Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Dangga dan deijidougwo yen deit, dendagai: Sug leng Israel loududa Allah dag gin terimdohob, kaba, en asid len laugwan dau en namcirohobei? Naro, Allah emerba men lusud gedig en ouci len dau acgunog naugb eninohob dau en touwero. Doba en medoc an len terimdaba. Anai dan toua dau leng Israel, dara Abraham medebeito dan, dara dani dau meijouhuda Benyamin toua. Augwan gini aimo dau areg lusud len log deb se Surad Injil Meb Mohon eisaugb Elias deb sug nosa touohob. Anai en, kaba, en ohobas leng Israel gini deseino Allah, endagai:
2 (11:1)
3 Adehsud, len lot aban boromei augwan baisoboro namcir. Dara emen gedig emen emesai ban aburo dou len, kaba, daninto dous eng dan indireseb gini. Doba len gus, kaba, len logod len laugwan lomomohob. Hang len lehilon ucina naugb sug len leic gomom dou dan toua.
4 Doba Allah en auni dagiro dou ena? En auni dou en, endagai: Lusud gedig dan insira akebin len deb, kaba, merug ribu senggai merugwengga ginaba. Anai len lemecguna dou seiseij, moho Bael, mougwa hom touebma. Doba len lasid lenin dau namcir. Yen yemecinaga gini dag misenbumei? Naro, yen yecinaga augwan gini dag misen touohob.
5 Dangga toua, iteitogin, kaba, Allah en mesira akebin merug hosa dau emeng Israel len ledag moro len toua merugwenggaba.
6 Dara sug en ouci len dag gini, kaba, en emaimo dau meren geicara dou en touwero. Doba en aimo dau areg en medoc eineg an len dous. Anai sug Allah mesira akebin len, aimo dau meren geicara dou en, kaba, en medoc geineg an len gin, kaba, emen dau en medoc mes dag misenero, doba dag augwougb dous.
7 Dangga areg graga augwan, kaba, men meijouhw dag gini. Ligbum dau emeng Israel gedig Allah ouci lenohob, kaba, len dous eng lehilon Allah men ucina naugb sug en eic gesgigouhwesa dou len ucugwohob. Doba len gus, kaba, en eic medoc agadgeij dou len, anai len lemaimo men ucina naugb sug en eic gesgigouhwesa dou len ucugb touwero. Doba len lehilon ucina dau sug len laimo Musa men gomnomna naugb Allah eic gesgigouhwesa dou len ucugb dous. Hang len lemesma touwero.
8 Augwan gini aimo dau areg lusud len log deb se Surad Injil Meb Mohon deb sug nosa touohob, lendagai: Allah eic len merdoc dara len meru toua dag emaiyero namcirohob. Dangga hang, dau sug aimougtut terimda edebeij iteitogin, kaba, len lemeiya dau men geicara dara len lemouman en mer touwero.
9 Dara Daud en toua erba Ugwaremer an meren geicara gini. Hanoba en enara dou Allah, endagai: Adehsud, len leic ara ara dag lauwaharo dou ban terimda. Hanoba len letara deseino ban toua. Doba dan dacgeij naugb ban beperwei areg len leic dou ban naugb lasijaresa ban dag gogomes dara digoro naugb lenin, dauntoba eica len merur mor namcir. Hanoba eic len merug erij ogdoc gin toua terimda. Dara dan dacgeij ban naugb ban beic len merdoc ebeigbogo dou len, dauntoba len lemecinaga meijouhw augwan asesa touwero, doba len meru edgom namcir. Hanoba ban beigdoumesa gogom medam debin len, dauntoba len meridgomori eninuan beb huhugb terimda toua.
10 (11:9)
11 Doba dan deijidougwo yen ucan gin deit, dendagai: Sug leng Israel letohob Krisdus dag ginohob, kaba, eic dag Allah eic mor mor dou len beb huhugb namcirohobei? Naro, en emeic mor mor dou len beb huhugb namcirbuma. Doba sug len lohoiya Allah en mer eisaugb Krisdus dag gin terimda, kaba, eic cumougt dou lugmahara, dauntoba Allah eigdoc len dau sesar men gogom aud maireseb menau geb huhugb gin toua. Allah eicara dangga, dauntoba sug men lusud leng Israel len leiya dau gin, kaba, len merdoc esdigeij lugmahara. Hanoba aic len naugb len merdoc ebdebin an Krisdus toua deit.
12 Doba sug meren geicara gedreg Allah en mer gin, kaba, eic dag en eic geigouhw aingma aingma dou lusud se cinogo augwan. Dara meren gotogoto Krisdus gin, kaba, eic toua dag Allah eic geigouhw aingma aingma dou lugmahara laugwan touohob, kaba, dagiro sug en eigdoumesa leng Israel len laugwan dag men lusud ucugb deita? Gini aninim dag en eic geigouhw aingma aingma edreg medam dau gin dou lusud laugwan se lona ingga toua.
13 Doba areg dan dog tainya gin, kaba, dan dog naugb yeng yugmahara yen dous. Anai Allah eigdoumesa dan indoho naugb dan desai Mer Geigouhw eisaugb Krisdus dou yenohob. Hang dan deigdoumesa dan indir an gini deseino lusud laugwan toua terimda.
14 Anai dan dod indina debsa dau sug indan lusud leng Israel len toua louman dau areg dan den dou yen gin, kaba, eic dag esdigeij len merdoc mes. Hanoba eic cumougt dou dan naugb dan dahwan hom yom dau len aud Allah. Dauntoba en eigdoc len dau sesar men gogom aud maireseb menau geb huhugb gin toua.
15 Anai sug Allah men gotogoto gini eic dag en eic gesgigouhwesa dou lusud se cinogo augwan ucugwohob, kaba, dagiro sug en eigdoumesa leng Israel dag men lusud gin deita? Men geigouhw dou maman gini, kaba, aninim dag lusud leisa dau gomom ucugb toua.
16 Anai sug Allah ouci len merjemouwer debinim naugb en sug aimougtutohob, kaba, eb naugb medebeitor len laugwan toua dangga. Aninim dau sug lusud leic roti mehir hom naugb lauwaharo dou Allah enohob, kaba, mougb geb augwan en men. Era sug len leic mom lauwaharo dou en, kaba, mesira augwan en men touohob.
17 Dangga Allah, kaba, en eigteh mesira aibibra dau sogo saitun misen gini. Hanoba en edeic mesira dau sogo saitun geb se lomesmes bad se sogo saitun misen gin touohob. Emeng Israel, kaba, dag sogo saitun gin mesira teisis. Doba yeng yugmahara, kaba, yen yedag sogo saitun geb se lomesmes mesira gini. Dangga hang, sug Allah eic yen bad se sogo saitun misen dag ginohob, kaba, geigouhw aingma aingma areg geb naugb emeng Israel, kaba, augwan eb naugb yen iteitogin touohob.
18 Sug Allah eic yen bad se saitun misen maga dag ginohob, kaba, yen yemehirirmo debin mesira gedig Allah eigteh dau maga misen gin touwero. Doba yen yowun yenin meigdoc mes arjaga an gin namcir. Anai yen yecinaga dag yen, kaba, yen yedag mesira. Hang mesira, kaba, emeic mohu dau mom touwero. Doba mom eng eic mohu dou mesira augwan dous.
19 Doba ligbum dau yeng yugmahara, kaba, yen yauni ucugb dou dan, yendagai: Allah eigteh mesira misen gin dau, hanoba en eic emen bad maga ucugb dougwo lendohob.
20 Indeic, areg yen yen gin, kaba, misen namcir. Doba len merdoc emebdebin an Allah mer eisaugb Krisdus ginero, hang en emeigteh len dau gini. Doba yen, kaba, yen meigdoc ebdebin an en mer eisaugb Krisdus ginohob, hang en emaic yen bemad maga misen gin toua. Dangga hang, yen meigdoc emagas an gin touwero. Doba yen yesa decicijahabi.
21 Anai sug Allah emamsoho mesira misen leng Yahudi ginero, doba en eigteh len dau, kaba, yen youdesa endag en amsoho yen debei? Naro, en emamsoho yen touwero.
22 Dangga hang, yen yemeiya dau sug Allah medoc eigouhw an lusud gin dousero. Doba yen yesa yeiya dau sug en medoc agadgeij dougwo lusud gin touahabi. Anai leng merdoc emebdebin an enero, doba len lotogoto en mer gin terimda, kaba, en medoc agadgeij an len namcir. Doba yen, kaba, en medoc eigouhw an yen. Anai yen yemotogoto en mer ginero, doba yen meigdoc ebdebin an en mer ginohob. Doba esloulougb naugb yen meigdoc ebdebin an en mer gin esesa terimda. Anai sug yen yeicara yaimo dangga, kaba, Allah medoc eigouhw an yen toua. Ga naro, kaba, Allah emamsoho yen touwero, doba en eigteh yen dau sogo maga misen gin toua namcir.
23 Dangga toua, leng Israel sug len lemotogoto en mer eisaugb Krisdus gin deitero, doba len merdoc ebdebin an en toua, kaba, Allah eic len bad maga se mohw dag nosa graga deit. Anai en mobisamougb edeinyum naugb ginohob.
24 Areg dan den dou yen graga, kaba, augwan men meijouhw dag gini: Yeng yugmahara, kaba, yen yedag mesira gedig Allah eigteh yen dau sogo saitun geb se lomesmes gin dous. Hanoba en eic yen bad se sogo saitun misen gin touohob. Doba emeng Israel, kaba, emen emedag mesira gedig Allah eigteh len dau sogo saitun misen gini. Dangga hang, naugb sug Allah eic emeng Israel bad maga ucugb se mohw deit, kaba, gini emagadgeij touwero, doba etetahaito namcir. Anai emeng Israel, kaba, dag sogo saitun misen men mesira teisisohob. Doba yeng yugmahara, kaba, yen yedag sogo saitun geb se lomesmes men mesira dous.
25 Dan indagunerij, dara dan indamouwerij, dan douwan decic dau aremer hom areg Allah esga dou danohob meijouhw augwan asesa dou yen deit. Dauntoba yen yemeigdoumesa yenin meijoho dag yen yecinaga aremer augwan eisaugb leng Israel gini touwero. Doba yen yarges dau gin namcir. Anai meijouhw hom gin, kaba, Allah emens dou sud hom ingma sug nosa touebma. Doba en ecgoneh dau len terimda iteitoginohob. Aremer hom dag gini: Leng Israel, kaba, len lemotogoto Allah en mer eisaugb Krisdus beb huhugb terimdero. Doba len leicara laimo dangga, terimda edebeij lona sug yeng yugmahara areg Allah ouci yen deb dau acgunogohob yen yaugwan yeinesa men uro mes ginahabi. Se lona ingga, kaba, len lemotogoto en mer eisaugb Krisdus gin toua deitero. Doba len toua merdoc ebdebin an Krisdus namcir.
26 Hang se lona ingga, kaba, sesar men gogom emeb naugb len toua deitero. Doba Allah eigdoc len dau sesar men gogom aud maireseb menau geb huhugb gin toua namcir. Augwan gini aimo dau areg Yesaya en og deb se Surad Injil Meb Mohon deb sug nosa touohob, endagai: Se lona daiyamo gacin, kaba, Sud Hom Geigdoc Leng Israel Dau Sesar Men Gogom Augwan, kaba, en emdagunya debin len dau cinogo Sion aud len toua. Se lona ingga, kaba, len lemotogoto Allah en mer toua deitero. Anai sud hom graga, kaba, en erba areg mog mog augwan dau Yakub medebeitor len laugwanohob. Dara Allah enin os dangga ogdoc Yesaya se Surad Injil Meb Mohon deb sug nosa touohob, endagai: Se lona sug dan doguc dougwo meren sesar augwan dau lenohob, kaba, se lona ingga dan daimo areg dan dos dou len merjemouwer ginohob augwan asesa an len toua.
27 (11:26)
28 Dangga icira yen, kaba, Allah owun leng Israel len meroho dag men moc, anai len lotogoto en Mer Geigouhw eisaugb Krisdus gin namcir. Doba icira len merjemouwer, kaba, en eigdoumesa leng Israel len meroho dag en mesir gin terimda. Anai en os dangga dou len merjemouwer sug nosohob.
29 Anai gareg Allah esedeb en naugb sug en eija en aud en, dara areg Allah en os dou lusud naugb sug en eic dou len, kaba, en emeperwei en medoc mes an gin touwero. Doba en aimo augwan gini an len terimda toua.
30 Dangga sug nosa, kaba, yeng yugmahara yen yedreg dau Allah en mer gin namcir. Doba sug leng Israel lotogoto Allah en Mer Geigouhw eisaugb Krisdus dag gin, kaba, eic dag en medoc an yen naugb en eic gesgigouhwesa dou yen ucugb, anai yen yaimo en mer eisaugb Krisdus ginohob.
31 Dangga toua, dau sug Allah medoc eineg an yen dag ginohob, kaba, eic dag leng Israel ledreg dau en mer gin toua namcirohob. Dauntoba se lona daiyamo gacin, kaba, Allah medoc eineg an len naugb en emdeic gesgigouhwesa dou len ucugb toues.
32 Anai sug nosa, kaba, Allah en amsoho lusud laugwan debin meren sesar namcir. Dauntoba sug len ledag sesar men sogougb dag ginohob, kaba, eic dag en medoc eineg an len laugwan ucugb toua.
33 Dangga hang, eigouhw naugb maman mamarges dau sug maman magahugouhw an Allah dara maigdoumesa en moho touwero. Doba maman maigdoumesa en moho beb huhugb namcir. Anai areg en eicara baimo an maman ginohob, kaba, gini ens dou maman dag en medoc eigouhw an maman beiseisaugb namcir. Dara ens ainyes dou maman toua dag en mou ouforoho naugb en ecinaga meijouhw dau augwan gin deb sug nosa touohob. Hang sud hom ingma, kaba, en emecinaga dau areg en ogod aga lusud, dara areg en aimo an len meijouhw augwan asesa touwero.
34 Augwan gini aimo dau areg len log deb se Surad Injil Meb Mohon deb sug nosa touohob, lendagai: Gareng en ecinaga Allah en mou, dara en esulou en an areg en ogod an, era eic men aremeij dou en naugb sug en oci ucugb dou en toua? Naro, sud hom ingmaro.
35 (11:34)
36 Anai enin dous eng ahasesei dara esinsin augwan. Hanoba en esedougwo dauntoba emedregim touwero. Doba augwan ec dara gesgiraha terimda. Dara areg en ahasesei dara esinsin gin, kaba, naugb sug enin moho aiga toua. Augwan gini asesa dag misen namcir.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA