Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Sahulõ wongi sibai, ba mamagõlõ fefu ndra sanguhuku ba agama si fao ira ere sebua ba salaw̃a niha Yahudi awõ ndra sangila amakhoita. Labõbõ Yesu, ba la'ohe khõ Wilato.
2 Isofu Filato khõ Yesu, "Hadia sindruhu Razo niha Yahudi Ndra'ugõ?" Itema linia Yesu Imane, "Si manõ wanguma'õu."
3 La'oya'õ wangadu ira ere sebua sanandrõsa khõ Yesu.
4 Ifuli isofu zui Filato, "Hadia lõ omasi'Õ Õtema li? Wa'oya wangadura sanandrõsa khõ-U!"
5 Ba ma'ifu lõ Itema li Yesu, irege ahõlihõli dõdõ Wilato.
6 Ero'ero Owasa Fasa, si to'õlõnia i'efa'õ samõsa nikuru Filato molo'õ somasi niha sato.
7 Bakha ba gurunga, ba gotalua zamara'u si no mamunu niha me alua wa'udusa, so samõsa zotõi Baraba.
8 Owulo niha sato khõ Wilato, ba la'andrõ ena'õ i'efa'õ samõsa niha nikuru si mane si to'õlõ.
9 Isofu khõra Filato, "Hadia omasi ami na u'efa'õ Razo niha Yahudi andrõ khõmi?"
10 I'ila Filato wa labe'e ba dangania Yesu ira ere sebua bõrõ wa'afõkhõ dõdõra khõ-Nia.
11 Lafawe'e niha sato ira ere sebua ena'õ la'andrõ khõ Wilato wangefa'õ Baraba.
12 Ifuli muhede Wilato ba niha sato andrõ, "Na si manõ, hadia nilaugu ba niha nifotõi Razo niha Yahudi andrõ?"
13 Mu'ao ira lamane, "Forõfa Ia!"
14 Isofu Filato imane, "Ba hadia horõ-Nia?" Ba la'abõlõgõ we'ao, "Forõfa Ia!"
15 Ba omasi Wilato itõrõ zomasi dõdõ niha sato andrõ, i'efa'õ khõra Mbaraba. Aefa da'õ ifaw̃a'õgõ ba niha ena'õ labõbõzi Yesu ba awena ibe'e niforõfa.
16 La'ohe Yesu ira saradadu ba naha wanguhuku ba nomo gubernur. La'owuloi fefu zaradadu.
17 Aefa da'õ labe'e mbaru sobowo doru khõ Yesu, awõ dakula nifazõkhi moroi ba ndroi labe'e ba hõgõ-Nia.
18 Aefa da'õ ba la'owai Ia, lamane, "Ya'ahowu Razo niha Yahudi!"
19 Ba labõzi hõgõ Yesu faoma si'o, ladidiloi Ia ba lalau mangalulu fõna-Nia.
20 Me no aefa la'o'aya Yesu, ba labokai mbaru sobowo doru andrõ lafuli labe'e khõ-Nia nukha-Nia. Ba la'ohe Ia baero ba wamorõfa Ya'ia.
21 Me larugi dalu lala ba lafaso samõsa niha ba wolohe rõfa Yesu. Awena so niha andrõ moroi ba mbanua numalõ ba fasa. (Tõinia Simoni moroi ba mbanua Girene ama ndra Alesandro ba Rufu.)
22 Ba la'ohe Yesu ba zi sambua nahia sotõi Gologota, eluahania "Nahia Zole Hõgõ".
23 Ba da'e lafabadugõ khõ-Nia nagu nifaruka emuri, ba hiza lõ omasi Yesu Ibadu.
24 Aefa da'õ laforõfa Ia. Ba lafaosa nukha-Nia, lalau fadahõdahõ ba wangahonogõi dana ba zamõsana.
25 Alua wamorõfa andrõ bõzi siw̃a sahulõ wongi.
26 Yaw̃a rõfa-Nia no labe'e zinura wangadura khõ-Nia, ya'ia da'õ: "Razo Niha Yehuda".
27 Fao ba wamorõfa Yesu andrõ darua niha sorabu; samõsa ba gambõlõ ba samõsa tanõ ba gabera-Nia.
28 [Ba zi manõ alua nisura ba Mbuku Ni'amoni'õ; ya'ia: "No tebe'e ia awõ zebua horõ."]
29 Dozi niha sanõrõ ba nahia da'õ oi lafalikhõlikhõ ira ba la'o'aya Yesu. Lamane, "He Ya'ugõ somasi manudugõ Omo Lowalangi ba sangotomosi ya'ia ba zi tõlu ngaluo!
30 Tandraigõ ae'e tou moroi ba rõfa andrõ ba orifi'Õ!"
31 Si manõ gõi ndra ere sebua ba sangila amakhoita, la'o'aya Yesu. Faoma lamane khõ nawõra, "I'orifi niha bõ'õ, ba tebai I'orifi Ia samõsa!
32 Na Razo niha Gizera'eli Ia, Razo Sangorifi andrõ, akha mõi Ia tou moroi ba rõfa andrõ, ena'õ ma'ila ba mamati ndra'aga khõ-Nia!" La'o'aya gõi Yesu niforõfa andrõ si fao awõ Yesu.
33 Me laluo mato tõlu za wa'ara, ba ogõmigõmi danõ ma'asagõrõ.
34 Ba me bõzi tõlu tanõ owi, mu'ao Yesu ebua li-Nia Imane, "Eloi, Eloi, lama sabakhtani?" eluahania, "He Lowalangi-Gu, he Lowalangi-Gu, hana wa Õrõi Ndra'o?"
35 So õsa ba da'õ zamondrongo fe'ao andrõ lamane, "Mifondrondrongo, Ikaoni Gelia!"
36 Samõsa ba gotaluara i'alio'õ wanga'i rabo, ibe'e ba nagu saisõ. Aefa da'õ ibe'e rabo andrõ ba mbalõ geu, ifabadugõ khõ Yesu, imane, "Bõi ua! Da tafaigi hadia mõi Gelia ba wame'e Ya'ia tou moroi ba rõfa."
37 Ba hiza mu'ao Yesu ebua li-Nia ba aetu noso.
38 Ba asika mba'aba'a andrõ ba Nomo Zo'aya fabali dua i'otarai si yaw̃a irugi si tou.
39 Hõgõ zaradadu si zizio fõna rõfa andrõ, i'ila hewisa wa'amate-Nia. Imane hõgõ zaradadu andrõ, "Sindruhu Ono Lowalangi Niha andrõ!"
40 Ba da'õ so õsa ndra alawe samaigimaigi fefu salua andrõ moroi ba zarõu. Ba gotaluara so Zalome, Maria banua Magadala, ba Maria ina ndra Yakobo sawuyuwuyu awõ Yose andrõ.
41 Ya'ira ndra alawe solo'õlo'õ ba sanolo Yesu me so Ia ba Galilea. Ba ato ndra alawe bõ'õ ba da'õ si mõi ba Yeruzalema si no fao khõ Yesu.
42 No ibõrõtaigõ bongi me tohare Yosefo banua Garimatea. Ya'ia samõsa ndrotondroto Zanguhuku ba Agama nifosumange, ibalobaloi gõi hawa'ara ibõrõtaigõ wamatõrõ-Nia Lowalangi si mane Razo. Inõtõ wama'anõ luo da'õ (luo fatua lõ luo Sabato). Bõrõ da'õ lõ ata'u Yosefo we'amõi khõ Wilato ba wangandrõ boto Yesu.
43 (15:42)
44 Ba ahõlihõli dõdõ Wilato me irongo wa no mate Yesu. Ifatenge samõsa niha ba wogaoni hõgõ zaradadu ba isofu khõnia hadia no ara me mate Yesu.
45 Me irongo ni'ombakha'õ hõgõ zaradadu andrõ, itehegõ Filato khõ Yosefo ba wanga'i boto Yesu.
46 Ba i'õli muko si sõkhi Yosefo. Ba me no labe'e tou mboto Yesu moroi ba rõfa, i'olohuni faoma nukha andrõ. Aefa da'õ ibe'e mboto Yesu bakha ba lewatõ si bohou nikhao ba gara. Aefa da'õ ifagaõlõ gowe sebua ba wolagõ'õ bawa ndruhõ lewatõ andrõ.
47 Gasagasa da'õ ba lafaigifaigi ira Maria banua Magadala ba Maria ina Yose heza lako'o Yesu.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA