1 Subuhpa totok, bayongan mahkamah agama, imang mita itoi bo itoi mita intau Yahudi bo mototunduí mita kon agama nogaid kom portomuan motoyong. Onda intua sinogot monia lima i Yesus bo dinia pinosarahkan ko'i Pilatus.
2 Ki Pilatus noliboí ko'i Yesus, "Totu'u degaí kon Ikow nion Raja Intau Yahudi?" Ki Yesus notubag, "Natua in gumanmu."
3 Imang mita itoi noguman doman kom bayongan inta pinonapud monia ko'i Yesus.
4 Bui ing ki Pilatus noliboí ko'i Yesus, "Degaí diaí tubagan-Mu im pinonapud monia tua? Indongogaikah mobayong totok im pinonapud monia ko'i-Nimu!"
5 Ta'e tongaídon kibio-bioímai ing ki Yesus, sahingga noherang ing ki Pilatus.
6 Pomuḷoi im Poraya'an Singgai im Paskah, biasamai ki Pilatus momuli kon tobatuí tahanan inta pokipilií kon intau mobayong.
7 Kom bonu im ponjara tatua oyuíon intau tangoinya ki Barnabas. Sia pinonjara takin tongonumai intau inta nomarontak wakutu ing korusuhan sim mosia tua in nolimod.
8 Nomangkoidon nosipun intau mobayong bo nopo'igum ko'i Pilatus simbaí sia momuli kon tobatuí tahanan naí biasamai.
9 Daí iliboí i Pilatus ko'i monia, "Mo'ibog degaí im mo'ikow bulianku ko'i monimu in Raja Intau Yahudi tana'a?"
10 Sing kinota'auandon i Pilatus kon imang mita itoi tatua noposarahkan ko'i Yesus lantaranbií mo'intoi ko'i-Nia.
11 Ta'e imang mita itoi nondodak totok kon intau moaíntoí tatua simbaí ki Pilatus momulidon ko'i Barabas bo ogoi ko'i monia.
12 Daí iliboí bui i Pilatus kon intau moaíntoí tatua, "Aka natua yo onu in aidanku kon intau inta sinangoi monimu Raja Intau Yahudi?"
13 Mosia nomaḷuí, "Popopakuídon in Sia kong kayu pinoyotalempang!"
14 Ta'e iliboí i Pilatus ko'i monia, "Soaáḷ mora'at onu in inaidan-Nya?" Bo mosia kopiadon nomaḷuí, "Popopakuídon kong kayu pinoyotalempang in Sia!"
15 Mo'ibog ing ki Pilatus moposanang gina intau moaíntoí tatua, daí binuliannya ing ki Barabas ko'i monia. Onda intua sia nopotabaí in intau nosambok ko'i Yesus, bodongka pinosarahkan sim popopakuídon kong kayu pinoyotalempang.
16 Ki Yesus dinia in tontara mita kom baḷoi pongadilan kon istana i gubernur. Onda intua tontara mita inoinií noyosipun.
17 Bo ki Yesus iḷambungan monia in jubah nopars bo pinogaidan kom mahkota dodugian bo pinopobandow kon uḷu i Yesus.
18 Nopaḷut makow sinalam monia in Sia, kai monia: "Salam ko'i Raja Intau Yahudi!"
19 Onda intua binobakan monia in tungkud kon uḷu ing ki Yesus poḷat dinuyaían. Mo'iduduimai mosia tumungkud mosumbah kon tayowon-Nya.
20 Nopaḷut makow pinoyambaí monia ing ki Yesus, iḷongkutdon bui monia in jubah nopars tatua bo pinoḷutudon bui in ḷambung-Nya tontanií. Onda intua dinia pinoḷuai sim popopakudon kong kayu pinoyotalempang.
21 Kon daḷan mosia noyodungkuḷ in intau. (Ki Simon in tangoinya, -- nongkon Kirene -- ki amaí i Aleksander bo i Rupus.) Kabutuḷan sia nongkon desa bo mopobayak ing kotaí. Intau tatua pinakisa monia pinokipota'anan ing kayu pinoyotalempang inta popopakuían ko'i Yesus.
22 Ki Yesus dinia monia pinobayak in tobatuí tampat inta sinangoian Golgota "Tampat in Tengkorak".
23 Bo inogoian monia in anggur inta bina'ukan in mur (taḷong mobondu), ta'e doií in Sia nonginum.
24 Onda intua pinopopakuídon monia in Sia kong kayu pinoyotalempang, bo mosia nosilai kon ḷambung i Yesus ta'e muna norabut kon lot sin monantuí kon silai monia tontanií.
25 Jam sambilan doḷo-doḷom im pinopopakuían monia ko'i Yesus kong kayu pinoyotalempang dodai intua.
26 Bo kon limonik ing kayu pinoyotalempang tatua pinopopakuían doman monia im pais inta binalií monia alasan pinopopakuían monia ko'i-Nia. Nana'a im pinais tua: "Raja Intau Yahudi".
27 Dodai intua doyowa doman intau mogogagow im pinopopakuí kong kayu pinoyotalempang noyotakin i Yesus. Tobatuí kon dotaí ing koḷanan, tobatuí kon dotaí ing koḷoigi Yesus.
28 [Tua im moponyata kon nobaliídon onu inta aim pinais kom bonu im Buk Mosuci, nana'a: "Sia pinoyo'iap intau mita mora'at."]
29 Bayongan intau inta no'italib kon tua momombiling bo moningkule ko'i Yesus. Mosia mosingog, "Hei Ikow inta mo'ibog mogumpag kom Baḷoi i Allah bo bui moposindog kon daḷom in toḷu nosinggai.
30 Poponagkah kong kayu pinoyotalempang tanion bo posaḷamatdon in awak-Mu!"
31 Naí doman tua imang mita itoi bo mototunduí mita kon agama Yahudi moningkule ko'i Yesus. Mosia nosigumanan, "Sia moposaḷamat kon intau ibanea, ta'e awak-Nya tontanií diaí koposaḷamatan-Nya!
32 Aka totu'u in Sia Raja Israel, Raja Mopoposaḷamat, yo pomayakdon makow in tana'a Sia moponag nongkon kayu pinoyotalempang tatua, simbaí ontongon nami bo mopirisaya domandon ing kami ko'i-Nia!" Intau mita inta pinopopakuí kong kayu pinoyotalempang noyotakin i Yesus noningkule doman ko'i Yesus.
33 Naonda in no'utudon singgai, dunia sinimidip toḷu no jam ko'onggotea.
34 Bo wakutu in jam tigadon ḷoḷabungea, ki Yesus nomaḷuí noropot, "Eloi, Eloi, lama sabaktani?" inta mangalenya, "Oh Allah-Ku, oh Allah-Ku, nongonu sin taḷaían-Mubií in Aku'oi?"
35 Tongonumai intau kon tua nokodongog kom pinomaḷuían-Nya tatua, daí mosia noguman, "Indongogaikah, Sia nogoinií ko'i Elia!"
36 Daí tobatuí intau kon sigad monia tua ilimikat minayak nogamaí kon gabus bo pinoḷodok kon anggur bo'il. Gabus tatua pinoturaknya kon kayu topongkoí, bo sinonggoí pinodiug kom bibig i Yesus, poḷat noguman, "Oḷatdon mongo mo'iangoi ing ki Elia bo mopoponag ko'i-Nia kong kayu pinoyotalempang tatua."
37 Onda intua nomaḷuí ing ki Yesus bodongka minatoi.
38 Bo kon dodai doman tuata gorden kom bonu im Baḷoi Tuhan noberak nosilai doyowa nongkon omonikannya no'idapot in limonaganea totok.
39 Tobatuí porwira inta sinimndog makow kon tayowon kayu pinoyotalempang tatua, noko'ontong kon naíonda ing kinopopatoi Yesus, bo noguman in sia, "Totu'ubií kon ki Adiíbií i Allah in Sia na'a!"
40 Kon tua oyuíon doman tongonumai im bobay inta no'indoi nongkon noyayuk kon bayongan inta nobalií tatua. Kon sigad monia tua oyuíon ing ki Salome, ki Maria Magdalena bo ki Maria ki inaí i Yakobus inta nogu'odpa bo i Yoses.
41 Mosia tuata im bobay mita inta dinumudui bo biasamai motuḷung ko'i Yesus wakutu in Sia kong Galilea. Bo nobayongpa doman im bobay mita ibanea ing kon tua inta namangoi in Yerusalem noyotakin i Yesus.
42 No'ungkoḷomdon singgai bo namangoi ing ki Yusup intau in Arimatea. Ki Yusup na'a in tobatuí anggota Mahkamah Agama inta ihormatmai intau. Sia na'a inta mogoḷatmai kowakutu ki Allah mamangoi momarentah saḷaku Raja. Singgai intua singgaidon Pobasadia'an (tuata in singgaidon inta mopo'ikoḷom singgai in Sabat). Tuamai ki Yusup nokopobarani minayak in tayowon i Pilatus bo no'igum kom mayat i Yesus.
43 (15:42)
44 Noherang ki Pilatus nokodongog kong ki Yesus minatoidon. Daí tuamai pinoki'oniínya itoi in tontara bo pinoliboían mongo no'onggotdon degaí minatoi ing ki Yesus.
45 Naonda nokodongog kon laporan i itoi in tontara tatua, daí inogoidon i Pilatus ing ki Yusup mogamaí kom mayat i Yesus.
46 Bo notaḷui ing ki Yusup kon kaeng noaáḷus inta nomahaḷ sim pinobakut. Onda intua pinoponagdon mayat i Yesus tatua bodongka binakutnya ing kaeng tatua. Nopaḷut makow inukatnyadon mayat i Yesus kon tobatuí kuburan inta inaidan kom bonu im buḷud batu. onda intua ilitoi monia in tobatuí batu moḷoben bo pinolingkop kong ngara ing kubur tatua.
47 Wakutu intua ki Maria Magdalena bo ki Maria ki inaí i Yoses nonarukiramai mongo pino'ulid naíonda im mayat i Yesus.

Studi Alkitab lengkap, silahkan lihat Alkitab SABDA :: Markus 15
Studi Alkitab mobile, silahkan lihat Alkitab Mobi :: Markus 15
Studi Alkitab dengan Video LUMO, silahkan lihat LUMO Indonesia :: Markus

Download Aplikasi Alkitab Karaoke (BETA) Android:
https://play.google.com/store/apps/details?id=org.sabda.alkitabkaraoke