Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Ge'enaka de tamake 'o sorogaaka 'o no-nako 'ihera-herangi gee ko biasawa ge'ena la 'o mala'ekati ngai tumudiingoka de 'o bodito gee ma du-du'uruoka 'o rupa tumudiingi. De ma bahaya ge'enau 'idadioka de ma Jo'oungu ma Dutu womatogumokau wongamo 'o nyawaka.

² Ge'ena 'ipasa de tamake 'okia naga 'isoka 'o ngooto matero ka 'o kaca, 'imakaganuku de 'o 'uku. Takimake mita 'o nyawa-nyawa gee yolakuokau ma ngale koyomote-motekuwa 'o haewani de ma patongo, ge'ena la 'o haewani gee ma ronga 'isinono-nako de 'o do-doimi. 'O nyawa-nyawa go'ona yoma'okode 'o ngooto gee matero ka 'o kaca ma batingoka de ya'aono 'o koroncong gee ma Jo'oungu ma Dutu wakikulaka,

³ de 'ona yosinyanyi 'o Musa 'awi nyanyi. 'O Musa 'una ge'ena ma Jo'oungu ma Dutu wile-leleani. Mita yosinyanyi 'o Domba ma Ngowaka wi nyanyi, ma betongo konee, "Jou, Jo'oungu ma Dutu 'ani kuasa 'ifoloi 'iamoko; 'o sagala moi-moi nodi-diai ge'ena posironga ko biasawa de 'ihera-herangi. Ngona 'o sagala bangsa ma Koana de posironga 'iloa de 'itiaioka 'o sagala moi-moi nodi-diai.

⁴ Jou, 'o nyawa 'iodumu 'asa nihoromati, de nisiarene yongose 'ato 'ani kuasa ma batingi koi'iwa de 'ani singina posironga 'isureka! Ka ngona duga notebini. 'O sagala nyawa 'o duniaka 'asa yoboa nisuba sababu 'ani manarama gee 'iti-tiai 'o nyawa 'iodumu yamakekau."

⁵ Ge'ena 'ipasa de 'o sorogaaka tamake ma Jo'oungu ma Dutu wi Woa, de ge'ena ma dodaka to 'una 'awi ngii gee wodo-doboa.

⁶ De 'o mala'ekati ngai tumudiingi de 'o bahaya 'o rupa tumudiingi ge'ena 'isupu 'o Woano gee ma Jo'oungu ma Dutu wodo-doboa ge'ena. Ma mala'ekati 'iodumu ge'ena ma baju ya'are-'arese, 'isure-sure de 'ileto-letongo, de 'imasisakolaku 'o sakola 'o guraci.

⁷ Ge'enaka de 'o barangi 'i'ahu-'ahu ngai soata gee, 'o ngai moi 'ikula 'o mala'ekati ngai tumudiingika 'o sawoko 'o guraci ngai tumudiingi. Ma sawokoka ge'ena ma Jo'oungu ma Dutu gee wo'ahu kaisi'ado-'adonika wosi'oma-'omanga 'o hukumani 'itu-tubuso.

⁸ So 'o Woa gee ma Jo'oungu ma Dutu wodo-doboa ge'ena 'o dowo yasaono sababu ma Jo'oungu ma Dutu 'awi kumati de wi kuasa. De ma do'ingo 'o bahaya 'o rupa tumudiingi gee 'o mala'ekati ngai tumudiingi 'i'asa-'asa koitogumuawasi, komoiwa moi 'idadi yowosanga ma Jo'oungu ma Dutu 'awi Woaka ge'ena.

Wahyu

Video Wahyu 15

Ikuti Kami:

KONTAK | PARTISIPASI | DONASI