Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Wali yako etu i Yesu pasi anaguruNya dongka nja’u sambote ndano, nja’u lipu nto Gerasa.
2 Ojo kadongka nsira nja’u ria, i Yesu mana’u yako ri bangka panewa Ia mansaka napago ntau to masuwu yako nja’u oyo nu dayo. Ngkai etu naposuak measa,
3 wali ia jamo maroo-roo nja’u oyo nu dayo etu. Pasi tau malagi ngkanimo mangampunguka rante pale pasi witinya pasi mangajagai kojo ia. Pei nempo ewa see, ia ojo mangarapas yau rante etu. Wali ia tamo maya nata’amaka ntau apa ia maroso kojo naika measa to mamposuak ia etu, see naka nempo rapunguka rante taa mawali.
4 (5:3)
5 Wali wuri-eo ia kalili-lili ri oyo nu dayo pasi ri pantana tongonya kaboo-boo pasi mangawelangika watu ri koronya.
6 Wali tempo ngkai etu mangkita i Yesu longkowa, ia maripo mangampago pei mambokotu ri tangoNya.
7 Panewa i Yesu manganto’oka measa to mamposuak tau etu, to’onya, “Measa, piyaimo yako resi ngkai si’i!” Wali ngkai to naposuak measa etu maroso loonya kaboo, to’onya, “O Yesu, Ana i mPue Allah anu makuasa kojo, kesaa ma’i Nupali resi aku?” Panewa ia manganto’o wo’u, “Ri tango i mPue Allah, matamanasa ngkita, kuporapika resi Komi ne’e mangansesai aku!”
8 (5:7)
9 Wali i Yesu mampotanaka resi ia, “Sema sangamu?” Wali ngkai etu mangansono, “Sangangku Legiun, apa kami boros kojo.”
10 Roo see ia mamporapirapika resi i Yesu naka ne’e Ia mampokau sira njo’u tana to longko.
11 Wali nja’u lipu etu, re’e wawu ntau mangaliwu pangkoni ndate rapa mpantana etu. Wawu etu bara dua nsowu kaborosinya.
12 Wali samparia measa to mamposuak ngkai etu, sira mamporapika resi i Yesu, to’onya, “Pakauka kami malimba damasua ri wawu etu.”
13 Wali i Yesu manganto’oka sira, “Intamo.” Wali tempo etu measa nasuwumo yako ri tau etu panewa masua ri wawu boros. Tempo wawu etu naposuak measa, sira maripo yau lo’u woto mpantana rata la’u raya ndano. Wali wawu etu malodong yau samparia.
14 Wali ojo pangkita nto pangkampang wawu palaong to mawali etu, sira miyai. Sira maripo lo’u kota. Rata la’u ria sira mangampaleleka resi tau nja’u ria pasi resi tau to ri kampu-kampu to ri awe ngkota etu, sira mampakarebaka resi tau mangkonong samparia palaong to nawali etu. Wali ojo pangandonge ntau kareba to nato’oka nto pangkampang wawu sira, sira yau mangampago mangalo’a palaong to nawali etu.
15 Ojo karata nsira resi i Yesu, sira mangkita ngkai to tempo ruyu naposuak measa boros etu, ia matunda nja’u ria. Sira mangkita matao muni apa sira mangalo’a masilonga muni pampobuukanya pasi sira mangkita re’e muni pakenya. Wali sira meka rayanya mampobuuka bae kojo kuasa i Yesu.
16 Pasi tau to matamanasa mpalaong to naika i Yesu resi ngkai to naposuak measa pasi palaong to inikaNya resi wawu etu, sira mangansaritaka wo’u tau to rata.
17 Wali tau boros etu marapi kojo resi i Yesu see Ia damiyai yako ri lipu nsira.
18 Wali i Yesu pasi anaguruNya mapone muni ri bangka damampiyaika lipu etu. Tempo Ia mapone ri bangka, ngkai to naposuak measa tempo ruyu etu marapi resi Ia see ia seja damangalulu.
19 Pei i Yesu taa mangabiaka ia yau. Ia manganto’oka tau etu, “Inta njo’u lipumu pei to’oka yunumu mangkonong pamporayang i mPue resi korom pasi mangkonong samparia to naika i mPue mangansawang korom.”
20 Wali ngkai etu yau muni njo’u lipu to sampuyu kota, lipu etu sanganya Dekapolis. Rata nja’u ria, ia mangansaritaka tau mangkonong samparia to naika i Yesu resi ia. Wali tempo ia mangansaritaka tau etu, samparia tau to mangandonge anu to nato’o ngkai etu sira ipu kojo rayanya.
21 Wali yako etu i Yesu pasi anaguruNya malayag wo’u mangawote rano Galilea. Ojo kadongka nsira nja’u sambote ndano etu, boros kojo tau mampago i Yesu. Tau etu makore tiku Ia nja’u wii ndano.
22 Wali tempo etu ma’i samba’a tau tu’a nto Yahudi, ia ma’i mangampago seja i Yesu. Ngkai etu sanganya i Yairus. Wali tempo i Yairus mangkita i Yesu ia mambokotu ri tangoNya, mampakabae Ia.
23 Panewa ia mamporapika kojo resi i Yesu, ia manganto’o, “Re’e samba’a anangku to we’a to masaki mapari kojo. Damatemo ia. Wali kuporapika resi Komi yau damampotaka ia see ia taa damate, ojo damatao muni.”
24 Wali i Yesu yau sinjaya pei i Yairus. Pasi boros kojo tau to yusa to kanguyu-nguyu mangalulu i Yesu, see naka sira mangajuju Ia.
25 Pasi re’e samba’a tau we’a ri oyo ntau boros etu ia sampuyumo pei dua nto’u tare pandoonya mansabe wuya.
26 Tau we’a etu mandudu ngkani yau resi dokter darapokulir, bae kasesa to ia mangarata tempo napokulir ndokter, pei taa kojo naaya. Wali ia puramo kasuginya mangabayar yau dokter pei panyaki etu taa kojo malewa, ojo mapari wo’u.
27 Wali tau we’a etu ia roomo mangandonge mangkonong kuasa i Yesu mampakatao muni tau to masaki. See naka ia mampago i Yesu yako ri payuNya ri oyo ntau boros panewa ia mampotaka pake i Yesu apa ia mampobuuka, “Nempo aku ojo mampotaka pakeNya, aku damatao muni.”
28 (5:27)
29 Wali tempo ia mampotaka pake i Yesu etu, panyaki etu mansaka mandoo pasi ia mangepe matao muni koronya.
30 Pei i Yesu Ia mangepe re’e kuasa to masuwu yako resi Ia wali Ia mansaka mangandolika tangoNya ri oyo ntau boros pei mampotanaka resi sira, Ia manganto’o, “Sema to nampotaka pakengKu?”
31 Wali anaguruNya manganto’oka Ia, to’oNya, “Komi mangkita tau boros kojo si’i mangajuju Komi, maka pei Komi mampotanaka wo’u tau to mampotaka?”
32 Pei i Yesu Ia ojo mangalo’aka yau tau boros etu, mangalo’aka bara sema to nampotaka Ia.
33 Wali tau we’a to nampotaka Ia etu, ia mangansani ia semo to rapakatao muni, wali ia yau resi i Yesu tongo ngkarongko-rongkonya apa meka rayanya. Ia mambokotu tango i Yesu, panewa ia mampakanasaka i Yesu mangkonong samparia palaong to nawali etu.
34 Wali i Yesu manganto’oka ia, “A’ingKu, inta ri kasanang ndaya, apa tamore panyaki resi korom. Apa korom mansarumaka Aku, see naka korom matao muni.”
35 Wali tongo-tongonya i Yesu mampogomboka tau we’a etu, ratamo tau yako banua i Yairus. Tau to rata etu manganto’oka i Yairus, “Anamu matem. Tamo re’e batuanginya komi mangantalas Pa’a Guru apa ana ngkomi matem si’i-si’i.”
36 Tempo i Yesu mangandonge gombo ntau etu, Ia mansaka manganto’oka i Yairus, to’oNya, “Ne’e bata-bata rayamu. Ojo sarumaka Aku.”
37 Panewa roo see sira dua polas, pei i Yesu taa mangabiaka tau to yusa mangalulu sira kasimbalinya yako i Petrus, pasi i Yakobus sira dua tua’inya, Yohanes.
38 Wali yako etu sira lima rata nja’u banua i Yairus. Ojo karata nsira etu, sira re’e mangandonge boros kojo loo ntau to makanano ri banua etu. Re’e tau tumangi pasi singga’a maroso kojo loonya mangantangis tau mate.
39 Wali i Yesu masua ri banua panewa Ia manganto’oka tau boros etu, “Maka pei komi makanano pasi tumangi? Ana etu taa mate, ia ojo yore.”
40 Pei tau boros etu ojo mampogeleka pasi mangkaengas Ia. Pei i Yesu mampaposuwu yau tau boros etu, panewa Ia mangansale tau tu’a nu ana pasi anaguruNya togo mba’a etu. Wali sira ono masua re’e songi to nakare’e ntau mate.
41 Yako etu i Yesu mangoko pale nu ana to matem etu panewa manganto’oka ia, “Talita kum.” Gombo etu batuanginya, “Ana we’a, Kuto’oka korom pambangu.”
42 Wali ana etu mansaka makore pei malinja, apa ia sampuyu pei dua nto’umo. Wali tau tu’anya ipu kojo rayanya mangangkita ananya etu tuwu muni.
43 Pei i Yesu manganto’oka sira, “Ne’e kojo mangansaritaka sa’e mangkonong palaong to si’i.” Pasi Ia manganto’oka sira “Waika ia pangkoni.”
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA