Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Mõi mitou Yesu moroi ba hili, ba ato niha solo'õ Ya'ia.
2 Me inõtõ da'õ tohare samõsa zofõkhõ bou auri. Ibalõduhini danõ niha andrõ wangalulu khõ Yesu, imane, "He ama, na omasi Ndra'ugõ, tola Õfadõhõ ndra'o."
3 I'oro'õ danga-Nia Yesu ba wombambaya ya'ia. Imane Yesu, "Omasi Ndra'o. Ya dõhõ ndra'ugõ!" I'anema'õ aheta mbou auri andrõ ba dõhõ ia.
4 Aefa da'õ Imane khõ-Nia Yesu, "Tõngõni, he! Bõi ombakha'õ zalua andre gofu ha'õkhõ. Ae'e khõ gere, ena'õ i'a'aro'õ dõdõu wa no dõhõ ndra'ugõ. Na no aefa da'õ, be'e zumange si mane niw̃a'õ Moze, ena'õ tobali famaduhu'õ ba niha wa no dõhõ ndra'ugõ!"
5 Me numalõ Yesu ba Gafana'uma, i'ondrasi Ia samõsa gomandra zaradadu Roma, ba wangandrõ tolo khõ-Nia.
6 "He Ama," imanõ komandra zaradadu andrõ, "mofõkhõ genonigu ba nomo. No mõrõ manõ bõrõ wa'ombuyumbuyu ba nahia wemõrõ ba no fondrege wa'afõkhõ nitaõgõnia."
7 "Lau," Imanõ Yesu, "mõi Ndra'o dania wamadõhõ ya'ia."
8 Itema li komandra zaradadu andrõ, "Bõi sa'ae, Ama, tenga sinangea Õfakao Ndra'ugõ we'amõi ba nomogu. &Wa'õ manõ wehede ba dõhõ dania genonigu andrõ.
9 Lõ zi lõ tola lõ u'o'õ li zebua moroi khõgu. Si manõ gõi zaradadu si so winaeta tougu, lõ tola lõ i'o'õ ligu. Na ukaoni ia, 'Aine ba da'e!' ba mõi ia; ba na uw̃a'õ ba genonigu, 'Fazõkhi da'e!' maoso ia ifazõkhi."
10 Ahõli dõdõ Yesu me irongo niw̃a'õ zaradadu andrõ. Andrõ Iw̃a'õ ba niha solo'õ Ya'ia, "Mifondrondrongo! Lõ ni'ila-Gu wamati si mane da'e ba gotalua niha Gizera'eli.
11 Mitõngõni da'e! Ato dania niha soroi ba gaekhula ba ba gatumbukha si fao fa'omuso dõdõ khõ Gaberahamo, Iza'aki ba Yakobo bakha ba Mbanua si Bohou khõ Lowalangi.
12 Ba ya'ira sindruhu ono mbanua Lowalangi andrõ i nitibo'õ baero ba zogõmigõmi dania. Ba da'õ alua wege'ege awõ wa'afõkhõ."
13 Aefa da'õ Imane Yesu khõ gomandra zaradadu andrõ, "Fuli'õ, hadia nifatimõ andrõ tefalua khõu dania." Ba da'õ sibai i'anema'õ dõhõ wõkhõ genoni andrõ.
14 Mõi Yesu ba nomo Wetero. Ba da'õ I'ila mofõkhõ fogikhi matua Wetero ira alawe, no so ia ba naha wemõrõ.
15 Ibabaya dangania Yesu ba dõhõ wõkhõnia andrõ. Maoso ia we'amõi enoni Yesu.
16 Me ahatõ tanõ owi, ato niha sobekhu ni'ohe khõ Yesu. Faoma fehede-Nia manõ Ifoloi mbekhu awõ wa'Ifadõhõ zofõkhõ andrõ Yesu.
17 Me Ifalua da'õ fefu Yesu, ba alua zi mane niw̃a'õ Yesaya sama'ele'õ, imane, "Itaõgõ wamakaoda ba ifadõhõ fefu wõkhõda."
18 Ato sibai niha samasui Yesu. Me I'ila ira fefu Yesu, Iw̃a'õ khõ ndra nifahaõ-Nia ena'õ mõi ira yefo nidanõ.
19 Samõsa zangila amakhoita zangondrasi Ya'ia sanguma'õ, "He Guru, omasi ndra'o u'o'õ Ndra'ugõ gofu heza!"
20 Itema linia Yesu, "So dõgi ba nasu gatua, ba so gazuni ba wofo, ba Ono Niha nifatenge Lowalangi, lõ khõ-Nia nahia wemõrõ ba wolombase."
21 Samõsa ba gotalua zolo'õ Ya'ia zanguma'õ, "He Tuha, tehegõ khõgu wangawuli ba wogo'o amagu."
22 Itema linia Yesu, "O'õ ndra'o, akha lako'o zi mate khõra niha si mate."
23 Mõi ba dundraha Yesu ba fao khõ-Nia ndra nifahaõ-Nia.
24 I'anema'õ so nangi sabõlõbõlõ sibai ba mbaw̃a irege ebua ndrulu samõzi tundraha. Me inõtõ da'õ no Ilau mõrõ Yesu.
25 Mõi khõ-Nia ndra nifahaõ-Nia wanusugi Ya'ia. "He So'aya! Tolo, orifiga! Tekiko ndra'aga!" lamanõ we'ao.
26 Imane Yesu, "Hana wa'ata'u ami? Ambõ famatimi!" Aefa da'õ muzizio Yesu ba Ifahono nangi awõ ndrulu. Awena ahono sibai nidanõ.
27 Fefu niha si so ba da'õ oi ahõlihõli dõdõra. Lamane, "Haniha niha andre, angi ba dulu la'o'õ li-Nia!"
28 Irugi Yesu yefo mbaw̃a ba mbanua Gadara. Ba da'õ laba'a Ia darua niha sobekhu samu'i sibai. La'otarai lewatõ ba oi ata'u niha wanõrõ lala andrõ.
29 Mu'ao ira, "He Ono Lowalangi, hadia nilau-Mõ khõma? Hadia omasi'Õ Õhuku ndra'aga? Hiza, tenga inõtõ nasa?"
30 Lõ arõu moroi ba da'õ, so ngawawa mbawi sangalui gõra.
31 La'andrõ bekhu andrõ khõ Yesu, "Na omasi Õfofanõ ndra'aga, fatengega ba mbawi andrõ."
32 Imane Yesu, "Mi'ofanõ!" Larõi bekhu niha andrõ lasaw̃a ngawawa mbawi. Lafazaumba si tou ira bawi andrõ moroi ba ngõfi mbaho, adõlõ ba mbaw̃a, alõmõ ba mate.
33 Moloi zanaro bawi andrõ lasaw̃a mbanua, ba latutunõ fefu hadia zi no alua ba niha si darua andrõ sobekhu.
34 Ba fefu niha ba mbanua da'õ gõi mõi lafaondragõ Yesu. Ba me la'ila Yesu, la'andrõ sibai khõ-Nia ena'õ Irõi mbanuara andrõ.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA