Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Idi ideh nacing déi' dipar Takung Galilia, déi' tana' lun Gadara.
2 Kareb Yésus neremuat rat bang alud, idi petacu seburur lemulun nepapu' Neneh, luk nacing ratnan lengutan.
3 Lemulun ineh sinuet ada', idi ieh bang lengutan. Seburur pana' nateh luk miak ngaling neneh, sagan pana' dengan kaling belawan.
4 Tuda'-tuda' kua' ieh pipang idi kiling teh, iamo' amung-amung kaling ineh pangeh pinututneh, idi papang kukundeh ineh pana' inusagneh. Na luk idi seburur lemulun pana' luk miak ngimet neneh.
5 Tebaco kedangan ineh nalan nan lengutan ineh idi luun surud-surud, dengan ngitang idi ngurat bururneh ku batu.
6 Iamo' kareb ieh nenier Yésus rat mado, idi ieh nupun macing tekeradung pa kiungNeh,
7 idi nengitang, keburi'neh, "Anunké luk pianMu negku, O Yésus Anak Allah luk Meluun Dita'? Ui mutuh Namu bang ngadan Allah, aleg Iko ngedereh negku!"
8 (Ngaceku pangeh bila Yésus kuanneh, "O ada', remuat iko ratnan lemulun ini!")
9 Idi Ieh nengitun neneh, "Idéké ngadanmu?" Idi ieh nengor balaNeh, keburi'neh, "Ngadanku 'Baweh' ngaceku kai mula'."
10 Idi ieh pelaba uring nemutuh Yésus pelé ideh na dukenNeh remuat rat bang bawang ineh.
11 Idi déi' luun surud inan barek luk mula' nakap akan.
12 Idi kebala ada'-ada' ineh inan Yésus, "Nima' nekai semuet bang burur barek ineh!"
13 Idi Ieh nenima' nedeh. Idi ada'-ada' ineh neremuat, idi ideh nesemuet bang burur barek ineh. Idi kinula' barek ineh lélé dueh ngeribu. Idi ideh nupun musul pegkung ineh idi nubpa bang Takung Galilia, idi ideh naté bang takung ineh.
14 Idi lemulun luk matar barek ineh pana' neburo, idi nemada' ratnan luk nangun ineh déi' bang bawang rayeh idi bang barar lati' pana'. Idi lun mula' neremuat pian nier ratnan luk nangun ineh.
15 Idi ideh iné' matun Yésus idi nenier lemulun luk pangeh sinuet baweh ada' ineh. Idi ieh netudo dengan nengayung idi terawéneh do'. Idi lun mula' matot.
16 Lun luk pangeh nenier neneh ineh nemada' nelun mula' ratnan lemulun luk pangeh sinuet ada', idi ratnan barek ineh pana'.
17 Idi ideh nemutuh Yésus buro rat bang bawangdeh.
18 Kareb Yésus netemaleb bang alud, idi kebala lemulun luk sinuet ada' ineh, "Ui pian maya' Namu."
19 Iamo' Yésus na nima' neneh maya' Neneh. KebalaNeh neneh, "Do' iko muli' idi mada' nelun bang tetek ruma'mu ratnan kekamen luk rayeh luk pangeh inau' Tuhan kuanmu, idi ratnan éi'Neh namu."
20 Idi lemulun ineh nenalan idi nemada' bang Pulu' Bawang ineh ratnan pangeh inau' Yésus kuanneh, idi amung lemulun luk neninger ineh mawa.
21 Yésus nelemubed guta takung ineh. Idi tangeb abpa' mula' lemulun nepamung Neneh.
22 Idi Yairus, lun rayeh ruma' sembayang, iné' Neneh. Kareb ieh nenier Yésus, idi ieh netekeradung pa kiungNeh,
23 idi ieh mesaad mutuh, keburi'neh, "Anak decurku luk isuut lélé maté, do' Iko amé' idi ngerareng ticuMu luunneh pad ieh do' idi mulun teh."
24 Idi Yésus iné' maya' neneh, idi lun mula' nemaya' Neneh idi nengerieng Neneh.
25 Idi inan seburur decur luk mebura' ét mirat dara' pangeh pulu' dueh lak kinioneh,
26 sagan tu pana' ieh pangeh inubat mula' lemulun luk ngubat. Ieh pangeh nengabud amung-amung usinneh, iamo' na ieh do', iamo' iuk-iuk mebura' ét.
27 Kareb ieh neninger ratnan Yésus idi ieh iné' arang lun mula' ineh rat pa keted.
28 Idi keterawéneh, "Kudeng ui ngakem kuyu'Neh mo', kali' rungen ui miak do' peh."
29 Ieh nengakem kuyu' Yésus. Idi petacu tapek dara'neh ineh nugka' peh, idi ieh nekali' bang bururneh, ratnan ieh pangeh nedo' ratnan luk métneh ineh.
30 Petacu Yésus nekali' inan lalud neremuat rat Neneh, idi Ieh nelumi nelun mula' ineh idi nepebala, "Idéké luk nengakem kuyu'Ku?"
31 Idi keburi' anak-anak sekola' Neneh, "Iko kali' lun mula' ini ngerieng Namu. Ngudeh Iko ngitun, 'Idé luk ngakem Negku?'"
32 Idi Yésus nenier libut-libut sikal kali' idé luk nenganau' luk kudeng ineh.
33 Idi decur ineh pana' matot idi megegker, ngaceku ieh kali' luk pangeh mangun kuanneh, idi ieh nacing tekeradung pa kiung Yésus idi nemaré kali' ratnan amung-amung ini dengan matu.
34 Kebala Yésus neneh, "O anakKu, anumu pangeh nengedo' namu. Muli' iko dengan awang, miak iko do' ratnan étmu."
35 Kareb Yésus uned pebala, inan tuda'-tuda' lemulun rat ruma' Yairus nacing mada' neneh, "Anakmu pangeh naté. Ngudeh iko ngesusa' Guru?"
36 Yésus na nengerawé baladeh ineh, iamo' kebalaNeh neneh, "Aleg matot, manu mo'!"
37 Idi na Ieh nima' seburur pana' maya' Neneh, iamo' Pétrus, Yakub, idi Yahya, kinanak Yakub ineh mo' nemaya' Neneh.
38 Kareb ideh nacing ruma' Yairus ineh, idi Yésus kali' ria', idi neninger tangi' idi tido.
39 Kareb Ieh numak idi kebalaNeh nedeh, "Ngudeh muyuh megagau idi nangi'? Na anak ini naté, iamo' ieh rudap."
40 Idi ideh nesitunga Neneh. Iamo' Ieh nengecuk amungdeh remuat, idi Ieh nenguit taman-tinan anak ineh dengan teluh burur anak sekola'Neh nesemuet bang takep luk inan anak ineh.
41 Idi Ieh nengimet ticu' anak ineh idi nepebala, "Talita kum!" luk ilungneh, "O anak decur, Ui pebala namu, tumui iko."
42 Idi petacu anak ineh netumui idi nenalan. (Ulunneh pulu' dueh lak.) Idi amungdeh pelaba awa!
43 Iamo' Ieh nemebpeng nedeh na mada' nelun baken, kebalaNeh, "Do' maré luk kenenneh."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA