Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Sanggah tuad Jesus hun dolog ai, buei do halak na mangirikkon-Si.
2 Jadi roh ma sada halak na gadamon marsombah hu Bani, nini ma, “Tuhan, anggo ra Ham, tarpasusi Ham do ahu!”
3 Jadi isurdukkon Jesus ma tangan-Ni, ijamah ma ia lanjar nini ma, “Ra do Ahu, susi ma ham!” Jadi mintor malum ma gadamni ai.
4 Dob ai ihatahon Jesus ma hu bani, “Jaga, ulang patugah ham age bani ise. Tapi laho ma, patidak ham ma dirimu bani malim, anjaha boan ham ma galangan, songon na niaturhon ni si Musa, gabe hasaksian bani sidea.”
5 Dob masuk Jesus hu huta Kapernaum, roh ma hu Bani sahalak kopala ni tentera mangelek-elek-Si, nini ma,
6 “Tuhan, tibal-tibal do i rumahku juakjuakku, oyangon do ia, borit do iahap.”
7 Nini Jesus ma mambalosisi, “Roh pe Ahu pamalumkonsi.”
8 Dob ai nini kopala ni tentera ai ma mambalosi, “Tuhan, seng talup ahu, roh Ham masuk hu rumahku, sangkababah hata gelah hatahon Ham, jadi malum ma juakjuakkai.
9 Gari ahu, jolma na i toruh ni parentah, anjaha na mamarentah tentara homa, anggo huhatahon bani sada halak, ʻLahoʼ, jadi laho ma ia, bani halak na legan ʻRohʼ, jadi roh do ia, sonai homa bani juakjuakku, ʻHorjahon onʼ, jadi ihorjahon do ai.”
10 Manangar ai, longang ma Jesus, jadi nini ma bani halak na mangirikkon-Si ai, “Na sintong do Hatang-Kon bani nasiam, gari bani halak Israel seng jumpah Ahu haporsayaon na sonin.
11 Tapi Huhatahon ma bani nasiam, buei do halak na roh magira hun hapoltakan pakon hun hasundutan gabe hasoman sapanganan ni si Abraham, si Isak ampa si Jakob ibagas Harajaon nagori atas ai.
12 Tapi anggo anak ni harajaon in hinan, siusiron do in bani na golap marimpot-impot, ijai ma masa partangison ampa na patungosngoson.”
13 Dob ai ihatahon Jesus ma hubani kopala ni tentera ai, “Laho ma ham, jumpah ham ma domu hubani haporsayaonmu ai!” Jadi malum ma juakjuak ai bani panorang ai.
14 Dob masuk Jesus hu rumah ni si Petrus, ididah ma tibal anturang ni si Petrus, pane-paneon.
15 Jadi ijamah ma tanganni, lanjar laho ma pane-pane ai hun bani. Hundul ma ia, anjaha iidangi ma Ia.
16 Dob golap ari, roh ma halak mamboan hu Bani buei halak na setanon. Iusir ma setan-setan ai marhitei hata-Ni, anjaha ipamalum ma sagala na boritan,
17 ase jumpah na hinatahon ni Nabi Jesayas, na mangkatahon, “Ia do mangusung hasombuhonta anjaha iporsan do naboritta.”
18 Sanggah ididah Jesus roh halak na mabuei manginggoti-Si, ihatahon ma hubani susian-Ni ai, ase laho sidea mandipar.
19 Jadi roh ma sahalak sibotoh surat hu Bani, nini ma, “Guru, sihol do ihutkononku Ham, atap huja pe Ham laho!”
20 Nini Jesus ma dompaksi, “Na marliang do sorigala, anjaha na marasar do manuk-manuk na i awang-awang, tapi anggo Anak ni Jolma in, seng dong Bani hatibalan ni ulu-Ni.”
21 Sada halak na legan humbani susian-Ni ai mangkatahon hu Bani, “Ham Tuhan, lopas Ham lobei laho ahu mananom bapangku!”
22 Tapi nini Jesus ma dompaksi, “Ahu ma ihutkon! Paturut ma na matei in mananom na mateini!”
23 Dob ai masuk ma Jesus hubagas parau, jadi iihutkon susian-Ni ma Ia.
24 Jadi roh ma haba-haba na doras i tao ai, pala isangkobi gilumbang parau ai, tapi tarpodom do anggo Ia.
25 Jadi roh ma sidea mamuhoi-Si, nini sidea ma, “Tuhan, urupi, harom ma hita!”
26 Ihatahon Jesus ma hubani sidea, “Mase mabiar hanima? Otikni in haporsayaonnima!” Jadi jongjong ma Ia, ihata ma logou pakon tao ai, gabe minop tumang ma.
27 Longang bei do jolma ai, nini, “Ise do halak on, ase logou ampa tao pe mambalosi parentah-Ni?”
28 Dob das Ia i dipar, i tanoh ni halak Gadara, roh ma hun tanoman dua halak na setanon manjumpahkon-Si. Jangin tumang do sidea, pala seng tarbontas atap ise dalan ai.
29 Tonggor ma, mardilo-dilo do sidea mangkatahon, “Mangaha Ham roh bennami, Ham Anak ni Naibata? Roh do Ham hape manunsahi hanami bani na so panorangni ope!”
30 Seng pala daoh humbani sidea adong do sahulanan bolon babuy manggagati.
31 Jadi ipindo setan-setan ai ma hun Bani, “Anggo na maningon do usiron-Mu hanami, suruh Ham ma hanami masuk hubagas babuy na sahulanan ai.”
32 Nini Jesus ma hubani sidea, “Misir ma!” Jadi luar ma sidea, imasuki ma babuy ai. Anjaha tonggor ma, mardabuhan ma babuy na sahulanan ai hun salansah ai hubagas tao ai, gabe mogap ibagas bah ai.
33 Jadi maporus ma siparmahan babuy ai, anjaha dob das sidea i huta, ibaritahon sidea ma haganup, sonai homa na masa bani na setanon ai.
34 Anjaha tonggor ma, kaluar ma haganup parhuta ai manjumpahkon Jesus. Dob pajumpah, ipindohon sidea ma hu Bani, ase misir Ia hun tanoh ni sidea.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA