Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Den ba'tu pirang-pirang allo mangkanna joo, polemi Puang Isa lako kota Kapernaum. Kaissenanni kumua lanmi bola.

² Budami tau ratu sirempun, nate'damo ngenan lo'bang lan bola. Moi jio pelalan ponno tau mpesa'dingngii, tonna mpangpeissenan Kareba Kasalamatan jio mai Puang Allataala.

³ Ia tonna mangngajahhimo Puang Isa denmi a'pa' tau ratu mbulle mesa' tokupi', la nabawa lako Puang Isa.

⁴ Apa liwa' budanna tau, nate'damo lalan naola tama bola mpendete'i to Puang Isa. Iamo joo nannola jio pelalan endek de' dea bola, natimbakkii to dea situjunna Puang Isa do', namane' rroroanni jao mai joo tokupi' jiong ampahna.

⁵ Ia tonna issenmi Puang Isa matumba kamatapparanna tuu lako tau, mangkadami lako joo tokupi', nakua, "Ee anak-Ku', didampanganmoko."

⁶ Denmi ba'tu pira-pira guru agama to nasolan cumadokko, pada mekutana lan penawanna nakua,

⁷ "Gaja barani ia tee tau mangkada susi joo. Ncapa' Ia Puang Allataala, sanga mpapada Ia Puang Allataala kalena. Te'da tau wa'ding ndampangan tomadosa, saliwanna Puang Allataala."

⁸ Ta'pa naissen Puang Isa to lan penawanna tuu lako guru agama. Iamo joo nakuanni, "Ciapari mimangpikkiri' susira tuu?

⁹ Umbonnara marawa, dikuaraka lako tee tokupi', 'Didampanganmoko', ba'tu dikuaraka, 'Ke'dehmoko, angka'i tuu ampahmu, mulumingka.'

¹⁰ Apa ia tee wattu la kupakitan kamu' kumua makuasana' Aku', Anak Mentolino, ndampangan tomadosa lan tee lino. Iamo joo kukua lako tee tokupi',

¹¹ 'Ke'dehmoko, angka'i tuu ampahmu, mupole!'"

¹² Ta'pa ke'dehmi, naangka'i to ampahna, namessun, nakitai tobuda. Jangngah ngasanmi to tau ngkitai, anna mpakala'bih Puang Allataala nakua, "Te'da lalopa naden takitai to apa jaji susi tee."

¹³ Male pole' omi Puang Isa do' randan Tasik Galilea. Buda tau ratu lako kalena anna ajahhii.

¹⁴ Ia tonna polemo, ngkitami mesa' passassung disanga Lewi anakkana Alfeus cumadokko lan kantoro'na. Nakua Puang Isa lako, "Maleko mai, nturu'na', kupuanak guruko!" Ta'pa ke'dehmi anna male nturu'i.

¹⁵ Ia tonna kumandemo Puang Isa sola anak gurun-Na jio bolana Lewi, ratumi buda to passassung laen sola to tonasangamo tau togaja', nakumande sola. Nasaba' budami tuu lako tau to nturu'mo Puang Isa.

¹⁶ Den ba'tu pira-pira guru agama jio mai to-Farisi ngkita Puang Isa kumande sola passassung na tonasangamo tau togaja'. Iamo joo, anna kutanaii to anak gurun-Na Puang Isa nakua, "Ciapari nakumande ora gurummu sola passassung na totangnturu' atoran agama?"

¹⁷ Nasa'ding Puang Isa to pekutananna, napebalii nakua, "Ia to tomalagah te'da naparallu tomangjampi, apa to tomasakira mparallui tomangjampi. Te'da kuratu la ntulung to tossanga kalena tomelo, apa ratura' ntulung tomadosa, anna mengkatoba'."

¹⁸ Den pissen na ia to anak gurunna Nabi Yahya sola anak gurunna to-Farisi puasai. Denmi tau ratu lako Puang Isa mekutana nakua, "Ciapari na anak gurunna manda Nabi Yahya sola anak gurunna to-Farisi to puasa, na te'da ia to anak gurun-Ta'?"

¹⁹ Napebalii Puang Isa mpake pangpasusian nakua, "Ianna botting to tau, misangaraka kumua te'da nawa'ding kumande to toratu! Ianna solapa tobotting muane, tantu te'da napuasa!

²⁰ Apa la den wattunna, naladiala jio mai tangnga-tangngana joo tobotting muane, iamo to Aku'. Ia joo wattu, mane'ri puasa to toratu, iamo tee anak gurung-Ku'."

²¹ Nakua pole' omo, "Te'da tau mpangtampiran pangcurikan baru lako baju maluse. Nasaba' la timporon joo pancurikan baru naca'ceanni joo baju maluse, nasaca'ce-ca'cena.

²² Susi toomi joo, te'da tau mpatama anggoro' baru tama pangpanian malusemo, to dikabua' jio mai balulang. Nasaba' ia namangkamburamo joo anggoro', tiba'tui joo pangpanian malusemo. Katampakanna, la sajang dua, joo anggoro' sola pangpanianna. Ia joo anggoro' baru, la dipatama todapi pangpanian baru!"

²³ Den pissen tonna Allo Katorroan nannola jioi bara'bah gose' Puang Isa, na ngge'te gose' to anak gurun-Na.

²⁴ Napasalai to-Farisi to Puang Isa nakuanni, "Kitari! Ciapari to anak gurun-Ta' nate'da naturu'i to atoran agamanta', anna pugaukki to dipemalian dipugauk ke Allo Katorroan?"

²⁵ Mebalimi nakua, "Tantu mibacamo to apa napugauk Daud, tonna tangbarahmo sola surudadunna, sanga te'damo apa nakande.

²⁶ Ia joo wattu, Abyatar menjaji Imang Lompo. Mentamami bola to dinii ssompa Puang Allataala, nakandei to roti dipangngolo lako Puang Allataala, naben tooi to surudadunna. Nasitonganna, ianna situru' atoran agamanta' imang manda ia to wa'ding ngkandei joo roti."

²⁷ Mangkada omi nakua, "Ia to Allo Katorroan dipaden dikua napumeloi tau. Tangngiara tau dipaden, dikua napumeloi Allo Katorroan.

²⁸ Puangnana' Allo Katorroan tee Aku', Anak Mentolino. Jaji makuasana' mpattantui apa to wa'ding dipugauk ke Allo Katorroan."

Markus

Video Markus 2

Ikuti Kami:

KONTAK | PARTISIPASI | DONASI