Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Kayaika 'ibibini de 'o 'Agamaka ma Hakimi 'iodumu, ge'enaka dau 'o 'imam ma sae-saeke de 'o Yahudioka ma balu-balusu, de 'o 'agamaka yodoto-dotoko, yosijai-jai yomaka'aturu. 'Ona 'o Yesus wipusuku de wi'asa 'o Pilatusika.

² 'O Pilatus wosano 'o Yesusika, "Ma goungu ngona 'o Yahudioka manga Koana?" 'O Yesus wosango, "Ia, 'isoka to ngona 'ani demo."

³ Deika 'o 'imam ma sae-saeke 'o Yesus wikalaki ka 'o gudai.

⁴ Ge'enaka de 'o Pilatus wosanoli 'o Yesusika, "Nooluku nomadasango? Bika nakimake koge'ena ma gudai nikalaki!"

⁵ Ma 'O Yesus ka ma eta ma kowosangowau, so 'o Pilatus woherangi.

⁶ Wakisisupu ma Wange 'isinoimi 'o Pilatus biasa wosisupu 'o bui ma nyawa moi moteke 'o kawasa manga mau.

⁷ 'O buioka yakisingosa-ngosamika 'o nyawa gee yosiru-ruahe de yoto-to'oma gee ma 'orasi 'iruahe, ge'enaka dau wimoi wi ronga 'o Barabas.

⁸ 'O kawasa yomatoomu de yoga'asoko 'o Pilatusika la wosisupu 'o bui ma nyawa wimoi 'isoka biasau 'una wodiai.

⁹ 'O Pilatus wakisano 'onaka, "Niomodeke 'o Yahudioka manga Koana gu'una towisisupu nginika?"

¹⁰ Sababu 'o Pilatus wanako 'ato 'o 'imam ma saeke witaleana 'o Yesusika, sigado wi'otaka 'unano.

¹¹ Ma 'o 'imam ma sae-saeke yosahu 'o kawasaka la yoga'asoko 'o Pilatusika 'ato 'o Barabas wisisupu 'onaka.

¹² So 'o Pilatus kawongosekau 'onaka, "Nako koge'ena de 'o nyawa gee winisironga 'o Yahudioka manga Koana gu'una kokia towidiai?"

¹³ De 'ona yoodumu yoma'orese, "Winisidele 'o salipoka!"

¹⁴ Duga 'o Pilatus wosanoli 'onaka, "Kokia 'awi sowono?" Ma 'ifoloisi 'iamokie yomapoaka, "Winisidele 'o salipoka!"

¹⁵ 'O Pilatus womau 'o nyawa yoku-kudai go'ona manga singina 'isanangi, so 'o Barabas wisisupu 'onaka. De 'awi solodado wosuloko 'o Yesus wipesana, 'asa de wosarakani wi'asa ma ngale wisidele 'o salipoka.

¹⁶ 'O solodado 'o Yesus wi'asa ma Koana wi kadato ma ginitarika. Ge'enaka de 'o solodado go'ona yaki'asoko yomalomu.

¹⁷ Deika 'o baju ma nikoto ya'ungu-'ungu 'isoka 'o Koana ma baju wisinoaku, de 'o gota ma da'ara 'ido-dodowoko yadiai 'o tuala so 'o Yesus wi saeoka yosinoaku.

¹⁸ Ge'ena 'iduanga de yotabea 'unaka, kayongosekau, "Suba Jou, 'o Yahudioka manga Koana!"

¹⁹ 'Ona wi saeoko yapapadi, deika wikibiti 'asa de yosuba 'awi bionoka.

²⁰ Wisisasaru 'iduanga de 'awi baju ya'ungu-'ungu ge'ena ya'aiki de yositagali to 'una ma sirete 'awi baju. Ge'enaka de wi'asa wisisupu 'o kota ma dudunika ma ngale wisidele 'o salipoka.

²¹ 'O ngekomo ma goronaka de wimoi wipakisaa 'o Yesus 'awi salip wamoku. 'O nyawa gu'una 'imakadaene 'o soanino 'asa kawoboa so wowosangou 'o kotaka. ('Awi ronga 'o Simon, 'awi 'asali 'o Kireneno. 'Una 'o Aleksander de 'o Rufus manga dea.)

²² 'O Yesus wi'asa 'o ngii moi ma ronga 'o Golgota, ngone tanu, "'O Saeke ma Kobongo ma Ngii."

²³ Ge'enaka yaika de 'o 'anggur gee 'isiganu-ganuku 'o gota ma tigono ma bounu yaowa-owa posironga 'o mur, yomau wikula 'o Yesusika ma waoluku.

²⁴ Ge'enaka de wisidele 'o salipoka, de 'awi pakeangi yomasibula-bula yodu'undi ma ngale nago'ona yamake.

²⁵ 'O takoro siwo 'o ngoru-ngorumika de wisidele 'o salipoka.

²⁶ 'Awi salip ma saekie 'idadu 'isilefoka wi kalaki ma demo, 'ingose, "'O Yahudioka manga Koana."

²⁷ De 'o Yesus yakisidisidele yamididi yo'ora-'ora, wimoi wi giniraoka, de wimoi wi gubalioka.

²⁸ [De koge'ena, 'idadiokau 'isoka 'isilefokau 'o Buku 'Itebi-tebinoka ge'ena la, "'Una wisido-doimi 'o nyawa yoti-tingkai mita."]

²⁹ 'O nyawa gee yaboa ge'enano ge'ena kayomagiwi-giwi ma de wisiti-tingoono 'o Yesusika. 'Ona kayongosekau 'unaka, "Ee ngonau gee nomau ma Jo'oungu ma Dutu 'awi Woa naruba deika nosigokoli ka 'o wange sa'ange ma dodaka.

³⁰ Bika no'uti ge'ena 'o salipoka, de nomasilaha!"

³¹ 'O 'imam ma sae-saeke de 'o 'agamaka yodoto-dotoko mita 'o Yesusika wisiti-tingoono. 'Ona yomakadongose moi de moi, "'Una 'idadi wakisilaha 'o nyawa 'iregu, ma 'una ma sirete kowa'akunuwa womasilaha!

³² Nako ma gou-goungu 'una 'o Israeloka manga Koana, ma Koana 'o Nyawa Wosilaha-laha ma Jo'oungu ma Dutu Wiiri-iriki, ge'ena 'ifoloi yaowa kone'ena de wo'uti 'o salipoka la ngomi mimake de miongaku 'unaka!" De yamididi gee yakisidisidelika de 'o Yesus mita wisimae-maeke.

³³ 'O wange 'ikoronako de 'o Palestina ma daeraa ge'ena 'itarusu kayasorogaku, ma do'ingo 'o takoro sa'ange.

³⁴ De 'o takoro sa'ange de 'o Yesus womapoaka waamo-amokie, "Eloi, Eloi lama sabakhtani!" Ngone tanu, "Jo'oungu ma Dutu, Jo'oungu ma Dutu, 'ido'oa so noimadaka?"

³⁵ Yamuruo naga ge'enaka gee yo'isene womapoaka de kayongosekau, "Bika niosigisenosi, 'una wo'asoko ma Nabii Eliaka!"

³⁶ De wimoi 'onaka gee wosijai-jai 'o spons wa'ese so wodawaruokasi 'o daluku ma cuka, ge'enaka de wosibilatuka 'o gotaka de wodutubo 'o Yesus wi 'urude. De kawongosekau, "Nou poda-damaasi polega-legasi, dua 'o Elia woboa wisiguti bolo ko'uwa ge'ena 'o salipoka."

³⁷ Ge'enaka de 'o Yesus womapoaka de wi ngomasa 'ipidili.

³⁸ Ma 'orasi ge'ena ma Jo'oungu ma Dutu ma sirete 'awi Ngii ma da-datoko 'iracanga 'itaga modidioka kadaku de 'isikauku sigado daukukuka.

³⁹ 'O solodado ma balusu gee woma'okode ge'ena 'o salip ma daarioka, wamake kokia 'o Yesus wosongene. De kawongosekau, "Ma goungu 'o nyawa nu'una ma Jo'oungu ma Dutu wi Ngowaka!"

⁴⁰ 'O nge-ngeweka yamuruo naga mita yomatingaika yolega-lega 'iodumu ge'ena. 'Ona ge'ena ngo Salome, ngo Maria Magdalena, de ngo Maria 'o Yakobus ka 'o dogu'uruosi de 'o Yoses manga 'esa.

⁴¹ 'Onau ge'ena gee 'o Yesus wiriwo-riwo de wimote-moteke ma 'orasi 'o Yesus ka 'o Galileakasi. De manga gudaiosi 'o nge-ngeweka 'iregu-regu ge'enaka dau gee yoboanou de 'o Yesus 'o Yerusalemuoka.

⁴² 'Iobirou, de 'o Arimatea ma nyawa wimoi wi ronga 'o Yusuf woboa. 'Una ge'ena 'o 'Agamaka ma Hakimi gee 'o nyawa wi'ise-'isene. 'Una mita womada-damaa ma 'orasi ma Jo'oungu ma Dutu wopareta ma ngale wokoana. Ma wange ge'ena, 'o durunga ma wange, ge'ena la ma bibinie de Pomaoma-omasa ma Wange. Sababu ge'ena 'o Yusuf kawomo-moroini waika 'o Pilatusika woga'asoko 'o Yesus 'awi songene.

⁴³ (15:42)

⁴⁴ 'O Pilatus woherangi wo'isenoka 'ato 'o Yesus wosongenokau de. So wosuloko 'o solodado ma balusu wi'asoko de wosano, "'O Yesus wosongene kanganosi?"

⁴⁵ Gee 'o solodado ma balusu gu'una wositotaroka 'o Pilatusika so wo'isenoka de wosidabi 'o Yusuf wa'ese 'o Yesus 'awi songene.

⁴⁶ Ge'enaka de 'o Yusuf 'o songene ma sa-sao 'isure-sure wo'ija, so gee 'o Yesus wi songene ge'ena wosigutiku, de ma mosa ge'ena wosisao. Ge'enaka de ma songene ge'ena wa'asa, so 'o bo'osuku ma sungi moi 'o tetoka yodosonotoika ge'enaka wodonoaka, de 'o teto moi wodololoika ma ngoranoka wositatokino.

⁴⁷ Ma 'orasi ge'ena ngo Maria Magdalena de ngo Maria 'o Yoses ma 'esa yolega-lega kiaka 'o Yesus wipo'osuku.

Markus

Video Markus 15

Ikuti Kami:

KONTAK | PARTISIPASI | DONASI