Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ "Ndaq side pade hakimin dengan lain, adẽq side pade ndẽq tehakimin siq Allah.

² Sẽngaq berembẽ entande hakimin dengan lain, maraq nike ẽndah Allah gen hakimin side pade. Ukuran saq side pade kadu lẽq dengan lain, nike ẽndah gen tekadu siq Allah lẽq side pade.

³ Kembẽq side pade pedasang bubuk kayuq lẽq dalem penenteng semetonde, padahal balok lẽq dalem penentengde, ndẽq side pade perhatiang?

⁴ Berembẽ side pade bau bebase lẽq semetonde, 'Alurang tiang sugulang bubuk kayuq saq araq lẽq penentengde,' padahal lẽq dalem penentengde mẽsaq araq balok?

⁵ Hai dengan munapik! Sugulang juluq balok lẽman penentengde mẽsaq, baruq side bau pedas serioq dait bau nyugulang bubuk kayuq lẽman penenteng semetonde.

⁶ Ndaq ngebẽng barang saq suci tipaq acong, dait ndaq side saut mutiarende tipaq bawi, adẽq ndaq ie icaq-icaq kadu naẽne terus ie bebalik garang side."

⁷ "Pade tunas, make side pade gen nerimaq. Pade boyaq, make side pade gen mauq. Pade ketok lawang, make side pade gen tebukaqang lawang.

⁸ Sẽngaq dengan saq nunas gen nerimaq; dengan saq boyaq gen mauq; dait dengan saq ngetok lawang, gen tebukaqang lawang.

⁹ Lẽq antare side pade napi araq bapaq saq ngebẽng batu lẽq bijene, lamun ie ngẽndẽng ruti?

¹⁰ Atao ngebẽng ulah lamun ie ngẽndẽng empaq?

¹¹ Jari, lamun side pade saq jahat, tao ngebẽng saq bagus lẽq bije-bijende. Lebih-lebih Bapa side pade lẽq sorge! Ie lebihan malik gen ngicanin saq bagus tipaq sebilang dengan saq nunas lẽq Ie.

¹² Perlakuang dengan lain maraq side pade mẽlẽ teperlakuang siq ie pade. Nike intine selapuq Hukum Taurat dait kitab nabi-nabi."

¹³ "Silaq tame lẽman lawang saq supit, sẽngaq lawang dait langan saq nuju ojok nerake nike belẽq dait gamber, dait luwẽq dengan saq tame liwat derike.

¹⁴ Laguq mule supit dait sengke lawang dait langan saq jauq dengan tipaq idup nike. Dait cume sekediq dengan saq ndait lawang dait langan nike."

¹⁵ "Onyaq-onyaq tipaq nabi-nabi palsu. Ie pade dateng tipaq side pade nyamar maraq dombe, laguq ie pade setetune maraq serigale saq buas.

¹⁶ Side pade gen kenal ie pade lẽman hasil perbuatanne. Bebenes bedui ndẽq nyugulang buaq anggur, dait pupaq bedui ndẽq ngasilang buaq are.

¹⁷ Lẽman lolo saq solah tehasilang buaq saq solah. Dait lẽman lolo saq ndẽq solah tehasilang buaq saq ndẽq solah.

¹⁸ Lolo saq solah ndẽq bau ngasilang buaq saq lengẽ, dait lolo saq ndẽq solah ndẽq bau ngasilang buaq saq solah.

¹⁹ Sebilang lolo saq ndẽq ngasilang buaq saq solah, terebaq dait tesedut.

²⁰ Maraq nike ẽndah halne nabi-nabi palsu. Side pade gen kenal ie pade lẽman hasil perbuatanne."

²¹ "Ndẽqne sebilang dengan saq ngempoh Tiang, 'Junjungan Saq Mulie, Junjungan Saq Mulie,' saq gen tame ojok dalem Kerajaan Sorge, laguq cume dengan-dengan saq ngelaksaneang pekayunan Bapa Tiang lẽq sorge.

²² Lẽq jelo kiamat, luwẽq dengan gen bebase lẽq Tiang, 'Junjungan Saq Mulie, Junjungan Saq Mulie, tekan siq pesẽngan Pelungguh tiang pade sampun benubuat, siq pesẽngan Pelungguh tiang pade sampun sediq roh-roh jahat dait siq pesẽngan Pelungguh ẽndah tiang pade ngaraqang luwẽq muqjizat?'

²³ Laguq Tiang gen jawab ie pade, 'Tiang ndẽq uwah kenal kance side pade. Nyedi lẽman taoq niki! Side pade saq gawẽq jahat!'"

²⁴ "Dengan saq dengah manik Tiang niki dait ngelaksaneang hal nike, dengan nike pade maraq dengan bijaksane saq penganjeng balẽne lẽq atas batu.

²⁵ Lẽq waktu turun ujan, dait aiq belabur dateng terus angin belẽq timpe balẽ nike, balẽ nike ndẽq ruk sẽngaq tepenganjeng lẽq atas batu.

²⁶ Dait dengan saq dengah manik Tiang niki laguq ie ndẽq ngelaksaneang hal nike, dengan nike pade maraq dengan saq bodo, saq penganjeng balẽne lẽq atas gerẽs.

²⁷ Lẽq waktu turun ujan, dait aiq belabur dateng terus angin belẽq timpe balẽ nike, balẽ nike gen ruk dait luwẽq gati sẽdene!"

²⁸ Ahirne Deside Isa selesẽ ngajahang, dait dengan-dengan saq araq lẽq derike takjub gati dengah pengajahan-Ne,

²⁹ sẽngaq Ie ngajah ie pade siq wibawe, ndẽq maraq ahli-ahli Taurat ie pade.

Matius

Video Matius 7

Ikuti Kami:

KONTAK | PARTISIPASI | DONASI