Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Wali ojo karoonya i Yesu mampotundeka tau boros ri woto mpantana, Ia malonso muni yako re ria. Pasi boros kojo tau to mangalulu ri payuNya.
2 Wali tempo etu seja re’e samba’a ngkai to masaki malobo, ia yau resi i Yesu. Tau etu mambokotu ri tango i Yesu pei mampue mampakabae Ia. Ia mamporapi darasawang, to’onya, “Pue, ane nuporoe, Komi nukurang mampakatao muni aku.”
3 Wali i Yesu mampotaka ia pei manganto’o, “Kuporoe. Korom matao munim si’i-si’i.” Wali ngkai etu mansaka matao muni. Tamo re’e saki malobo resi ia.
4 Wali ojo karoonya tau to masaki malobo rapakatao muni, i Yesu manganto’oka ia, “Intamo, pei ne’e kojo mangansaritaka sa’e palaong to nawali resi korom etu. Pei intamo njo’u to pampue pei to’oka ia mamparesa korom see ia damangkita korom roo muni masaki. Panewa kenika ia dua mba’a tonsi to darapampueka resi i Pue Allah singkonong ewa porenta i Musa. Apa tempo tau boros mangkita korom mangika pampue etu, palaong etu damawali tondong resi sira korom tamo re’e panyaki to malao.”
5 Wali yako etu i Yesu yau njo’u kota Kapernaum. Rata nja’u ria, re’e samba’a tau to si’a to Yahudi to mampago Ia, tau etu kepala ntentara to mangkepalang tentara to satu kaborosinya. Wali rata resi i Yesu, kepala ntentara etu mamporapika kojo resi Ia,
6 to’onya, “Pue, to papolaongingku ojo maturu-turu ri banua apa malulu koronya pasi masesa kojo naepe.”
7 Wali i Yesu manganto’o, “Aku dayau mampakatao muni ia.”
8 Pei kepala ntentara manganto’o, “O Pue, ne’emo Komi yau. Apa Komi bae kojo anggaMu, wali aku mangepe taa masipato Komi masua ri raya banuangku apa aku kodi anggangku. Pei Komi nempo ojo manganto’o gombo, to papolaongingku damatao muni.
9 Aku manasa palaong etu maya mawali apa aku seja tau to ri ara ngkuasa nsa’e pasi aku re’e seja tentara to ri ara ngkuasangku. Wali ane aku manganto’oka samba’a sira, ‘Inta,’ panewa tau etu yau. Pasi ane aku manganto’oka tau to yusa, ‘Ma’i rire,’ panewa tau etu ma’i. Pasi ane aku manganto’oka to papolaongingku, ‘Ika palaong to si’i,’ panewa ia mangika. Wali ane aku mamporentang tentarangku panewa sira mampolaika, taa manto’o Komi ane mamporentang panyaki nto papolaongingku.”
10 Wali tempo i Yesu mangandonge gombo ngkepala ntentara etu, Ia ipu rayaNya mampobuuka pangayanya. Pasi Ia manganto’oka tau to mangalulu Ia, to’oNya, “Gete, tau si’i tau to si’a to Yahudi, pei Aku manganto’oka komi, monso pu’u Aku tawa mangarata pasiwa samba’a komi to Israel to ewa wetu karoso mpangayanya.
11 Pasi Aku manganto’oka seja komi, ri tempo to darata, tempo i Pue Allah mawali Makole ri lino, tempo etu boros tau to si’a to Yahudi dama’i yako ri sambawo lino. Tau etu damasua seja damangkoni sindarandara pei i Abraham, i Ishak pasi i Yakub.
12 Pei boros komi to Yahudi to danarubak yau i mPue Allah. Kamonsonya ane ewa songka i mPue Allah komi to Yahudi semo to damawali tau to Makolenya i Pue Allah. Pei nempo ewa wetu pamporaniNya, pei re’e komi to tare pangayamu resi Aku. Wali see naka tau etu darapanasoka yau njo’u tampa to mawuri to longko yako i Pue Allah. Wali tau to nja’u tampa to mawuri etu, sira tumangi-mangi pasi sakangke’i baganginya.”
13 Wali ojo karoonya i Yesu manganto’oka tau gombo etu, Ia manganto’oka wo’u kepala ntentara, to’oNya, “Inta muni njo’u banuamu. Apa palaong to nuaya ngkomi etu damawali kojo.” Wali tempo etu semo to papolaong ngkepala ntentara etu rapakatao muni.
14 Wali yako etu i Yesu nayau njo’u banua i mPetrus. Tempo Ia masua nja’u ria Ia mangkita temanua i mPetrus to we’a jamo maturu-turu apa wojo.
15 Wali i Yesu mampotaka pale ntau we’a etu panewa ia mansaka roo muni yako wojo. Wali tau we’a etu mambangu pei mampalinggona i Yesu.
16 Wali yako etu, ojo kawurinya rao, ma’i tau mangangkenika i Yesu tau boros to naposuak measa pasi tau to masaki. Wali i Yesu mangarubak measa yako resi tau to raposuak etu ojo mangampake gomboNya semo. Pasi Ia mampakatao muni samparia tau to masaki etu.
17 Palaong etu nawali see tibanang gombo to nato’o nto pantuntu tuntu i mPue Allah, i Yesaya, tempo owi, to’onya, “Ia mangoko yau kasesa ngkoro ngkita, pasi Ia mampakatao muni panyaki ngkita.” Etu semo gombo to nato’o i Yesaya.
18 Wali boros kojo tau to mampago i Yesu pei makore tiku Ia. Pei ojo pangkita i Yesu tau boros etu Ia manganto’oka anaguruNya, “Yaumo kita njo’u sambote ndano.”
19 Pei ri katawanya sira yau, ma’i samba’a tau to mampoguru porenta i Musa, ma’i mangampago i Yesu. Ia manganto’o, “Guru, kuporani mawali yau anaguru ngKomi, wali aku damangalulu Komi nempo imbanjo danukayako.”
20 Wali i Yesu manganto’oka ia, “Ane asu maila, re’e wayau mbatu to nakaroo nsira, pasi ane tonsi, ia re’e seanya. Pei ane Aku, Wiyaa nto Lino, tare tampa to Akuja puenya daKukayore. Wali Aku mangepe korom bara taa nukurang mangalulu Aku apa taa todo.” Ewa wetu naika i Yesu mangansono tau to mampoguru porenta i Musa etu.
21 Panewa yako etu re’e wo’u samba’a tau to anaguru i Yesu seja, ia manganto’oka i Yesu, to’onya, “Pue, aku damangalulu seja komi, pei waika aku yau muni ruyu mangampeas kapate mpa’angku. Ane ia roomo namate yau pei aku room mampongkeli ia panewa aku dama’i wo’u damangalulu Komi.”
22 Pei i Yesu manganto’o, “Lulu Aku, pei biakamo tau to taa mangaluluka songkangKu, to raporapaka ewa tau mate, sira semo mampongkeli yunu nsira to matemo.”
23 Wali yako etu i Yesu mapone ri bangka pasi anaguruNya mangalulu seja Ia.
24 Pei ri raya mpalayag nsira, kodi majoli rata ngoyu to marimbo kojo see naka bombang mawali bose kojo. Bombang etu masua ri raya bangka nsira wali bangka etu dabukemo ue. Pei i Yesu, Ia re’e tongo ngkayoreNya.
25 Wali anaguruNya mangampago Ia pei mangalike. Sira manganto’o, “O Pue, palaes kami apa kita damate!”
26 Wali i Yesu manganto’oka sira, “Maka pei meka raya ngkomi? Kodi kojo pangaya ngkomi.” Yako etu i Yesu mambangu pei mamporentang ngoyu pasi bombang. Wali ngoyu pasi bombang etu mandoo yau, pasi rano etu mawali lindu kojo.
27 Wali anaguru i Yesu ipu kojo raya nsira pei masipotanaka samba’a pei samba’a, sira manganto’o, “Gete, sema kamonsonya tau si’i maka sakowa ngoyu pasi bombang mampalaika seja Ia?”
28 Wali yako etu sira dongka nja’u sambote ndano, nja’u lipu nto Gadara. Ojo kadongka nsira etu, ma’i dua mba’a tau to naposuak measa. Sira masuwu yako nja’u oyo nu dayo pei mangampago i Yesu. Tau dua etu maja’a kojo kiranya, see naka rapomoruka, wali tamo mawali tau to maroo ri lipu etu malinja liu ri tampa nu dayo etu.
29 Wali tau dua etu maroso loonya kaboo manganto’oka i Yesu, “O Ana i mPue Allah, kesaa ma’i Nupali resi kami? Wimba, Komi bara rata damangansesai kami ri katawanya rata temponya to masipato kami darahuku?”
30 Wali taa longko kojo yako resi sira re’e boros wawu ntau mangaliwu pangkoni.
31 Wali measa to mamposuak tau dua etu sira mamporapika resi i Yesu, pei manganto’o, “Ane Komi mangarubak kami yako resi tau dua si’i, pokauka kami malimba damasua ri wawu etu.”
32 Wali i Yesu manganto’oka sira, “Intamo.” Wali tempo etu measa nasuwumo yako ri tau dua etu panewa masua ri wawu boros. Tempo wawu etu naposuak measa, sira maripo yau lo’u woto mpantana rata la’u raya ndano. Wali wawu etu malodong yau samparia.
33 Wali ojo kalodong yau mbawu, to pangkampang wawu etu sira miyai. Sira maripo lo’u kota. Rata la’u ria sira mampakarebaka resi tau mangkonong samparia palaong to nawali etu. Pasi sira mampakarebaka seja mangkonong anu to nawali resi tau dua to naposuak measa.
34 Wali ojo pangandonge ntau ri kota etu kareba to nato’oka nto pangkampang wawu resi sira, sira samparia yau mangampago i Yesu. Ojo karata nsira resi Ia, sira marapi kojo resi Ia see Ia damiyai yako ri lipu nsira.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA