

⁶ Dengan saq mentingang jelo-jelo tertentu ie ngelaksaneang bagi Allah. Dengan saq ndẽq mentingang jelo-jelo tertentu ie ngelaksaneang ẽndah bagi Allah. Dengan saq ngelorang selapuq macem keloran, ie ngelaksaneang bagi Allah dait ie besyukur tipaq Allah. Maraq nike ẽndah dengan saq cume ngelor keloran tertentu doang, ie pade ngelaksaneang bagi Allah dait besyukur tipaq Ie.

⁷ Ndẽq araq sopoq dengan juaq lẽq antare ite saq idup umaq diriqne mẽsaq; dait ndẽq araq sopoq dengan juaq saq matẽ umaq diriqne mẽsaq.

⁸ Lamun ite idup, ite idup bagi Tuhan. Dait lamun ite matẽ, ite ẽndah matẽ bagi Tuhan. Jari, idup atao matẽ, ite dowẽn Tuhan.

⁹ Almasih sampun ninggal dait idup malik adẽq Ie jari Junjungan Saq Mulie umaq dengan-dengan saq idup dait dengan-dengan saq sampun ninggal ẽndah.

¹⁰ Jari, semeton-semeton, kembẽq side ngadilin semeton side pade saq seiman? Dait kembẽq side pade hine ie? Ite selapuq gen bareng-bareng ngadep tahte penghakiman Allah.

¹¹ Sẽngaq araq tetulis lẽq Kitab Suci, maraq niki manik Tuhan, "Demi idup Tiang, sebilang dengan gen sujut lẽq arepan Tiang, dait sebilang dengan gen ngaku bahwe Tiang Allah."

¹² Jari, ite sopoq-sopoq harus betanggung jawab lẽq selapuq perbuatante tipaq Allah.

¹³ Keranaq nike ite ndaq saling hakimin. Sebalikne turut hukum niki: Ndaq jangke miaq semeton side pade jari tegode dait bedose.

¹⁴ Tiang taoq lẽq dalem Junjungan Saq Mulie Deside Isa, dait yakin bahwe ndẽq araq sopoq hal saq najis lẽman diriqne mẽsaq; laguq lamun sopoq dengan anggep hal-hal nike najis, bagi dengan nike hal-hal nike najis.

¹⁵ Lamun napi saq side pade kelor nike jari nyakitin angen semeton side pade, artine perbuatan side pade ndẽqne atas dasar kasih. Sẽngaq Almasih sampun ninggal umaq ie, ndaq alurang semeton side pade nike teancurang siq napi saq side pade kelorang.

¹⁶ Keranaq nike ndaq alurang diriq side pade tepitnah mengenai napi saq solah lẽq side pade.

¹⁷ Sẽngaq Kerajaan Allah ndẽqne soal napi saq bau tekelorang dait teinem, laguq mengenai keadaan tejariang kenaq lẽq arepan Allah, damẽ sejahtere dait sukecite lẽq dalem Roh Suci.

¹⁸ Dengan saq ngelayanin Almasih maraq nike, nyenengang Allah dait tehargein siq dengan lain.

¹⁹ Keranaq nike silaq ite gawẽq napi saq datengang damẽ sejahtere dait saling neguqang iman.

²⁰ Ndaq lantaran soal keloran side pade nyẽdaq napi saq sampun tepiaq siq Allah. Selapuq hal nike suci; laguq lamun lantaran keloran side pade miaq dengan lain bedose, make side pade salaq.

²¹ Solahan side pade ndẽq ngelorang daging atao nginem anggur, atao ngelaksaneang napi juaq lamun hal nike miaq semeton side pade jari bedose.

²² Napi saq side pade percaye, pade tegel kepercayean nike jari diriqde mẽsaq lẽq arepan Allah. Bahagie dengan saq ndẽq hukum diriqne mẽsaq mengenai napi saq ie anggep solah.

²³ Laguq dengan saq merase ragu-ragu lẽq napi saq ie kelorang, ie sampun tehukum sẽngaq ie ndẽq ngelaksaneang hal nike atas dasar iman. Dait napi saq telaksaneang ndẽq atas dasar iman, nike dose.

Roma

Video Roma 14

Ikuti Kami:

KONTAK | PARTISIPASI | DONASI