Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Ngaceku ineh, O kinanak-kinanakku, ngaceku ratnan éi' Allah kuan tau, ui mutuh nemuyuh maré burur muyuh mangun ku baré luk mulun idi luk linigan kuanNeh maya' pian Allah. Ineh sembayang muyuh luk matu.
2 Idi aleg muyuh maya' ayu lemulun bang tana' ini, iamo' ngisu' ayu muyuh dengan petuneb niat muyuh, pad muyuh miak kali' anun luk pian Allah, ieh ineh luk do' idi luk petulu idi luk meligan.
3 Ngaceku ratnan katu luk biré kuanku idi ui pebala kuan anid-anid lemulun, aleg ngerawé bururneh meluun ratnan terawé luk matu, iamo' do' ieh ngerawé dengan mebeneh niat maya' babpat anu luk bibpat Allah kuan anid-anid burur.
4 Ngaceku mepad kudeng sebuleng burur inan mula' babpat, iamo' baken amung-amungdeh mepad kekamen,
5 kudeng ineh teh tau luk mula' ini mangun ku sebuleng burur dengan Keristus, idi amung-amung tau inabet seburur kuan seburur, mepad kudeng tuda'-tuda' babpat bang sebuleng burur.
6 Ngaceku ineh do' tau makai baré tau luk baken-baken maya' katu luk biré kuan tau ineh. Kudeng tau inan baré mada' luk biré Allah, do' tau nganau' ineh maya' anu luk ilap tau.
7 Kudeng baré tau ineh ngasa' lemulun, do' tau ngasa' lemulun; kudeng mada', do' mada'.
8 Kudeng baré tau ineh ngubuk, do' ngubuk; kudeng maré, do' maré dengan mekatu. Kudeng iko mangun ku lun rayeh, do' iko megéi'; idi idé-idé luk méi', do' nganau' ineh dengan mawang niat.
9 Do' muyuh mawa dengan na siayu. Do' muyuh megateh inan luk dat, idi ngimet luk do'.
10 Do' mawa seburur dengan seburur, mepad kudeng kinanak-kinanak bang Keristus. Do' megéi' ngedita' nelun baken.
11 Do' muyuh mekél dengan na mekupé. Do' muyuh mepicet bang Roh dengan ngakem kuan Tuhan.
12 Do' mawang niat ngaceku rapet muyuh, idi mulai niat bang susa', idi lutep bang sembayang.
13 Maré petap kuan lun manu luk masi', idi megéi' ngasa' sakai.
14 Mutuh peruan kuan lemulun luk ngedereh nemuyuh. Mutuh peruan idi aleg ngediman nedeh.
15 Do' mawang niat dengan lemulun luk mawang niat, idi nangi' dengan lemulun luk nangi'.
16 Do' méi' kuan amung-amung lemulun. Aleg medita' niat, iamo' mawang niat ku kekamen luk mebeneh. Aleg ngerawé burur muyuh mileh.
17 Aleg ngua' dat lemulun dengan luk dat. Nganau' luk do' siren amung-amung lemulun.
18 Do' nganau' anun-anun luk petulu ruen muyuh, pad muyuh pedo' dengan amung-amung lemulun.
19 O lun rurumku, aleg muyuh sebuleng ngua', iamo' nima' Allah ngua'. Ngaceku pangeh inayud, "Ui ini luk ngua'; Ui ini sikal ngua', kebala Tuhan."
20 Iamo' maya' kudeng luk inayud, "Kudeng bunu'mu melau, do' maré luk kenenneh, kudeng ieh meparing, do' maré luk rupenneh. Ngaceku dengan kekamen luk kudeng ineh iko ngamung bareh apui pa luun uluhneh."
21 Aleg nima' luk dat ngelaya' namu, iamo' ngelaya' luk dat dengan luk do'.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA