Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Jadi, berimbamo? Alatala nompoara todeaNa *toYahudi? Natantumo ledo! Apa yaku mboto toYahudi, muli i Abraham, bo lako ri lunu muli i Benyamin.

² Alatala ledo nompoara todeaNa anu nipelisiNa lako bara ipiame. Toramo tesa Nabi Elia nitulisi ri Buku Gasa. Tempo ia nompangadu toIsrael ri ngayo nu Alatala niulina ivei:

³ "Pue, *nabi-nabiMiu nipatesira, bo Lanta PesombaMiu nigerosiramo. Damo saitoku hii nabi naboli, bo ira nompasimbuku mompatesi yaku muni."

⁴ Toramo pesana nTupu ivei: "Ledo aga saitomu. Da nariapa pitu-njobu topangoseaka Yaku. Ira niboliKu majadi bagiaKu mboto. Ira ledo sanggani nombasomba viata Baal."

⁵ Ivesia muni sii-sii. Nau damo deanapa toYahudi ledo nomparasaya i Yesus, naria muni sanu nomparasaya sabana iramo nipelisi nu Alatala lako ri nggauluname majadi bagiaNa. Ira nipelisiNa sabana kabelo nu raraNa

⁶ ledo sabana pokainggura. Apa ane rapana Alatala mompelisi tona sabana pokainggura nabelo, batuana, ledo lako ri kabelo nu raraNa mpuu nipelisiNa.

⁷ Jadi, kambukuna, todea toYahudi nadota najadi nanoa ri panggita nu Alatala, tapi ledo nikavara anu nielora. Topanggavana aga sakide, haitumo tona nipelisi nu Alatala. ToYahudi ntanina aga najadi nakaa bagara.

⁸ Evamo nitulisi riara Buku Gasa ivei: "Alatala nompakakumba pekirira. Ia nompakaburo matara sampe ledo nipakulera manggita dala nakana, bo Ia nompakabongo talingara sampe ledo nipakulera mangepe pepatuduki nakana sampe sii-sii."

⁹ Bo Magau Daud muni nantesaki toYahudi anu ledo nomparasaya ivei: "Pue, kuperapi pura-pura anu niporasa ntona hitu majadi tolia ka ira, sampe ira rapambela silaka bo pehuku, pobalasi pokainggura nadaa!

¹⁰ Pakaburo pekirira sampe ledo mamala rakitara dala nakana. Bo pakandasamo ira sampe ira bate-batena mabundu nte kasusara!"

¹¹ Jadi, deanapa toYahudi nanavu sabana ira ledo nomparasaya. Tapi nee rapekirimiu ira nanavu sampe ri kasae-saena! Ledo ivesia patuju nu Alatala! Lako ri pesapuaka ntoYahudi haitu, tona ledo toYahudi nanggava loga momparasaya bo rapakasalama. Kaupuna, toYahudi masiriati manggita ira apa ira muni madota rapakasalama.

¹² Deanapa toYahudi nesapuaka bo nompoara i Kristus. Sabana haitu, nadea tona ledo toYahudi nanggava belo lako nte Alatala. Jadi, ane tona ntanina nanggava belo sabana pesapuaka ntoYahudi, nemopa ane toYahudi majea bo momparasaya! Natantu melabi kadea belo rakavara.

¹³ Sii-sii kupambela tesaku hitu ka komiu, tona ledo toYahudi. Yakumo hii *suro i Yesus anu nisuroNa manggeni Kareba Belo ka komiu tona ledo toYahudi. Bo pokarajaaku haitu nirekeku nabelo mpuu.

¹⁴ Apa nisarumakaku maria sanu sampesuvuku toYahudi masiriati manggita komiu, sampe ira muni mamala kukeni momparasaya i Yesus bo rapakasalama.

¹⁵ Apa tempo Alatala nompoara toYahudi, dala nibuka ka pura-pura tona ntanina ri dunia rapoposinggabelo mpanjili ante Alatala. Jadi nelabipa kabelona ane toYahudi ratarima nu Alatala mpanjili! Apa kajadia haitu masimbayu mpo tona namate matuvu mpanjili!

¹⁶ Ane santubi roti niala ntani ruru bo nidekei ka Alatala, nasimbayu mpo pura-pura roti haitu nidekei ka Alatala. Bo ane kale nu kayu nireke Alatala tupuna, batuana tinggu-tingguna muni Ia tupuna. ToIsrael nggaulu nireke Alatala tupura, ivesia muni, muli ntoIsrael nireke Alatala tupura.

¹⁷ ToYahudi namala nirapaka kayu *zaitun nipiara nu Alatala. Bo sanu tingguna nikotosi nu Alatala. Komiu tona ledo toYahudi anu nomparasaya i Yesus, nirapaka tinggu-tinggu lako ri kayu zaitun anu ledo nipiara. Tinggu-tinggu haitu niala nu Alatala bo nipatakaNa ri bela ntinggu nikotoNa pangane ala tinggu-tinggu nabaru haitu matuvu bo movua lako ri kayu nipiaraNa. Ivesiamo komiu nantarima belo lako nte Alatala, nasimbayu mpo belo nitarima ntoYahudi nggaulu.

¹⁸ Jadi, sampesuvu-sampesuvu, nee malanga raramiu manggita toYahudi anu nipoara mpo tinggu nikoto pangane. Toramo! Komiu mboto nasimbayu mpo tinggu. Ledo tinggu nompakatuvu kalena tapi kalena nompakatuvu tingguna.

¹⁹ Bara raulimiu ivei: "Tinggu-tinggu pangane nikoto ala kami mamala rapataka ri belana."

²⁰ Haitu nakana mami, tapi toramo, ira nipoara sabana ira ledo nomparasaya, bo komiu nitarima sabana komiu nomparasaya. Jadi nee malanga raramiu, agina komiu maeka!

²¹ Apa ane Alatala nompoara toYahudi anu nirapaka tinggu nu kayu mami, nee rasarumakamiu Ia ledo mompoara komiu ane ledo raparasayamiu!

²² Jadi lako rahaitu nisanita kabelo rara nu Alatala, bo nisanita Ia nasadia mombahuku. Ia nombahuku topesapuaka, tapi nabelo raraNa nte komiu anu nomparasaya, asaa komiu maroo manjarumaka kabeloNa haitu. Ane ledo, komiu muni rapoaraNa!

²³ Ane ira toYahudi domo mombasapuaka Alatala tapi majea bo momparasaya, ira ratarima nu Alatala mpanjili. Bo Ia nakuasa mantarima ira mpanjili.

²⁴ Komiu tona ledo toYahudi nasimbayu mpo tinggu kayu anu ledo nipiara. Naupa ivesia, komiu nipataka ri kayu nipiara. Jadi ane tinggu kayu ledo nipiara namala rapataka ri kayu nipiara, natantu tinggu kayu nipiara mamala rapataka mpanjili ri batana mboto.

²⁵ Sampesuvu-sampesuvu sampomparasaya! Ledo mabelo malanga gaga raramiu. Jadi yaku madota ala rasanimiu nia nu Alatala anu dopa nisani nu manusia nggaulu, haitumo, anu majadi nte toYahudi. Sii-sii nadea *toIsrael nakaa bagara bo ledo nomparasaya. Tapi kakaa bagara haitu aga sampalai, sampe magana kadea ntona ledo toYahudi anu momparasaya i Yesus.

²⁶ Jadi maupu sia pade rapakasalama pura-pura toIsrael. Kajadia haitu nitulisi ri Buku Gasa ivei: "Makava tempona Magau anu Mompakasalama manusia makava lako ri Bulu Sion, bo rapakalipoNa pura-pura kadaana lako ri muli i Yakub .

²⁷ Bo haitumo pojanjiKu nte ira tempo Yaku mombaampungi dosa-dosara."

²⁸ Sii-sii toYahudi nireke bali nu Alatala sabana ira ledo nadota nomparasaya Kareba Belo. Bo haitumo anu nanggeni belo ka komiu tona ledo toYahudi. Tapi naupa ivesia, toYahudi da nipotove nu Alatala, sabana Ia nompelisi ira nggaulu majadi todeaNa, bo kana nitoraNa pojanjiNa nte totuara nggaulu.

²⁹ Apa ane Alatala nompelisi bo nombadekei belo ka tona, ledo raalasiNa mpanjili belo haitu.

³⁰ Bara ipia komiu tona ledo toYahudi ledo natundu nte Alatala. Tapi sii-sii komiu nipoasiNa bo niampungiNa sabana pesapuaka ntoYahudi.

³¹ Ivesia muni toYahudi. Sii-sii ira ledo natundu nte Alatala ala komiu rapoasiNa bo raampungiNa. Tapi makava tempona bara maipia, ira muni rapoasi nu Alatala nasimbayu mpo komiu.

³² Alatala nompakalanto pura-pura manusia nesapuaka bo masipato rahuku, ala Ia mamala mompoasi bo mombaampungi pura-pura manusia.

³³ Nambaso mpuu kabelo nu Alatala! NotoNa bo pangisaniNa ledo ria pantaana! Ledo ria saitoa nompakule mombapaha pobotusiNa, atau mompakalanto anu nipoviaNa.

³⁴ Riara Buku Gasa nitulisi ivei: "Isema nangisani pekiri nu Alatala? Isema mompakule mompatuduki Ia?

³⁵ Isema nombadekei sangaya ka Ia sampe Ia masipato mompopanjili ka ira balasina? Natantu ledo ntoto ria!"

³⁶ Apa pura-pura nuapa naria, nopuna lako nte Alatala bo natuvu lako ri kuasaNa bo Iamo Tupuna. Iamo masipato ratoiya bo rabilata sampe ri kasae-saena! Amin!

Roma

Video Roma 11

Ikuti Kami:

KONTAK | PARTISIPASI | DONASI