Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Mako sampailah Isa Almasih sarato jo pangikuik-Nyo di subarang danau Galilea, di daerah Gerasa.

² Baitu Baliau turun dari parawu, Baliau didatangi dek surang laki-laki nan kaluwa dari guwo kubuaran.

³ Urang tu dikuwasoi dek roh jahek, inyo tingga di kubuaran. Inyo indak bisa lai dikabek; biyapun jo rantai.

⁴ Lah acok kaki atau pun tangannyo dipilanggu, tapi rantai pilanggu tu diputuihkannyo, basi nan dipasang di kakinyo dikupak-inyo. Inyo sabana kuwaik, sainggo indak surang juwo doh urang nan bisa mamacikkannyo.

⁵ Siang malam inyo bakuliliang-kuliliang di kubuaran, sarato jo di bukik-bukik, sambia ma ariak-ariak, inyo malukoi badannyo jo batu.

⁶ Kutiko dari jauah inyo manampak Isa Almasih tibo, inyo balari-lari mangaja-i Baliau, sudah tu inyo sujuik di adok-an Baliau.

⁷ Jo suwaro nan kareh inyo ma ariak, "Isa Almasih, Anak Allah Nan Mahatinggi! Ka Angkau pangakan ambo ko? Demi Allah, ambo mambana, janlah ambo dilantak-i!"

⁸ (Mangkonyo inyo mangecek bakcando itu, dek karano Isa Almasih lah bakato kabake inyo, "Oih roh jahek, kaluwalah angkau dari urang ko!")

⁹ Mako batanyolah Isa Almasih kabake inyo, "Siyakoh namo angkau?" Urang tu manjawab, "Namo ambo 'Legiun' -- dek karano kami ko sabana sambuah!"

¹⁰ Ba ulang kali inyo mambana-bana kabake Isa Almasih supayo Baliau jan ma usie roh-roh jahek tu kaluwa dari daerah tu.

¹¹ Dakek tampaik tu sambuah babi nan sadang mancari makan dilereng bukik.

¹² Roh-roh jahek tu mambana kabake Isa Almasih, "Suruahlah kami masuak ka dalam babi nan banyak tu."

¹³ Isa Almasih layi satuju. Jadi, roh-roh jahek tu bi kaluwa kasadonyo dari urang tu, sudah tu inyo masuak ka dalam babi nan banyak tu. Kasadonyo babi tu bi lari, tajun dari tapi ngarai, masuak ka dalam danau, abih mati tabanam kasadonyo -- ado kiro-kiro duwo ribu ikua banyaknyo.

¹⁴ Tukang-tukang gubalo babi tu bi lari, inyo payi ma imbaukan kajadian tu ka kota, sarato jo ka kampuang nan di sakuliliang tu. Urang-urang tu bi kaluwa untuak maliyek apo nan lah tajadi.

¹⁵ Urang-urang tu bi tibo kabake Isa Almasih, inyo maliyek urang nan ka masuak-an roh jahek tu, sadang duduak disinan. Inyo lah babaju, pikierannyo lah babaliak ka nan bana. Kasadonyo urang bi tabik takuik.

¹⁶ Urang-urang nan lah maliyek jo mato kapalonyo sandiri, tantang kajadian urang gilo tu, sarato jo kajadian babi tu, inyo bi mancuritokan sagalo apo nan lah tajadi.

¹⁷ Sasudah tu panduduak di daerah tu mamintak, supayo Isa Almasih barangkek dari daerah inyo tu.

¹⁸ Kutiko Isa Almasih nayiak ka ateh parawu, urang nan tadinyo dikuwasoi dek roh jahek tu, mamintak kabake Baliau, supayo inyo dibuliahkan payi jo Baliau.

¹⁹ Tapi Isa Almasih indak mambuliahkan, Baliau bakato kabake urang tu, "Pulanglah, curitokanlah kabake sanak sudaro angkau, apo nan lah dipabuwek dek Tuhan, baralah ka eloknyo Tuhan kabake angkau!"

²⁰ Mako bajalanlah urang tu, muloilah inyo mancuritokan di daerah Sapuluah Koto, apo nan lah dipabuwek dek Isa Almasih kabake inyo. Sadonyo urang bi tacangang mandangakan curitonyo tu.

²¹ Isa Almasih babaliak baliak ka subarang danau. Tibo di tapi danau tu, sambuah urang bi tibo ba uruang di sakuliliang Baliau.

²² Tibolah surang urang nan banamo Yairus. Inyo adolah surang pamimpin rumah ibadaik di kota tu. Kutiko inyo maliyek Isa Almasih, mako sujuiklah inyo di adok-an Baliau,

²³ sambia mambana ka Baliau, inyo bakato, "Ngku, anak ambo nan padusi sadang sakik sangaik. Maringanilah Angku datang untuak ma awai anak ambo tu, buliah inyo cegak, jan sampai mati!"

²⁴ Mako payilah Isa Almasih ka tampaik anak tu, samo-samo jo Yairus bagai. Sambuah urang nan manuruikkan Baliau, basalingkik-salingkik di sakuliliang Baliau.

²⁵ Di antaro urang nan sabanyak tu, ado pulo surang padusi nan lah duwo baleh tawun sakik pandarahan, nan ba ubuangan jo haidnyo.

²⁶ Sadonyo aratonyo lah abih dijuwa, untuak pambayie ubek ka dotor, tapi indak ado doh nan bisa mancegakkan inyo, malahan panyakiknyo batambah barek.

²⁷ Urang padusi tu lah banyak mandanga kaba tantang Isa Almasih. Kutiko urang sadang basalingkik-salingkik tu, inyo pun manyalingkik pulo untuak mandakek-i Isa Almasih dari balakang,

²⁸ dek karano, manuruik agak-agaknyo, "Asa ambo dapek sajo ma awai jubah Baliau, mako panyakik ambo lah musti cegak!"

²⁹ Inyo pun dapek ma awai jubah Isa Almasih, sakutiko tu juwo sakik pandarahannyo cegak. Inyo dapek marasokan baraso badannyo lah siyaik.

³⁰ Dikutiko itu pulo, Isa Almasih marasokan baraso ado kuwaso nan kaluwa dari diri-Nyo. Dek karano itu Baliau mancaliak kabake urang nan banyak, sambia batanyo, "Siya urang nan ma awai jubah Ambo?"

³¹ Pangikuik-Nyo bi bakato, "Angku kan lah maliyek sandiri, bara ka sambuahnyo urang nan basalingkik-salingkik di sakuliliang Angku. Tapi Angku batanyo pulo kabake kami, siya urang nan ma awai Angku?"

³² Tapi Isa Almasih taruih juwo mancaliak ka sakuliliang, untuak mancaliak siya urang nan lah ma awai Baliau.

³³ Urang padusi cako, nan lah tawu apo nan lah tajadi jo dirinyo, inyo manggigie katakuik-an sambia sujuik di adok-an Baliau, inyo ma akui sagalo apo nan lah dipabuweknyo.

³⁴ Mako bakatolah Isa Almasih kabake padusi tu, "Oih anak-Den, dek karano angkau layi picayo kabake Ambo, itu mangkonyo panyakik angkau cegak! Pulanglah jo sanang salamaik. Panyakik angkau lah cegak kasadonyo!"

³⁵ Samantaro Isa Almasih sadang mangecek, babarapo urang pisuruah tibo dari rumah Yairus, inyo bakato kabake Yairus. "Anak angku lah maningga, indak usah lai angku mampaseso Angku Guru pulo."

³⁶ Isa Almasih indak mampadulikan apo nan dikecekkan dek urang-urang tu, Baliau bakato kabake Yairus, "Jan takuik pulo lai, picayo sajolah!"

³⁷ Sudah tu Baliau taruih juwo bajalan, tapi Baliau indak mambuliahkan surang juwo, urang nan manuruikkan Baliau, salain daripado si Petrus jo si Yakobus sarato jo si Yahya nan baradiak kakak.

³⁸ Kutiko Baliau lah tibo di alaman rumah Yairus, Baliau mandanga ado suwaro nan iruak pikuak, tadanga pulo ratok jo tangih nan manggagau-gagau.

³⁹ Isa Almasih masuak ka dalam rumah, Baliau bakato kabake urang-urang nan disinan, "Manga ko, kok bi manangih? Paja ko indak baa-baa bagai doh ko; inyo laloknyo ko!"

⁴⁰ Urang-urang tu bi manggalakkan Baliau. Mako Baliau suruahlah urang-urang tu kaluwa kasadonyo. Baliau ma ajak urang gaek paja tu sarato jo katigo urang pangikuik-Nyo, masuak ka dalam biliak.

⁴¹ Baliau mamacikkan tangan paja tu sambia bakato, "Talita kum," nan aratinyo adolah, "Oih anak padusi, Ambo bakato kabake kau: jagolah!"

⁴² Paja gadih tu lansuang jago, sudah tu inyo bajalan. (Umuanyo lah duwo baleh tawun.) Sadonyo urang nan mancaliak kajadian tu sabana bi tacangang!

⁴³ Tapi Isa Almasih sabana-bana managah, supayo urang-urang tu jan mancuritokan kajadian tu kabake siya-siyanyo. Sudah tu Baliau bakato, "Agiah makanlah paja ko."

Markus

Video Markus 5

Ikuti Kami:

KONTAK | PARTISIPASI | DONASI