Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Idi seburur rat arang tudu' melaikat ineh luk nenguit tudu' bigan ineh iné' negku idi nepebala, "Amé' tungé, ui sikal mada' kuanmu ukum kuan decur luk pelaba sawa', ieh ineh bawang rayeh luk pinudut muneng ku abpa' luk mula'.
2 Raca'-raca' bang tana' ini pangeh nepasét neneh, idi amung-amung uang tana' pana' mabuk ku abpa' anggur sawa'neh ineh."
3 Idi ui tigio Roh, idi melaikat ineh nenguit negku amé' déi' su luk ali-ali. Idi ui nenier seburur decur tudo luun keted pung luk mesia', luk mepanu' ku ngadan kuyo, idi luk inan tudu' uluh idi pulu' unga.
4 Idi decur ineh nengayung ku ayung luk sia' merirem idi luk mesia', idi nengayung ku amas idi batu luk meraga idi mutiara. Idi bang paladneh inan sebuleng sangkir ratnan amas luk mepanu' ku amung-amung bebpeng idi lutak sawa'neh ineh.
5 Idi luun madu'neh inan aceh ngadan luk inayud, ieh ineh, luk inalum, "Babil luk rayeh, tinan amung-amung sawa' idi amung-amung bebpeng luk bang tana'."
6 Idi ui nenier decur ineh mabuk ku dara' amung-amung lun manu idi dara' amung-amung lun nekali' Yésus ineh. Kareb ui nenier neneh ui pelaba awa.
7 Idi kebala melaikat ineh negku, "Anunké punneh iko mawa? Ui sikal mada' kuanmu luk inalum ratnan decur ineh, idi luk inalum ratnan pung luk nguit neneh ineh, idi luk inan tudu' uluh idi pulu' unga.
8 Idi pung luk siniermu ineh, ieh idi atun, iamo' nekini na idi; ieh sikal umak rat bang lubang luk na miak teriin kidalemneh ineh, idi semuet bang ukum até. Lemulun bang tana' ini, luk na inayud ngadandeh bang surat ulun ineh rat pun-pun tana' ini, miak mawa kareb ideh nier pung ineh, luk idi atun, iamo' nekini na idi, idi luk sikal macing teh.
9 "Pad kali' ilung ini na miak na inan ileh. Tudu' uluh ineh mangun ku tudu' pegkung su luk inan decur ineh tudo, idi ini teh mangun ku tudu' raca'.
10 Limeh pangeh nebpeh, seburur teh ketecan, idi sebuleng teh luk nateh nacing. Idi kareb ieh macing na miak na ieh tudo sesuut io teh.
11 Idi pung luk pangeh idi, idi luk na idi nekini, ieh luk mangun ku luk kewaluh, idi luk iniap kuan luk ketudu' ineh, ieh teh luk miak semuet bang ukum até.
12 "Idi pulu' unga luk siniermu ineh, ieh ineh pulu' raca' luk nateh nengimet, iamo' ideh nengalap lalud mepad kudeng raca' pad-pad dengan pung ineh bang sejam mo' kinioneh.
13 Idi pulu' raca' ineh sebuleng terawé idi ideh maré tuehdeh idi laluddeh kuan pung ineh.
14 Ideh miak pebunu' inan Anak Dumba ineh, iamo' Anak Dumba ineh miak ngelaya' nedeh, ngaceku Ieh Tuhan pa luun amung-amung tuan, idi Raca' pa luun amung-amung raca'; idi amung-amung lemulun luk idi pad-pad denganNeh ineh metueh, ieh ineh amung-amung lemulun luk pangeh tinawar idi luk pinili' idi luk lutep."
15 Idi kebala melaikat negku, "Abpa' luk siniermu ineh su luk inan decur luk mesawa ineh tudo, ieh ineh tuda'-tuda' inul, babpat, pupu, idi buri'.
16 Idi pulu' unga luk pangeh siniermu ineh idi pung ineh pana', miak megateh inan decur luk mesawa'; idi ideh miak ngalap amung-amung binawehneh, pad ieh lubpa. Ideh miak kuman uangneh, idi ngeseb neneh ku apui.
17 Ngaceku Allah nenuet terawé bang niatdeh, miak nganau' luk pian Allah, idi ideh mangun ku sebuleng terawé, idi maré kekamendeh ineh kuan pung ineh, pad bala Allah ineh miak meriput.
18 "Idi decur luk pangeh siniermu ineh, ieh ineh bawang rayeh, luk ngimet amung-amung raca' bang tana' ini."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA