Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Utat mita! Ki Allah totok mopia ko'i naton. Manangka intua aku'oi mopo'igum totok simbaí mo'ikow moposumbah in awakmu saḷaku sosumbah inta nobiag sing kopontingan i Allah. Sosumbah tatua in tongaíbií ogoi ko'i Allah bo inta mokosanang kong gina-Nya. Tuabií in ibadahmu inta sabanarnya.
2 Dona'ai im mo'ikow dumudui kon ibog in dunia na'a. Pomayakdon makow ki Allah im monombagu ko'i monimu, simbaí mobaḷui im mo'ikow. Sahingga ing kota'auandon monimu onu ko'ibog i Allah, tuata inta mopia bo inta mokosanang kon gina-Nya bo inta mosompurna.
3 Ki Allah nobogoidon in totabi-Nya ko'i-Nakoí. Manangka intua utat mita aku'oi mononggina ko'i monimu nana'a: Dona'aibií i mo'ikow morasa kon lebedon moḷantud nongkon ka'ada'anmu sabanarnya. Ta'e na'a in aidai: mokopo'ompaí kon raian bo nilaidon ing ka'ada'an monimu tontanií. Nilai ing ka'ada'an monimu tontanií podudui ing komampuan inta inogoi i Allah ko'inia, sin sia mopirisaya ko'i Yesus.
4 Awak naton na'a in nobayongbií anggotanya. Bo pomuḷoi in anggota tatua oyuíonbií tugasnya tontanií.
5 Natua doman ing kita. Umpakah kita nobayong, ta'e kita in toawakanbií monag, sing kita ain notobatuí ko'i Kristus. Bo kita komintan in noyoguputbií in tobatuí bo tobatuí saḷaku anggota in awak tobatuí.
6 Kita inogoianbií in totabi inta noyo-noyoposi. Totabi mita tatua inogoi i Allah ko'i naton pinoduduibií kon ibog-Nya. Manangka intua onu inta pinonotabi tatua mustibií pakeíon naton. Intau inta noko'ulií kon totabi mopohabar in habar nongkon i Allah, mustibií mopohabar in habar nongkon i Allah podudui ing komampuannya.
7 Intau inta noko'ulií kon totabi motuḷung kon intau ibanea, yo musti in sia totu-totu'u motuḷung kon intau ibanea. Intau inta noko'ulií kon totabi mobogoi in totunduí, daí musti in sia totu-totu'u doman mobogoi in totunduí.
8 Intau inta noko'ulií kon totabi mononggina kon intau ibanea, yo musti in sia totu-totu'u mononggina kon intau ibanea. Ki ine im mosila-silai makow kon yagi-yagi, yo musti totu-totu'u aidannya intua. Intau inta noko'ulií kon totabi mobalií itoi, yo musti in sia mobalií itoi totu-totu'u. Intau inta noko'ulií kon totabi moponyata in tabi kon tumpaḷa intau, yo mustibií aidannya intua takin sanang ing gina.
9 Kotabibií takin gina motulid. Poyayuk inta mora'at bo kadai kon onu inta mopia.
10 Utat mita, mo'ikow musti umuran mototabian tobatuí bo tobatuí naonda bo mogutat motoḷu adií kon tombonu im baḷoi, bo mosiuna'an mobogoi in hormat.
11 Tantu mokoporajing mogaid, dona'ai mokopomaḷas. Pogaid kon oaíidan i Tuhan takin somangat inta nongkon Roho i Allah.
12 Utat, poharapdon ko'i Tuhan takin ḷunganga ing gina, mokoposabar aka koaíntugan in susah, bo umuran posambayang.
13 Tuḷungai bo ogoiai onu im paraḷu in intau mita Keresten ibanea, bo tomubií takin pia ing gina in utat mita Keresten umpakahbií diaí nogoginta'auan monimu im mosia. Tarima doman takin sanang ing gina i mosia kom baḷoimu.
14 Po'igumdon ko'i Allah simbaí barakatan-Nya intau mita inta nomogutuí ko'inimu. Po'igumaibií kom barakat nongkon i Allah, dona'aibií mopogodi-godimai.
15 Koḷungangadon gina monimu takin intau mita inta nongoḷunganga doman ing gina, bo pongombaḷdon takin intau mita inta mongombaḷ.
16 Mo'ikow musti mobiag mototabian tobatuí bo tobatuí. Dona'ai momikir kon soaáḷ mita inta moḷantud, ta'e pikirbií in soaáḷ mita inta komampuan aidan. Dikabií tumekeng mopandoi ikow.
17 Aka intau mopoaíid im mora'at ko'inimu yo dona'aibií tuliíanmu im mora'at. Aidaibií onu inta inanggap mopia im bayongan intau!
18 Mo'ikow musti moramiji mobiag mopopia'an takin bayongan intau.
19 Utatku mita inta kotabiku, dona'ai im mo'ikow motaguí kon sakií ing gina bo moroncana monulií, pomayakdon makow bain ki Allah im motulií. Sing kom bonu im Buk Mosuci aim pinais nana'a: "Aku'oibií im motulií. Hukumon-Kubií in sia, guman i Tuhan."
20 Nana'a in aidai, aka gogoyon in saturumu yo ogoiai in sia ing ka'anon, aka moyogang in sia, yo ogoiai inumon sia. Sin aka tua in aidanmu, yo aidmu tatua im mokopo'oyakbiímai ko'inia.
21 Dika mo'ibog taḷowon im mora'at, ta'e ḷawangbií im mora'at tua takin aid inta mopia.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA