Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Bara mahae hangko indo, Yesu mesule lao i boea Kapernaum. Tebambarimi kaarana Yesu i lalu sou.

² Ido hai bosa tauna mai, alana buke i lalu sou, hai baba sou iti buke wori tauna. Yesu mopahaweahe Ngkorana Pue Ala.

³ Tangana mololita, maimohe iba tauna mokowa ranganda au palu.

⁴ Bara ara raranda mohungkuki Yesu lawi sou iti buke ntepuu tauna. Ido hai mengkahemohe i tuka lao i wongko sou moangka atu sou au ara i wongkona Yesu, hai raulu ranganda bona toa i lalu sou.

⁵ Kanaitana Yesu kamahilena pepoinalainda, Naulimi i topalu iti: "AnaNgku, teampungimi dosamu."

⁶ Ara worihe bahangkia guru agama to Yahudi au mohuda i lalu sou iti. Koi inaonda mohadi lolitana Yesu iti. Nauli lalunda:

⁷ "Pebai mpuu tauna ide mololita nodo! Ba Ia mopahimbela kuasaNa hai Pue Ala? Bara ara hadua tauna au peisa moampungi dosa, batena pea Pue Ala."

⁸ Agayana naisami Yesu apa au ara i lalunda. Ido hai Nauliangaahe: "Moapari hai koi inaomi?

⁹ Umba au mamura rauli: 'Teampungimi dosamu,' ba 'Pearo, nulolomi alemu, hai molumaomoko.'

¹⁰ Bona niisa, Iko ide, Ana Manusia, makuasa moampungi dosa i dunia. Ide-ide ina Kupatongawa kaarana kuasaNgku moampungi dosa." Hangko inditi, membalilimi Yesu i topalu iti,

¹¹ Nauliangaa: "Mearomoko, nulolomi alemu, hai mesulemoko!"

¹² Mearo mpuumi topalu iti, nalolo alena, hai molumaomi lao i olonda tauna bosa. Karaitana tauna bosa apa au mewali iti, tingkaramohe ope-ope, hai motoyahe Pue Ala, rauli: "Bara mani hambela taita au mewali nodo!"

¹³ Roo indo, lao mbulimi Yesu i wiwi rano. Bosa mpuu tauna mai Iria, hai Ia mopaturohe.

¹⁴ Tangana Yesu molumao, Naitami hadua toperuru asele au mohuda i kantorona, hangana Lewi anana Alfeus. Nauli Yesu iria: "Peulamide Iriko!" Meangkami Lewi, hai liliu meula Iria.

¹⁵ Roo indo, Yesu hai topeguruNa maandehe i souna Lewi. Tanganda maande, mai worihe bosa toperuru asele hai tauna ntanina au maande sambela hai ihira, lawi bosa tauna meula i Yesu. Tauna iti raimba tauna au kadake babehianda.

¹⁶ Arahe inditi bahangkia guru agama au moula paturonda to Parisi. Karaitana guru agama Yesu maande hihimbela hai tauna au kadake babehianda, rapekune guru agama iti i topeguruNa: "Moapari pane gurumi maande sambela hai toperuru asele hai tomadosa?"

¹⁷ Nahadi Yesu lolitanda, ido hai Nauliangaahe: "Tauna au bara mahai, bara paraluu mohaoki sando. Tauna au mahai pea au paraluu mohaoki sando. BaraNa mai mokakio tauna au manoto babehianda. KamaiNgku ide, mokakioNa tomadosa bona menosohe hangko i dosanda."

¹⁸ Hambela tempo, topeguruna Yohane Toperiu hai to Parisi tanganda mopuasa. Aramohe tauna au hawe i Yesu hai mekune Iria: "Topeguruna Yohane Toperiu mopuasa. Nodo wori topegurunda to Parisi. Mewali, moapari pane topeguruMu barahe mopuasa?"

¹⁹ Yesu mohanaihe hai ngkora pandiri ide, Nauliangaahe: "I posusa petauna, ba mopuasahe torare tangana toratauna tobalilo ara mani i olonda? Bara. Lawi ane ara mani toratauna tobalilo i olonda, barahe mopuasa.

²⁰ Agayana hambela tempo, toratauna tobalilo ina raala hangko i olonda. I tempo itiri, hangko mopuasahe."

²¹ Roo indo, Yesu mopahawe ngkora pandiri au rompaka, Nauli: "Bara ara hadua tauna au motampelei badu au hae hai hasepa bana au wou. Lawi hasepa bana au wou ina mengkuru, duuna mahepa badu au hae iti, alana kahile-hileari kahepana.

²² Nodo wori, bara ara tauna au mokando anggoro au wou i pambolia au hae. Lawi ane rengke, ina mahepa pambolia au hae iti, alana mabubu anggoro, hai marugi wori pamboliana. Mewali, anggoro au wou hangangaa rakando i pambolia au wou."

²³ Hambela tempo i alo penombaa, Yesu hai topeguruNa moliuhe i hambua bonde. Tanganda moliu i bonde iti, topeguruNa mokanukihe wua pare hai raande.

²⁴ To Parisi au arahe inditi mekune i Yesu, rauli: "Moapari hai topeguruMu moliungi atura agamanta? Mobagohe i alo penombaa!"

²⁵ Nauli Yesu: "Bara pae nibasa apa au nababehi Datu Daudi hai rangana hangkoya i temponda marimi?

²⁶ I tempona Abyatar mewali Tadulako Menomba Mahile, mesuami Daudi i lalu sou penombaa, hai moande roti au rapopenomba i Pue Ala, pane nakira-kiraa worihe rangana. Moula ada agamanta, tadulako menomba pea au peisa moande roti iti. Agayana nauri nodo, babehiana Daudi iti bara rasalai."

²⁷ Hangko inditi, nauli mbuli Yesu: "Pue Ala mobabehi alo penombaa bona motulungi manusia. Manusia bara Nababehi bona Napakapari ada alo penombaa.

²⁸ Mewali, Iko Ana Manusia, ara kuasaNgku mouli apa au peisa rababehi i alo penombaa."

Markus

Video Markus 2

Ikuti Kami:

KONTAK | PARTISIPASI | DONASI