Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Dob ai roh ma sada humbani malekat na pitu ai, na manjolom batil na pitu ai, marsahap ma ia hu bangku, nini ma, “Roh ma, ase hupatuduhkon bam uhum bani boru jalang na banggal ai, na hundul bani bah na mabuei ai.
2 Hasomanni marbangkis do raja-raja ni tanoh in, anjaha mabuk do ganup pangisi ni dunia on ibahen anggur parbangkisonni ai.”
3 Jadi iboan ma ahu ibagas tonduy hubani sada halimisan. Jadi huidah ma sada naboru, hundul bani sada binatang sigerger, na gok bani goran panrisaion, pitu do uluni anjaha sapuluh tandukni.
4 Ia pakeian ni naboru ai hiou saholat pakon hiou hasumba do, na ilampis bani omas, intan pakon mutiha; adong do bani tanganni panginuman omas, gok marisi hagigi pakon habutakon ni parbangkisonni.
5 Bani pardompakanni tarsurat do sada goran na marrusia: Babel na banggal in, inang ni sagala parbangkison pakon hagigi na i tanoh on.
6 Jadi huidah do naboru ai mabuk ibahen daroh ni halak na mapansing ampa daroh ni saksi-saksi ni Jesus. Longang tumang do uhurhu mangidahsi.
7 Gabe ihatahon malekat ai ma dompak ahu, “Mase longang uhurmu? Hupatugah ma hu bamu rusia ni naboru on pakon rusia ni binatang na mambobansi ai, na marulu pitu anjaha na martanduk sapuluh ai.
8 Ia binatang na nididahmai, na manggoluh do ai hinan, sonari lang be, anjaha naik ma ai use hun ruang partoruh ai, laho masuk hu hamagouan; anjaha sagala pangisi ni tanoh in, na so tarsurat goranni bani buku hagoluhan humbani tombei ni dunia on, longang ma mangidah binatang ai, na dob dong hinan, sonari seng dong be, hape roh use.
9 Ibagas on porlu do pangarusion na marhasoman hauhuron! Na pitu ulu ai, ai ma pitu dolog, na hinundulan ni naboru ai, anjaha pitu raja do ai.
10 Lima hunjai domma madabuh, na sada adong ope, na sada nari lang roh ope; anjaha anggo roh, tongkin do hansa ia adong.
11 Ia binatang na adong hinan, anjaha sonari seng dong be, ai do na paualuhkon, anjaha humbani na pitu ai do ai, anjaha na laho ma ia hu hamagouan.
12 Ia na sapuluh tanduk nididahmai, ai ma sapuluh raja, na so manjalo harajaonni ope. Tapi jaloon ni sidea do kuasa songon raja-raja sajam dokahni rap pakon binatang ai.
13 Sauhur do sidea anjaha ibere sidea do gogoh pakon kuasa ni sidea bani binatang ai.
14 Marmunsuh ma sidea dompak Anak ni biribiri in, tapi taluhononkon ni Anak ni biribiri in do sidea; ai Ia do Tuhan ni sagala tuan anjaha Raja ni sagala raja. Halak na rapkonsi ai pe monang do, ai ma sagala na nidilo, na pinilih anjaha na porsaya.”
15 Dob ai nini ma dompak ahu, “Ia sagala bah na nididahmai, na hinundulan ni boru jalang ai, ai ma bangsa-bangsa, halak simbuei, suku pakon hata.
16 Ia tanduk na sapuluh ai, na nididahmai, pakon binatang ai, domdoman ni sidea ma boru jalang ai, lungunan ma bahenon ni sidea ia anjaha talanjang, panganon ni sidea ma dagingni, anjaha tutungon ni sidea ma ia bani apuy.
17 Ai ipuhoi Naibata do uhur ni sidea, laho pasaudkon sura-sura ni uhur-Ni, laho pasadahon sura-sura ni sidea, laho mangondoskon harajaon ni sidea bani binatang ai, ronsi saud hagogok ni hata ni Naibata.
18 Ia naboru na nididahmai, ai ma huta na banggal in, na manggomgomi raja-raja na i tanoh on.”
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA