Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Kareb pekak uka-uka idi petacu imam-ima rayeh, lun rayeh-rayeh, guru-guru Ukum idi amungdeh luk nepamung ineh teh nepegayam arangdeh sebuleng. Ideh nengaling Yésus idi nenguit Neneh idi nemaré Neneh kuan Pilatus.
2 Idi Pilatus nengitun Neneh, "Ikoké Raca' lun Yahudi?" Idi kebala Yésus, "Kudeng luk bilamu."
3 Idi imam-imam rayeh nengadu' Yésus ratnan mula' bala.
4 Idi Pilatus nengitun Neneh teh, keburi'neh, "Naké Iko pian ngor sekua' pana'? Do' ngerawé inan mula' tu-tu adu'deh Namu."
5 Iamo' sebila' bala pana' nateh bila Yésus, pad Pilatus mawa.
6 Idi kareb Irau Paska, Pilatus pekalai muit kuandeh seburur lemulun luk tinutup, ieh ineh idé-idé luk pituendeh.
7 Idi inan seburur lemulun luk ngadanneh Barabas, luk tinutup pad-pad dengan lun luk dat, luk pangeh nengaté lemulun bang ria' luk inau'deh ineh.
8 Idi lun mula' ineh iné' matun Pilatus idi nemutuh neneh nganau' mepad kudeng luk pekalai.
9 Idi kebala Pilatus nedeh, "Sikalké muyuh ui muit Raca' lun Yahudi ineh kuan muyuh?"
10 Ieh nekali' idi imam-imam rayeh pangeh nemaré Neneh ngaceku ideh temaruh.
11 Iamo' imam-imam rayeh nengeria' nelun mula', pad ideh mutuh Pilatus muit Barabas kuandeh.
12 Idi kebala Pilatus nelun mula'. "Anunké luk ruenku kuan lemulun luk bila muyuh Raca' lun Yahudi ineh?"
13 Idi ideh nengitang teh, "Nalib Neneh!"
14 Idi Pilatus nepebala kuandeh, "Ngudeh, sala' anunké luk pangeh inau'Neh?" Idi meluun metueh ideh nengitang, "Nalib Neneh!"
15 Idi ngaceku Pilatus sikal ngawang niat lun mula' ineh, ieh nemuit Barabas kuandeh. Idi ieh nengecuk nedeh mebal Yésus idi nemaré Neneh uendeh nalib.
16 Lun pebunu' nenguit Yésus semuet bang sikang luk bang ruma' Lun luk Ngimet Ukum. Idi ideh nenawar amung-amung babpat lun pebunu'.
17 Ideh nengayung Yésus ku kuyu' luk sia' merirem, idi nengapid tabpa' ku pataNeh, idi ideh nengerareng ineh luun uluh Yésus.
18 Idi ideh nemaré tabi' kuanNeh, keburi'deh, "Tabi' Raca' lun Yahudi!"
19 Ideh nenecat uluhNeh ku aceh kayuh idi nengelica' Neneh, idi ideh netekeradung pa kiungNeh.
20 Idi pangeh ideh nesitunga Neneh, idi ideh nengelengu kuyu'Neh luk sia' merirem ineh rat Neneh, idi nengayung Neneh ku ayungNeh sebuleng. Idi ideh nenguit Neneh remuat pad Ieh miak uendeh nalib.
21 Idi inan seburur lemulun luk nelemaba déi' luk nacing rat mado, ieh ineh Simun lun Kiréni, luk taman Iskander idi Rupus, idi ieh sinaaddeh maan salib Yésus.
22 Idi ideh nenguit Yésus amé' déi' Golguta, luk ilungneh, Su luk inan Perupuk Uluh.
23 Idi ideh nenutun maré luk rupenNeh, ieh ineh abpa' anggur luk pinuar ku mur, iamo' na Ieh nengalap ineh.
24 Idi ideh nenalib Neneh, idi ideh nemabpat ayungNeh dengan nenala' udi, pad ineh miak uendeh mabpat kuan anid-anid bururdeh.
25 Idi kareb tangal mudik aco ideh nenalib Neneh.
26 Idi surat luk nengadu' Neneh pangeh inayud pa luunNeh, ieh ineh, "Raca' lun Yahudi."
27 Idi inan dueh burur lun luk dat luk sinalib peranga' denganNeh, seburur pa tinueh idi seburur pa kabingNeh.
28 Kudeng ineh luk pangeh mangun luk bila bang Surat Allah, keburi'neh, "Ieh inukum pad-pad dengan lemulun luk dat."
29 Lemulun luk lemaba nenguyo Neneh idi uluhdeh tuka'-tuka', keburi'deh, "Neh! Iko luk ngusag Ruma' Allah idi mudut neneh bang teluh aco kinioneh!
30 Do' temurun ratnan salib ineh idi ngulun bururMu sebuleng!"
31 Kudeng ineh teh imam-imam rayeh idi guru-guru Ukum nesitunga Neneh, keburi'deh seburur dengan seburur, "Ieh nengulun lun baken, iamo' na Ieh melalud ngulun bururNeh sebuleng!
32 O Keristus, Raca' lun Israil, do' Iko temurun ratnan salib ineh, pad kai miak nier idi manu." Idi didueh luk sinalib dengan Yésus ineh teh nengedat Neneh.
33 Kareb muned aco, idi aput tana' pana' medacem pad macing tangal musul aco.
34 Kareb tangal musul aco, idi Yésus nengitang, kebalaNeh, "Eloi, Eloi lema sabaktani?" luk ilungneh, "AllahKu, AllahKu, anunké punneh Iko necan Negku?"
35 Idi sebuang lemulun luk tuped déi' neninger tangNeh, idi ideh nepebala, "Ninger, Ieh nawar Elia."
36 Idi sebururdeh, nupun nguit lemut batu, idi ngerereb neneh bang abpa' luk malam. Idi ieh nenganau' ineh nan paped kayuh, idi nemaré ineh luun bibir Yésus, keburi'neh, "Aganeh, do' tau nier kudeng Elia sikal amé' nurun Neneh."
37 Iamo' Yésus nengitang, idi niatNeh neputut.
38 Idi dicing Ruma' Allah ineh pana' nedarak upa dueh, rat pa luun macing pa beneh.
39 Kareb lun rayeh lun pebunu' luk netuped pa atun salib ineh nenier kudeng apeh lawé Yésus naté, idi ieh nepebala, "Matu lemulun ini Anak Allah."
40 Inan teh tuda'-tuda' decur luk nenier amung ineh rat mado. Idi arangdeh ineh teh Mariam Magdalina, Mariam tinan Yakub luk isuut, Yusup, idi Salomé.
41 Decur ineh pangeh nemaya' Yésus idi nengasa' Neneh kareb Ieh déi' Galilia. Idi mula' teh decur luk baken luk nemaya' Neneh iné' Yerusalim.
42 Idi kareb malem aco, ngaceku aco ineh Aco luk Temina', ieh ineh aco luk atun ratnan Aco luk inan Mudeng,
43 idi Yusup lun Arimatia nacing. Yusup ineh seburur lun tebubpun besara' idi luk buren. Ieh sebuleng teh nganét Imet Allah, idi dengan mekuu' ieh iné' matun Pilatus idi nemutuh butung Yésus.
44 Pilatus mawa ratnan Yésus pangeh naté. Idi ieh nenawar lun rayeh lun pebunu' idi nengitun neneh kudeng Ieh pangeh mio naté.
45 Kareb Pilatus kali' bala lun rayeh lun pebunu', idi ieh nemaré butung Yésus kuan Yusup.
46 Idi Yusup pana' nemelih kibung luk do' idi nenurun butung Yésus, idi nengelilib neneh ku kibung luk do' ineh. Idi ieh nengerareng neneh bang tanem luk pangeh kinuer ratnan batu. Pangeh ineh ieh nengelubid sebuleng batu nepingakeb munung tanem ineh.
47 Mariam Magdalina idi Mariam tinan Yusup ineh pana' nenier su luk inandeh nengerareng Yésus ineh.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA