Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Dage nungkun aku: Nggo kin itulak Dibata bangsa PilihenNa e? Tentu lang! Aku pe kalak Israel nge, kesusuren Abraham, janah i bas suku Benyamin nari.

² Labo itulak Dibata BangsaNa si nggo ItandaiNa nai nari. Tentu nggo ietehndu si tersurat i bas Pustaka Si Badia kerna Elia, asum ia ertoto ngaduken bangsa Israel man Dibata, nina,

³ "O Tuhan, nggo ibunuhna nabi-NabiNdu, janah nggo irontaskenna batar-BatarNdu. Aku nari ngenca tading, janah kesahku pe ibuatna atena."

⁴ Kuga nina Dibata ngaloi Elia? Nina Dibata, "Nggo Kuserapken man bangKu pitu ribu kalak si langa pernah ersembah man dewa Baal."

⁵ Bage me genduari enda: lit piga-piga kalak si tading si nggo ipilih Dibata erdandanken lias AteNa.

⁶ Dibata milih labo erpalasken kai si nggo ibahan kalak e, tapi erdandanken AteNa nge. Sabap adi erpalasken perbahanen manusia kin Dibata e milih, maka lias AteNa e lanai bo lias ate si tuhu-tuhu.

⁷ Kuga dage? Kai si idarami Israel la idatna. Tapi piga-piga kalak si nggo ipilih Dibata e ngenca si ndatsa. Si debanna e kerina ipemersik ukurna.

⁸ Bagi lit tersurat i bas Pustaka Si Badia, "Ibahan Dibata maka bene kal ukurna, janah seh paksa enda matana lanai erpengidah janah cupingna lanai erpemegi."

⁹ Bage me pe si ikataken Daud, "Mbera-mbera kerja si ibahanna jadi siding, jadi ragum, batu antuken ras ukumen man bana.

¹⁰ Mbera-mbera seleng matana gelah ula ia erpengidah; janah mbengkunglah ia rasa lalap ibahan kesusahenna."

¹¹ Nungkun ka aku: Asum kalak Jahudi tertuktuk nai, guling kin ia seh ampar? Tentu lang! Tapi erdandanken kalak Jahudi nggo erdosa, ibereken Dibata kesempaten e man bangsa si deban gelah mengga ate bangsa Jahudi nandangi bangsa si deban e.

¹² Bangsa Jahudi la patuh man Dibata janah la setia man BaNa. Si enda maba pasu-pasu man kerina bangsa-bangsa si deban i doni enda. Apai denga ka adi hubungen bangsa Jahudi ras Dibata jadi mehuli mulihken, tentu beliden ka pasu-pasu si ibereken Dibata.

¹³ Kukataken man bandu o kam kalak si labo Jahudi: Kidekah aku rasul guna kalak si labo Jahudi, megah kuakap i bas dahinku e.

¹⁴ Banci jadi ngasup aku erbahan bangsangku ermengga ate, gelah erdandanken si e ikelini Dibata ia deba-deba.

¹⁵ Sabap adi nggo itulak Dibata ia, doni enda jadi teman ras Dibata. Tapi kuga nge adi ialoken Dibata bangsa Jahudi e mulihken? Tentu si e bali ras si mate nggeluh mulihi.

¹⁶ Adi cimpa si pemena khusus ibereken man Dibata, maka kerina cimpa e pe jadi SikerajangenNa. Janah adi urat kayu ikhususken man Dibata maka dahan-dahan kayu e pe jadi SikerajangenNa.

¹⁷ Piga-piga dahan batang seton nggo itektek, jenari icangkokken ku batangna e sada dahan seton kerangen. Kam kalak si labo Jahudi iumpamaken bali ras batang seton si turah i kerangen e, janah genduari kam nggo ndat bagin si mehuli bagi si nggo inanami kalak Jahudi.

¹⁸ Emaka ula kam megombang man kalak si bali ras dahan si nggo itektek e. La kap lit dalanna maka kam megombang. Sabap kam dahan nge ngenca, labo kam natang urat-urat tapi urat-urat nge natang kam.

¹⁹ Tapi nggit me maka nindu, "Dahan-dahan e itektek gelah aku banci icangkokken ku batang e."

²⁰ Tuhu bage. Bangsa Jahudi e nggo itektek erdandanken la ia tek, tapi kam tetap leket i bas batang e erdandanken tek kam. Amin bage pe ula meganjang ukurndu kerna si e, tapi erkemalangenlah kam man Dibata.

²¹ Sedangken bangsa Jahudi pe la Dibata alang-alangen ngambengkenca, apai denga ka kam?

²² Dage teridah man banta uga belinna lias ate Dibata bage pe kuga Ia la alang-alangen ngukum kalak. La Ia mbiar ngukum kalak si nggo erdosa, tapi melias Ia man bandu adi tetap kam erbahan si ngena AteNa, gelah tetap kam ngenanami KiniulinNa; tapi adi lang, kam pe IambekkenNa nge.

²³ Janah kalak Jahudi, adi jera ia janah tek, icangkokken Dibata me ia mulih ku batang e, sabap Dibata ngasup nge erbahan si bage pe.

²⁴ Kam kalak si labo Jahudi bali ras dahan seton kerangen si nggo itektek, jenari icangkokken ku batang seton si ipiara. Si enda erlawanen ras kebiasan. Kalak Jahudi bali ras batang seton si ipiara; tentu sukahen nge iakap Dibata encangkokken mulihi dahan asli ku batangna jine.

²⁵ O senina-seninangku, gelah ula iakapndu beluh bandu, perlu kuakap ietehndu rahasia enda: Ukur kalak Jahudi labo mersik seh rasa lalap, tapi ngayak kuh bilangen kalak si labo Jahudi jadi anak-anak Dibata.

²⁶ Dage kerina nge pagi kalak Israel ikelini. Bagi lit tersurat i bas Pustaka Si Badia, "Si Engkelini e pagi rehna i Sion nari janah ImasapkenNa me kerina kejahaten kesusuren Jakup." "Nina Dibata,

²⁷ 'Kubahan me iketen padan ras ia, tupung Kualemi dosa-dosana.'"

²⁸ Erdandanken itulak kalak Jahudi Berita Si Mehuli, emaka jadi imbang Dibata ia, tapi si enda jadi keuntungen man bandu o kalak si labo Jahudi. Tapi erdandanken pilihen Dibata, kalak Jahudi e teman Dibata nge, erkiteken nini kalak Jahudi e.

²⁹ Dibata labo erkadiola adi Ia nggo milih dingen masu-masu.

³⁰ Bali nge ras kam nai, o kalak si labo Jahudi, nai la kam patuh man Dibata; tapi genduari erdandanken kalak Jahudi la patuh man Dibata nggo ialokenndu perkuah ate Dibata.

³¹ Bage me pe kalak Jahudi genduari la patuh man Dibata gelah arah perkuah ate si nggo ialokenndu e ialokenna ka perkuah ate.

³² Sabap kerina manusia la patuh man Dibata. Emaka lanai lit dalanna pulah ibahan Dibata. Si enda IbahanNa alu perayaken gelah banci IcidahkenNa perkuah AteNa man kerinana.

³³ Seh kal tuhu bayakna Dibata! Seh kal tuhu bagesna kepentaren ras PemetehNa! Ise kin ngasup nerangken keputusen-KeputusenNa? Ise ngasup ngikuti dalan si IdalaniNa?

³⁴ Bagi lit tersurat i bas Pustaka Si Badia, "Ise kin meteh perukuren Tuhan? Ise kin ngasup ngajarken Ia?

³⁵ Ise kin pernah mere man BaNa gelah ndatken balasen i bas Ia nari?"

³⁶ Sabap kerina si nasa lit Dibata njadikenca, janah kerina e lit erdandanken Ia dingen man GunaNa. Terpujilah Dibata seh rasa lalap. Amin.

Roma

Video Roma 11

Ikuti Kami:

KONTAK | PARTISIPASI | DONASI