Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Pangeh tuda'-tuda' aco, idi Yésus nelemubed iné' déi' Kapernaum, id bala ratnan acingNeh déi' ruma' nepiar.
2 Idi mula' lemulun nepamung, pad na luk idi luk inan peh, macing ku munung tanga' pana'. Yésus nemada' Bala luk Do' kuandeh,
3 idi inan lemulun luk naté urat, luk binirir apat burur iné' matun Neneh.
4 Iamo' ideh na miak amé' muneng nan Yésus ngaceku pelaba ula' lemulun. Idi ideh nengukab apo su luk inanNeh ineh. Kareb ideh pangeh nengukab apo ineh, idi ideh nengurur birir lemulun luk naté urat ineh pa kiung Yésus.
5 Yésus nenier anudeh ineh, idi kebalaNeh nan lemulun luk naté urat ineh, "O anakKu, iko pangeh nengalap do' ratnan sala'mu."
6 Idi sebuang rat arang guru-guru Ukum luk tudo déi' nengerawé bang niatdeh,
7 "Ngudehké lemulun ini mekuu' nguyo Allah kudeng ineh? Idéké miak maré do' ratnan sala'? Inan Sebuleng mo', Ieh ineh Allah."
8 Kareb ineh teh Yésus nekali' ratnan ideh ngerawé kudeng ineh bang niatdeh, idi kebalaNeh nedeh, "Ngudehké muyuh ngerawé kudeng ineh bang niat muyuh?
9 Sapehké luk meluun malé, mala kuan lemulun luk naté urat ineh, 'Iko pangeh nengalap do'ké,' kian pebala, 'Tumui iko, ngiding luk inanmu rudap ine idi nalan'?
10 Ui ngegala' kuan muyuh ratnan Anak-Lemulun ngimet lalud bang tana' ini maré do' ratnan sala'." Idi kebalaNeh kuan lemulun luk naté urat ineh,
11 "Ui pebala namu, Tumui iko, ngiding luk inanmu rudap ineh idi muli'."
12 Idi ieh netumui, petacu nengiding luk inanneh rudap ineh idi neremuat siren lun mula', pad amung-amungdeh pana' mawa idi nengerayeh Allah, keburi'deh, "Nateh kai nekali' luk kudeng ini atun!"
13 Yésus nelemubed iné' tangeb Takung Galilia, idi lun mula' iné' Neneh, idi Ieh nemada' nedeh.
14 Kareb Ieh nelemaba, idi Ieh nenier Liwi Alpius tudo bang ruma' luk inan ngalap usin pupuk. Kebala Yésus neneh, "Do maya' Negku." Idi Liwi netuped idi nemaya' Neneh.
15 Kareb Yésus kuman bang ruma' Liwi, idi mula' lemulun luk ngamung usin pupuk idi lun mesala' pana' tudo dengan Yésus idi anak-anak sekola'Neh teh; ngaceku inan mula' lemulun luk kudeng ineh nemaya' Yésus.
16 Kareb guru-guru Ukum idi lun Parisi nenier Yésus kuman dengan lun mesala' idi lun luk ngamung usin pupuk ineh teh, idi kebaladeh nan anak-anak sekola'Neh, "Ngudehké Yésus kuman dengan lemulun luk kudeng ineh?"
17 Kareb Yésus neninger baladeh, idi kebalaNeh nedeh, "Lemulun luk do' ulun na ulek uen ngubat, iamo' lemulun luk mét. Baken Ui macing nawar lemulun luk matu, iamo' lemulun luk mesala'."
18 Idi anak-anak sekola' Yahya idi lun Parisi pana' uned mawa', idi ideh nacing ngitun Yésus, "Ngudehké anak-anak sekola' Yahya idi anak-anak sekola' lun Parisi pana' mawa', iamo' anak-anak sekola'Mu na mawa'?"
19 Idi kebala Yésus nedeh, "Miakké lun rurum deléi luk sikal ngaweh mawa' kareb ieh idi dengandeh? Kareb deléi luk sikal ngaweh ineh idi dengandeh na ideh mawa'.
20 Iamo' aconeh miak macing kareb deléi luk sikal ngaweh ineh miak lapen rat arangdeh, idi kareb ineh teh ideh miak mawa'.
21 "Na luk idi seburur lemulun luk mubpul aceh kuyu' luk mon ku kibung luk mebaruh, ngaceku kali' rungen bubpul ineh medarak, ieh ineh kibung luk mebaruh ngedarak luk mon ineh pad darakneh meluun rayeh peh.
22 Idi na luk idi seburur pana' ngutang abpa' anggur luk mebaruh bang seréi' kubil luk mon, ngaceku abpa' anggur ineh miak ngebila' seréi' ineh, idi abpa' anggur ineh pana' mutat, idi seréi' ineh mebila' peh. Iamo' abpa' anggur luk mebaruh miak ruen lemulun bang seréi' luk mebaruh."
23 Kareb Aco luk inan Mudeng Yésus nenalan lemaba lati'-lati', idi kareb ideh nalan anak-anak sekola'Neh nengalap runguh padé ineh.
24 Idi lun Parisi nepebala kuan Yésus, "Siruh anak-anak sekola'Mu nganau' luk bibpeng kareb Aco luk inan Mudeng?"
25 Idi kebala Yésus nedeh, "Natehké muyuh nemaca' luk inau' Daud kareb na luk kenenneh? Idi ieh dengan anak itinneh melau,
26 idi ieh nesemuet bang Ruma' Allah, idi nekuman ruti luk biré kuan Allah, kareb Abiatar Imam Rayeh. Maya' Ukum tau, imam-imam mo' luk miak kuman ruti ineh. Iamo' Daud nekuman ineh, idi ieh nemaré nelun denganneh teh."
27 Idi kebala Yésus nedeh, "Aco luk inan Mudeng inau' ngaceku lemulun, baken lemulun inau' ngaceku Aco luk inan Mudeng.
28 Ngaceku ineh Anak-Lemulun ineh Tuhan pa luun Aco luk inan Mudeng teh."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA