Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Idi ui ngitun, "Pangehké Allah nenala' pupuNeh ineh?" Na tu-tu! Ngaceku ui ini lun Israil teh, luk inul Ibrahim, ratnan inul Beniamin.
2 Allah na nenala' pupuNeh luk pinili'Neh atun. Muyuh kali' bala Surat Allah ratnan Elia, kudeng apeh ieh nengadu' pupu Israil pa kiung Allah?
3 "O Tuhan, nabi-nabiMu pangeh pinatédeh, idi amung-amung bubpunMu pangeh tibpa, pad ui mo' luk ketecan, idi ideh nutun ngaté negku."
4 Anunké or Allah neneh? "Ui pangeh nenecan kuanKu tudu' ngeribu lun deléi luk nateh netekeradung inan akang Baal."
5 Kudeng ineh teh nekini pana' inan sebuang luk pinili' ngaceku katu Allah.
6 Iamo' kudeng ratnan katu, idi baken ratnan kekamen lemulun, ngaceku kudeng ratnan kekamen ineh, katu ineh baken katu peh.
7 Kudeng apehké ilungneh? Luk tikap pupu Israil ineh na ideh miak ngalap; iamo' lun luk pinili' pangeh nengalap ineh, iamo' lun baken ineh mebengel ratnan tawar Allah.
8 Maya' kudeng luk inayud, "Allah nenganau' niat idi terawédeh meberat pad macing aco sini ideh na miak nier dengan matehdeh, idi ninger dengan laliddeh."
9 Kudeng ineh teh bala Daud, "Nima' iraudeh mangun ku aceh abpung; pad ideh mebpeh idi kumin!
10 Nima' matehdeh ruen ngesaweng, pad ideh na miak nier, idi keteddeh megéi tebukut."
11 Ui ngitun teh: Inanké lun Yahudi netebaceng pad ideh mebpehké? Na tu-tu! Iamo' ebpehdeh ineh ngacing ulun kuan lun pupu baken, pad nganau' pupu Israil mét niat.
12 Ebpeh lun Yahudi ineh nengacing peruan kuan uang tana' ini, idi asi'deh ineh nengacing peruan kuan lun pupu baken. Meluun teh kareb kinula' lun Yahudi pangeh petap!
13 Nekini ui pebala kuan muyuh lun pupu baken: Seruked ui mangun ku rasul kuan lun pupu baken, ui ngubur kekamenku,
14 pad ui miak nganau' inulku lun Yahudi mét niat, idi nguit sebuangdeh macing inan ulun.
15 Ngaceku kareb ideh tila', tana' ini pedo' dengan Allah. Kudeng apehké kareb ideh lapen Allah? Kali' rungen inan ulun rat arang lun naté!
16 Iamo' kudeng sengeragam luk atun ineh biré kuan Tuhan, idi kudeng ineh teh tebalu' luk rayeh ineh pana' Tuhan kuan. Idi kudeng uat ineh biré kuan Tuhan, kudeng ineh teh angat-angatneh ineh pana' Tuhan kuan.
17 Sebuang angat pangeh tingal, idi muyuh lun pupu baken mepad kudeng aceh angat saitun pulung luk kinawin luun ineh, pad ngalap babpat ratnan uat lawa saitun ineh luk mepanu' ku para'.
18 Aleg iko medita' niat ratnan angat-angat ineh. Iamo' kudeng iko ngedita' bururmu pana', ngerawé do'-do', baken iko luk ngimet uat ineh, iamo' uat ineh luk ngimet namu.
19 Iamo' iko sikal pebala, "Angat-angat ineh pangeh neputul, pad ui ini miak uen ngawin luunneh."
20 Matu, ratnan na manu, angat-angat ineh neputul peh, iamo' iko ini lutep ngaceku manu. Aleg iko medita' niat, iamo' do' iko matot.
21 Ngaceku kudeng Allah na méi' kuan angatneh sebuleng, kali' rungen Ieh na méi' namu.
22 Ngaceku ineh ngerawé ratnan katu idi tueh Allah; ieh ineh tuehNeh kuan lemulun luk pangeh nebpeh, iamo' katuNeh namu, kudeng iko lutep bang katuNeh. Kudeng na, idi iko pana' miak uen nangal.
23 Iamo' lun Yahudi pana' miak uen ngawin, kudeng ideh nginuud ratnan na manu, ngaceku Allah melalud ngawin nedeh teh.
24 Muyuh lun pupu baken mepad kudeng angat saitun pulung ineh luk tingal, idi kinawin luun lawa saitun luk isa'. Lun Yahudi ineh mepad kudeng lawa saitun luk isa', idi meluun alé kuan Allah, ngawin angat-angat luk tingal ineh luun lawadeh sebuleng.
25 Inan luk inalum, O kinanak-kinanakku, luk ui pian muyuh kali', pad muyuh na ngerawé burur muyuh mileh, ieh ineh, tueh niat lun Israil na meruked, pad kinula' lun pupu baken luk amé' nan Allah petap.
26 Kudeng ineh lawéneh amung pupu Israil miak uen ngulun, maya' kudeng luk inayud, "Lun Ngulun ineh miak macing rat Sion. Ieh sikal ngado luk dat ratnan inul Yakub.
27 Idi ini pejani'Ku nedeh, kareb Ui maré do' ratnan sala'deh."
28 Ngaceku ideh na pian ku Bala luk Do', lun Yahudi mangun ku bunu' Allah ngaceku muyuh lun pupu baken. Iamo' ngaceku pili' Allah, ideh mangun ku rurumNeh ngaceku tepundeh.
29 Ngaceku Allah na nginuud ratnan luk barénNeh, idi ratnan tawarNeh ineh pana'.
30 Ngaceku atun muyuh ini ngelaba bala Allah, iamo' nekini muyuh ngalap éi' ngaceku ratnan pupu Israil ngelaba bala ineh.
31 Idi kudeng ineh teh lun Yahudi nekini ngelaba bala Allah, idi ngaceku éi' luk bida' kuan muyuh ineh, idi ideh pana' nekini ngalap éi' teh.
32 Ngaceku amung-amungdeh biré Allah inan luk ngelaba bala, pad Ieh miak méi' kuan amung-amungdeh.
33 Kudeng apeh kirayehneh, ieh ineh do' idi ileh idi luk kali' Allah! Idéké miak ngelio luk uenNeh mutut. Idéké luk kali' luk ruenNeh?
34 Maya' kudeng luk inayud: "Idéké luk kali' terawé Tuhan? Idéké luk miak mada' Neneh?
35 Idéké luk pangeh nemaré anun-anun kuanNeh, pad Ieh miak ngua'?"
36 Ngaceku luk amung-amung pangeh pinudutNeh. Idi luk amung-amung mangun rat Neneh idi kuanNeh. Ngubur Neneh macing ruked-ruked! Amin.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA