Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Bọu e Mawu Yesus dingangu murit'E nawunạe su sěmbẹ̌kan Danong Galilea, su wanuan Gerasa.

² Ene Mawu Yesus natumpạe wọu sakaeng, i Sie nihaungangu sěngkatau esẹ matoghasẹ̌ simẹ̌bang bọu manga liangu kubul᷊ẹ̌.

³ Tau ene seng nipẹ̌banuangu rohkẹ̌ dal᷊akị kụ i sie seng mẹ̌tẹ̌tanạ su manga pěngangubul᷊ang. I sie seng tawe ikaikị manilaing ikitangu hante.

⁴ Seng masau wěntungang su l᷊aede ringangu su l᷊imane, kai manga hante e měngkate wẹ̌běsukange, dingangkewen uase su l᷊aede pẹ̌papẹ̌diange. I sie kerene katoghase hakịewen tawẹu makatětol᷊ẹ̌ měhẹ̌go si sie.

⁵ Ěllo hěbi i sie měngkatewe lěgah'u manga lẹ̌bing dingangu manga wěntihe, kạpěmansage kụ mẹ̌děndal᷊esẹ badange ringangu watu.

⁶ Ene wọu maraune i sie seng nakasilo Mawu Yesus narěnta, kụ i sie měngkatewe timal᷊ang naněnsomahẹ̌ mase nẹ̌suba su těngon Mawu Yesus.

⁷ Dingangu tingihe maihạ i sie mạmansagẹ̌, "Yesus Ahus'u Mawu Ruata Karangetange! Kai sarung pẹ̌kapuranengu iạ ini e? Su arengu Mawu Ruata, iạ mědẹ̌dorong, abe sigěsake iạ e!"

⁸ (Tau ene nẹ̌bera kerene batụu Mawu Yesus něhengetang si sie, "Rohkẹ̌ dal᷊akị, sěbangke wọu tau ěndaị ini!")

⁹ Mase Mawu Yesus nakiwal᷊ọe si sie, "I sai areng u?" Tau ene simimbang, "Arengku e i 'Legiun' -- batụu i kami ini e kai mal᷊awọ-l᷊awọ!"

¹⁰ Apan piran sul᷊e i sie mědẹ̌dorong sěngapang botonge tadeạu Mawu Yesus abe pěnokol᷊'u manga rohkẹ̌ dal᷊aị e wọu weọ e ene.

¹¹ Maranin tampạ ene piạ gapaěngu wawi mal᷊awọ měmpědẹ̌deạ kaěnge su lengeh'u wul᷊ude.

¹² Manga rohkẹ̌ dal᷊aịe němpẹ̌dorong su Mawu Yesus, "Rolohe i kami apạhunsuẹ̌ su ral᷊ungu manga wawi e."

¹³ Kụ Mawu Yesus kimirẹ e. Tangu manga rohkẹ̌ daral᷊aị e nahunsěbangke wọu tau ene kụ němpẹ̌suẹ̌ su wawi e. Kal᷊awọu wawi e němpẹ̌tal᷊ang kụ nahuntumpa wọu wiwih'u těnggilihange kụ něngkawunsal᷊ẹ̌ su rano mase něngkawul᷊usẹ̌ -- kal᷊awọe mangawe rua hiwu su waụ e.

¹⁴ Manga měndal᷊ukadẹ̌ bawi e nahuntal᷊ang kụ němpẹ̌běken hal᷊ẹ̌ ene su soa ringangu su apang kampong mạngělikụ e. Mase taumata l᷊awọ e simẹ̌bang němpamanda hal᷊ẹ̌ seng nariadi e.

¹⁵ I sire němpẹ̌haungke Mawu Yesus, kụ nakasilo tau kanini niwal᷊iuangu rohkẹ̌ dal᷊akịe kụ mạiang ěndaịse. I sie seng piạ pakeange, ringangu tiněnnane seng kere wiasa. Kụ i sire kěbị e něngkatakụ.

¹⁶ I sire apạewen nakasilo hala kakakoạu tau ene ringangu manga wawi e, měmpẹ̌bẹ̌běken hal᷊ẹ̌ seng nariadie.

¹⁷ Mase apan tumanạu weọ e ene tangu mědẹ̌dorong tadeạu Mawu Yesus maněntangu wanua ene.

¹⁸ Ene Mawu Yesus simakẹ e su sakaeng, i anu nạung niwal᷊iuangu rohkẹ̌ dal᷊aịe nẹ̌dorongke su Mawu Yesus mědeạu i sie wotonge makatol᷊e.

¹⁹ Kai Mawu Yesus e tawe napakawala, angkuěng'E, "Dakọe kapul᷊ẹ, kụ paul᷊ịe su manga anạ u sěmbaụ u apan seng kinoạu Mawu si kau, ringangu kereapa kapian'E i Sie si kau!"

²⁰ Tau e apid'u napul᷊ẹ, kụ nanětạe nẹ̌běke su kạguwạu Soa Mapul᷊o apang kụ seng nikoạu Mawu Yesus si sie. Kụ kěbị taumata e měngkaherang nakaringihẹ̌ ene.

²¹ Mawu Yesus nẹ̌sul᷊e kạpia sol᷊ong sěmběkan dano. Su wiwih'u rano e, taumata l᷊awọ němpẹ̌dahěmbung Mawu Yesus.

²² Ene piạ tau narěnta arenge i Yairus. I sie kai sěngkatau těmbonangu wal᷊eng pẹ̌kakal᷊iomanengang su soa ene. Piạ i sie nakasilo Mawu Yesus, i sie nẹ̌suba su těngon'E,

²³ kụ mědẹ̌dorong sěngapam botonge, "Tuang, anạku wawine kai masakị matědụ. Karimạko i Tuang deng duměnta kụ makapaněllid'u liman'U, kụ i sie maul᷊e ringangu tawe mate!"

²⁴ Tangu Mawu Yesus e natamai ringang i Yairus. Mal᷊awọ taumata němpẹ̌tol᷊e si Sie měmpẹ̌sẹ̌sasěngkelẹ̌ balạewe měnsang bọu tampạ sude.

²⁵ Su tal᷊oaran sire e piạ l᷊ai sěngkatau wawine kụ seng mapul᷊o dua su taunge měngkai rẹ̌dal᷊engangu raha wọu wadange pělli.

²⁶ Patikụ darotonge seng nasuen pakẹ e waugu pinamaehẹ̌ manga mangangundang, kaiso tawẹu nakapia, kaiso kawe napahuntinambang tědụe.

²⁷ Bawine ene seng mal᷊awọ dingihe mạanun Mawu Yesus. Tangu su tal᷊oarạen taumata l᷊awọ ene, i sie himaungke Mawu Yesus bọu l᷊ikude,

²⁸ u su tiněnnane, "Kạdiongeng katewe iạ manenggehẹ̌ lakụe, tangu iạ e seng mapia!"

²⁹ I sie nanenggehẹ̌ lakụ u Mawu Yesus, kụ su tempo ene e lai raral᷊engu rahane e napontodẹ̌. I sie nakapěndangu i sie seng nul᷊e.

³⁰ Tangu su orasẹ̌ ene lai Mawu Yesus nakapěndangu piạ kuatẹ̌ siměbang bọu watangeng'E. Tangu i Sie nẹ̌bihu su taumata lawọ ene kụ něhengetang, "I sai wědị nanenggehẹ̌ lakụ-Ku e?"

³¹ Manga muritẹ̌ e němpẹ̌bera, "I Tuang makạsilo hala u apạe mal᷊awọ taumata kụ měmpẹ̌sẹ̌sasěsẹ. Kụ i Tuang delaing makiwal᷊ou, i sai nanenggehẹ̌ si Tuang?"

³² Arawe Mawu Yesus měngkate sěntiniạ, mạmanda kaihi koaneng mědẹ̌deạ tau nanenggehẹ̌ si Sie.

³³ Tau wawine ene kụ nasingkạeng apa nariadi su watangenge, kụ kạkendenẹeng takụ tangu i sie nẹ̌suba su těngon Mawu Yesus kụ něngakụen kěbị-kěbị.

³⁴ Tangu Mawu Yesus něhengetang su wawine ene, "Anạ-Ku, ual᷊ingu i kau nangimang si Siạ, ute i kau e naul᷊e! Dakọe kapul᷊ẹ su ral᷊ungu pẹ̌darame. I kau e seng nul᷊e kahěngang!"

³⁵ Ene Mawu Yesus bẹ̌dang kapẹ̌hengetange, piạ darolohang pirang katau, nahunděnta wọu wal᷊eng Yairus. "Ahus'i Tuang bawine e seng naněntang," angkuěng i sire si Yairus. "Tawe wahal᷊uasẹ̌ i Tuang mapakasusa Mawu Yesus e wẹ̌dang."

³⁶ Tawe nẹ̌sěmpị apang iwẹ̌berang taumata lawọ e, Mawu Yesus něhengetang si Yairus, "Abe katakụ, měngkate pangimang!"

³⁷ Mase Mawu Yesus dimal᷊eng turusẹ̌, kai i Sie tawe napakawalan sarang sěngkatau niapatol᷊e si Sie, kětạewen i Petrus, Yakobus dingangi Yohanes sire tahatuari.

³⁸ Sarạeng i sire nahumpạ su wal᷊eng Yairus, Mawu Yesus nakasilou měngkate němpẹ̌golang, dingangu nakaringihẹ̌ sasangị dingangu ral᷊ungkang maihạ.

³⁹ Bọu e Mawu Yesus simuẹ̌ dingangu nẹ̌bera si sire, "Kawe unụe měmpěgẹ̌ganohạ dingangu mạhunsangị? Dariọ ene wal᷊inewe nate, i sie kětạeng mětẹ̌tikị!"

⁴⁰ I sire kai nahul᷊ěgen Mawu Yesus. Tangu i Sie něndolohen sire niapasẹ̌bang kěbị. Bọu ene i Sie namaringang si ninang dingangu i amangu rariọ dingangu i sire těllungkatau murit'E simuẹ̌ su ral᷊ungu kamar'u rariọ ene.

⁴¹ Mawu Yesus nangumpaedẹ̌ liman dariọ e, kụ něhengetang si sie, "Talita kum," mangal᷊ene, "Momọ, Iạ mẹ̌bera si kau: pẹ̌bangungke!"

⁴² Dariọ mahuala e měngkatewe nẹ̌bangung, kụ dimal᷊eng. (Umure seng mapul᷊o dua su taunge.) Kěbị apan nakasilo karariading ene e měngkatewe němpẹ̌dal᷊inaụ!

⁴³ Kai Mawu Yesus e nẹ̌sěding sěngapam botonge si sire měhabar'u hal᷊ẹ̌ ene si sai-sai. Mase ungkuěng'E, "Gělikengkong kaěnge rariọ ene."

Markus

Video Markus 5

Ikuti Kami:

KONTAK | PARTISIPASI | DONASI