Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Pendauluna Yesu hangko i tongku-tongkuna, bosa tauna meula Iria.

² I tempo iti, maimi hadua tauna au ketangga molingkudu motumpa i lindona Yesu, nauli: "Pue, kuisa kaNubukuna mopakaohana. Ane Nuunde, pakaohana wongkoya!"

³ Napetobomi Yesu tauna iti, Nauliangaa: "Kuunde mpuu. Maohamoko!" Tempo iti peawomi, maoha.

⁴ Roo indo, nauli mbuli Yesu iria: "Inee nupopololita i hema pea apa au mewali inona. Laomoko hampai nupetudungia watamu i tadulako menomba bona naita kamaohamumi, hai nuantimi popenombamu moula parenta au teuki i lalu Aturana Musa, bona tongawa i ope-ope tauna kamaohamumi."

⁵ PesuaNa Yesu i boea Kapernaum, hawemi hadua tadulakonda surodado to Roma mampohidupaa Yesu hai merapi tulungi,

⁶ nauli: "Tua, hawingku au ara i sou, rumihi kamahaina. Maturu liliu pea anti pantodihana."

⁷ Nauli Yesu: "Ina laoNa mopakaoha."

⁸ Nahanai tadulako surodado iti: "Barana hintoto Nusondaki. Kehapiri hantepo pea lolitaMu Nuuli, hangangaa maoha hawingku.

⁹ Kuisa Oyo au makuasa mobabehi iti, lawi iko ide, ara wori au i wongkoku, hai ara worihe au kupohawaa. Ane rapana kupohawaa hadua surodado, kuuliangaa: 'Laoko!' hangangaa lao. Ane kukakio surodado au ntanina: 'Maiko!' hangangaa mai. Ane kuuliangaa hawingku: 'Babehi iti!' hangangaa nababehi. Nodo wori Oyo Tua, apa au Nuuli inde, itimi au ina mewali i soungku."

¹⁰ Tingkara Yesu mampehadingi lolitana tadulako surodado iti. Ido hai Napembalilingimohe au meula Iria, Nauli: "Mahile ntepuu pepoinalaina tauna ide! Kehapiri i to Isaraeli, bara mani ara hadua Kuhumba au mahile pepoinalaina nodo tauna ide au bara to Yahudi.

¹¹ Mewali, bona niisa: i lalu poparentaNa Pue Ala, bosa tauna au barahe to Yahudi ina mewali taunaNa. Ina maihe hangko i pembetoa alo hai hangko i katampua alo, mohudahe hai maande matana-tanahe i lalu suruga hihimbela hai Burahima, Isaki hai Yako, toiyorunda to Yahudi.

¹² Katouana, ketoYahudimi au hintoto mewali taunana Pue Ala i lalu poparentaNa. Agayana bosahe ina ratende i lalu kakaindiana au karao hangko i Pue Ala. Inditi, ina moteria hai mantodiha liliuhe."

¹³ Roo indo, nauli Yesu i tadulako surodado iti: "Mesulemoko, lawi apa au nupoinalai ina mewali." Tempo iti, maoha mpuumi hawina au mahai i souna.

¹⁴ Hambela tempo, Yesu lao i souna Peturu. Inditi, Naita pengantina Peturu au towawine maturu i paturuana lawi napawembe.

¹⁵ Nakingkimi Yesu tayena towawine iti, liliu maoha. Hangko inditi, ia mearomi hai morora Yesu.

¹⁶ Kalumbami, bosa tauna mai i Yesu moanti ranganda hai halalunda au mahai hai au napesawii seta. Yesu mampopeloho seta iti hai lolitaNa pea, hai tauna ntanina au mahai Napakaoha worihe.

¹⁷ Ope-ope au nababehi Yesu ide mopabukeimi lolitana nabi Yesaya hangkoya au manguli: "Iami au mohalea pantodihanta hai mopakaoha hakinta."

¹⁸ Hambela tempo, bosa mpuu tauna motoleliki Yesu. KaNaitanda, Ia motudu topeguruNa mowetahe lao i tanda orupena rano.

¹⁹ I tempo iti, ara hadua guru agama to Yahudi au mai i Yesu, nauliangaa: "Guru, iumba pea kalaoaMu, kupeinao meula Irio!"

²⁰ Nahanai Yesu, Nauli: "Serigala ara kalolunda, hai tadasi ara haranda, agayana Iko, Ana Manusia, bara ara sou au Kupaturui."

²¹ Roo indo, ara wori hadua tauna au meula Iria au manguliangaa: "Pue, Nupaliuna hampai lao motawu umangku."

²² Agayana nauli Yesu iria: "Meulako Iriko! Pogiangamohe tomate motawu hangka tomatenda."

²³ Hangko inditi, mesawimi Yesu i lalu duanga hihimbela hai topeguruNa, pane meangkamohe.

²⁴ Unga pea keangi mata au rumihi i rano, alana balumba morumpa duanganda. I tempo iti, Yesu tangana leta.

²⁵ TopeguruNa lao morua, rauliangaa: "Pue! Tulungingkai! Ina marugike!"

²⁶ Yesu mouliangaahe: "Moapari hai langakau? Ikamu ide makura gaga pepoinalaimi." Mearomi Yesu hai liliu mokambaroa himburu hai balumba i rano. Unga pea lene rano.

²⁷ Tingkara mpuuhe topeguruNa, rauli: "Hemari tauna ide pane himburu hai balumba moula hawaNa!"

²⁸ Kateduunda i tampo Gadara i hambali rano, maimohe rodua tauna au napesawii seta mampohidupaa Yesu. Hawehe hangko i talumba lawi maida-idahe inditi. Tauna au rodua iti rumihi kakadakenda, ido hai barapi ara tauna au bai moliu inditi.

²⁹ Monganga-ngangahe seta au mesawihe iti, rauli: "Anana Pue Ala! Moapari hai maiKo? Ineengkai Nuhuku! Bara mani hawe tempona Nupakaparingkai."

³⁰ Bara karao hangko inditi, arahe boe hambanguna tanganda masui.

³¹ Seta au mesawi i tauna iti merapi i Yesu, rauli: "Ane hangangaa Nupopelohongkai hangko inde, Nutudungkai mesua i boe itihe."

³² Nauli Yesu: "Laomokau!" Meloho mpuumohe seta iti liliu mesua i boe. Melangkahe boe iti lao mengkanawo i rano pane matehe maliso.

³³ Tauna au mokampai boe iti moitahe apa au mewali i boenda hai apa au mewali i tauna au napesawii seta iti. Melangkamohe lao i boea mopahawe apa au mewali.

³⁴ Ido hai mokoloromohe mai ampu boea mampeinao mampohidupaa Yesu. Karaitana Yesu, mamperapihe bona Ia padu hangko i boeanda.

Matius

Video Matius 8

Ikuti Kami:

KONTAK | PARTISIPASI | DONASI