Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Wali, a’i-a’i, i Pue Allah mamporayang kojo kita. Wali see naka aku mampaposiaka kita see kita damangawaika koronta resi Ia ewa pampue to tuwu. Ane ewa see koro ngkita mawali i Pue Allah Puenya, pasi pampue to ewa see mampakasanang kojo Ia. Wali pampue to etu masipato kojo kita mangawaika i Pue Allah.
2 Pasi ne’e kita mangalulu pampobuuka ntau pasi lengko ntau to taa mangaya i Pue. Pei anu kita mangabiaka i Pue Allah mangawaika kita pampobuuka to bou see rayanta darawali damawali bou seja. Apa ane ewa wetu kita maya mangansani pamporani i mPue Allah ri raya ngkatuwunta. PamporaniNya etu semo anu to matao pasi masilonga pasi to mampakasanang Ia.
3 Wali a’i-a’i, naka pei aku maya mampaposiaka komi apa yako kanoto i mPue Allah see naka Ia mangawaika aku mawali pomakauNya. Wali see naka aku mampaposiaka komi samparia samba’a pei samba’a. Paposia etu manganto’o, ne’e kita mangokotaka koronta yabimo yako to masipato. Pei anu kita mangika to kono kojo mangabotus koronta ngkalio singkonong pei pangaya to nawaika i mPue Allah kita samba’a pei samba’a, nempo wimba kabaenya pangaya to etu.
4 Wali kita to mangaya i Kerisitu maya raporapaka ewa koro ntau. Apa samba’a tau, ia samba’aja koronya pei saga ngkoronya etu boros. Pasi saga ngkoronya etu wungka yusa palaonginya.
5 Wali ewa see seja kita to mangaya. Kita boros pei kita mawali samba’a koro apa saba kita samba’a pei i Kerisitu. Pasi kita samba’a pei samba’a, kita roomo rapasimba’a mawali ewa saga ngkoro ntau.
6 Wali ane saga ngkoro ntau, wungka yusa palaonginya, wali ewa see seja kita. Kita samba’a pei samba’a nawaika i mPue Allah sora yako ri kanotoNya, pei sora to Ia mangawaika kita etu taa sewaju. Wali anu kita mangampake sora to nawaika i mPue Allah kita etu. Ane tau to rawaika kapande mamporata gombo i mPue Allah, to tao-tao ia mangika palaong to etu singkonong pei aya-ndaya to re’e resi ia.
7 Pasi ane tau to nawaika i mPue Allah mangansawang sa’e, to tao-tao ia mangansawang sa’e. Pasi tau to rawaika mampotunde sa’e, to tao-tao ia mampotunde sa’e.
8 Pasi ane tau to nawaika i mPue mampakaroso raya nsa’e, to tao-tao ia mampakaroso raya nsa’e. Pasi tau to rawaika mangansora sa’e, to tao-tao ia mangansora sa’e yako ri kabuya ndayanya. Pasi ane tau to nawaika i mPue Allah mawali ketua ntau to mangaya to tao-tao ia madota kojo mangika palaong to etu. Pasi ane tau to rawaika mangampolindo tau to ri raya ngkasusa, to tao-tao ia mangika palaong to etu ri kasanang ndayanya.
9 Wali ne’e dua-dua rayanta mamporayang sa’e. Anu kita mangandolika tangonta yako ri lengko to maja’a pei mangkongko kojo lengko to matao.
10 Anu kita mamporayang sa’e ewa taika mamporayang tua’i ngkoronta. Pasi anu kita pakadota mampobuuka sa’e to bae-bae angganya pei kita.
11 Ne’e kita mayoko mangika palaong to nawaika i mPue Allah kita pei pakadota kojo mangika palaong i mPue mangampake kuasa i Nosa Mapasing to re’e resi kita.
12 Anu kita masanang kojo mampobuuka samparia anu to danawaika i mPue Allah kita. Pasi anu kita mampakabae sabaranta ri raya ngkasesa, pasi pakadota makai-kai resi i Pue Allah.
13 Pasi ane re’e tau to i Pue Allah Puenya pei taa gana to napake nsira, anu kita mangantilaka sira anu to re’e resi kita. Pasi ane re’e tau rata, anu kita mampalinggona sira pasi mangawaika sira tampa danakayore.
14 Wali ane re’e tau to mangansesai kita, ne’e kita mangantanaa yau sira. Anu kita mampokaika sira see i Pue damangawaika sira rasi.
15 Ane re’e tau to ndende rayanya, anu kita ndende seja rayanta sindara-ndara pei ia. Pasi ane re’e tau to mawo rayanya, anu kita seja mengepe mawo rayanta sindara-ndara pei ia.
16 Anu kita tuwu masingkatao resi yunu ngkita samba’a pei samba’a. Ne’e kita mangei, pei anu kita masintuwu resi tau to taa bae angganya. Ne’e kita mampobuuka kita semo to pande-pande pei sa’e.
17 Wali ane re’e tau to mangika anu to maja’a resi kita, ne’e kita mamponsawak. Anu kita madota kojo mangika to matao ri pangkita ntau boros.
18 Ane re’e kasusa to mawali ri oyo ngkita ne’e kita semo to bo’onta masingkatao muni pei yunu ngkita. Anu kita rani tuwu masingkatao pei yunu ngkita samparia.
19 A’i-a’i anu kuporayang, ane re’e tau to mangika anu to maja’a resi kita, ne’e kita mamponsawak. Biakamo i Pue Allah semo mangahuku tau etu. Apa re’e ratulis nja’u raya ntuntu i mPue, to’onya, “‘Ojo Aku semo to masipato mamponsawaka palaong to maja’a. Wali Aku semo to damangabalas.’ Etu semo gombo i mPue Allah.”
20 Wali ne’e kita mamponsawak. Kasimbalinya yako etu, anu kita mangika matao resi balinta mangalulu tuntu i mPue to manganto’o, “Ane balimu moro komponya, waika ia pangkoni. Pasi ane ia mangau warokonya, waika ia anu to rainu. Apa ane komi mangika palaong to ewa wetu, sewaju pei komi ewa mamposaka-saka ruti to mawea ndate rapa mbo’onya.”
21 Wali ne’e kita mangabiaka anu to maja’a manganangi kita, pei anu kita mangika anu to matao see nangi yau anu to maja’a etu.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA