Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Ee, todipusile'to! Gaja napakamoja'ki' Puang Allataala, susi to kupaissenanmo kamu'. Iamo joo kupakainga' kamu' kumua la mipangben tongan to katuoanmi lako Puang Allataala susi karoba tuo to sipato' dipangben lako Puang. La susiri joo to passompami to nakabudai Puang Allataala.

² Danggi' mikaturu'-turu' bang lako tote'da naissen Puang Allataala. Ake'mo ia na Puang pemeloii to penawammi, ammiwa'ding nnissenni to pakkaeloran-Na, apa to melo na sukku', na apa to nakabudai Puang Allataala.

³ Kupakainga' kamu', nasaba' mangkamo' diben barakka' jio mai Puang Allataala menjaji rasulu': Danggi' misanga kalemi la'bi majao na ia to sitonganna. La miangga' to kalemi situru' pakullemi to napabarakkanan kamu' Puang Allataala, nasaba' kamatapparanmi lako Puang Isa Almaseh.

⁴ Ia to batang kale buda lesoanna. Na pada den patunna to simesa'-mesa' lesoan kale.

⁵ Susi toomi kita' sola ngasan. Moi budaki', apa butung to sangkalemiriki' na pada siparalluanki', nasaba' memmesa' penawamiki' sola Almaseh.

⁶ Pada nabenmiki' Puang Allataala mangrupa-rupa barakka' situru' kameloan penawan-Na. Iamo joo la tapake meloi to barakka' dibenki'. Ia ke barakka' mpau pepasan jio mai Puang Allataala dipatujuanki', la tapugauk situru' kamatapparanta'.

⁷ Ia to diben barakka' mangtulung, la napugauk tongan. Ia to diben barakka' mangngajahhi, la mangngajahhi tongan.

⁸ Ia to diben barakka' mangpamasumanga', la napugauk tongan. Ia to diben barakka' mangpangben, pasituru'i kamabassan. Ia to diben barakka' mangngamberan, la mangngamberan tongan. Na ia to diben barakka' kamamasean, la masannang mpugaukki.

⁹ La sipakamoja' tongan kamu'! Kaba'cii to kagajatan, mipengkulleii to kameloan.

¹⁰ Sipakamoja' kamu' susi to tosile'to, misitaratte' too.

¹¹ Danggi' makuttu njamai to jaman-Na Puang Allataala situru' pangpatujun-Na Roh Allataala.

¹² Pesannangngii penawammi nasaba' tomangrannuan kamu' lako Puang Allataala. Sabbara' kamu', ke nakanna kamu' kamasussan, ammimassambajang tarruh bang.

¹³ Parallu kamu' ntulungngi ke denni kaparalluanna padammi tomatappa', mitarima meloi lan bolami, moi na te'dapa misiissen.

¹⁴ Passambajanganni ke denni tau ssessa kamu', nabarakka'ii Puang Allataala, danggi' natampakkii ropu.

¹⁵ La pada parannu kamu' sola to toparannu, pada kamu' kumarrak ke denni to tokumarrak.

¹⁶ La mesa' penawa kamu'. Danggi' na den ssanga kalena tomajao, apa la siama' kamu' tomajiong. Danggi' misanga kalemi tomacca.

¹⁷ Danggi' mipasibalahhi kagajatan na kagajatan, pugaukki to nasanga tau melo.

¹⁸ Pengkulleii, ke wa'dingngi, misikalino ngasan tau.

¹⁹ Ee, todipusile'to! Danggi' lalo mimangpabalahhi. Ma'namo ia na Puang Allataala mpabalahhii. Nasaba' den diuki' lan Sura' Allataala kumua, "Nakua Puang Allataala, 'Aku' mpuissenni to mangpabalahhi, Aku'ra to wa'ding mpattantu pangpabalah.'"

²⁰ Sibalikanna, ia ke tangbarahhi to ewalimmi, benni kande. Ia ke mawakkei, benni wai. Nasaba' ia ke mipugaukki susi joo, napumasiri'.

²¹ Danggi' nataloi kamu' kagajatan, apa mpugauk kamu' kameloan ntaloi kagajatan.

Roma

Video Roma 12

Ikuti Kami:

KONTAK | PARTISIPASI | DONASI