Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Mangngajahhimi Puang Isa nakua, "Danggi' mipasala padammi rupa tau, anna danggi' napasala kamu' Puang Allataala.

² Nasaba' ia to minii mpasala tau, ia toda la napasalan kamu' Puang Allataala. Ia to pesuka' misukatan tau, la napake too Puang Allataala ssuka' kamu'.

³ Ciapari mikitai to bulicak lan matanna padammi rupa tau, na kaju sangbatang lan matammi te'da misa'dingngi.

⁴ Umbo la mikua mangkada lako padammi rupa tau, 'Ake'mo na aku' nnalaii tuu bulicak lan mai matammu' nasitonganna den kaju sangbatang lan matammu.

⁵ Ee, tomajekkong! Alaii jolo' to kaju sangbatang lan matammi! Ianna macoramo pengkitanmi, mane'ra kamu' wa'ding nnalaii to bulicak lan mai matanna padammi rupa tau.

⁶ Danggi' mupangben apa mala'bih lako asu, nasaba' la messailei ngkengkeko, na danggi' mupangben mutiaramu lako bai, nasaba' la naleseri."

⁷ Mangngajahhimi Puang Isa nakua, "Peta'dai lako Puang Allataala to miparalluinna, ammidiben. Angahhi to miparalluinna, ammiampa'i. Peta'dai ammidiben, susi to tomangdedek la ditimbakan bola.

⁸ Nasaba' ia to tometa'da lako Puang Allataala la dibenni, na ia to tonnangahhi la naampa'i, na ia to tomangdedek la ditimbakanni bola.

⁹ Te'da tau mben batu anakkana, ke meta'dai nande,

¹⁰ ba'tu nabenni ulah, ke meta'dai bale.

¹¹ Jaji, moi mitogaja', la miissen mbenni to melona lako anakkami, apa pole'raka to Ambe'mi Puang Allataala jao suruga la mben kamu' to miparalluinna, ke meta'da kamu'.

¹² Pugaukki lako padammi rupa tau, to apa mikadoangngi napugauk tau lako kalemi. Nasaba' iamo joo to dipangpangngajaran lan sura'na Nabi Musa sola sura'na nabi laen."

¹³ Mangngajahhimi Puang Isa nakua, "Nnola tama kamu' babangan si'pi', nasaba' maluah to babangan na maluah too to lalan diola lako naraka na buda tau nnolai.

¹⁴ Apa gaja si'pi' to babangan na si'pi' too to lalan diola lako katuoan melo te'da cappa'na, na ci'di'ra tau to nnampa'i."

¹⁵ Mangpakainga'mi Puang Isa nakua, "Majaga melo kamu' lako nabi tangtongan, to mentama tangnga-tangngami mangmalamma-lamma susi bembala', apa sitonganna susi asu lampung penawanna.

¹⁶ Jio mai panggaukanna la minii nnissen tonganni kumua indara ia. Duri kamban te'da namembua anggoro', na pangngala duri te'da namembua ara.

¹⁷ Ia to kaju melo, melo toda buanna. Apa ia to kaju gaja', tangmelo toda buanna.

¹⁸ Te'da nakullei to kaju melo la gaja' buanna, ba'tu kaju gaja' la melo buanna.

¹⁹ Ia to kaju gaja' buanna, la dita'bangngi ngasan, nadisumpun.

²⁰ Jaji, ia to nabi tangtongan la miissen jio mai panggaukanna."

²¹ Mangngajahhimi Puang Isa nakua, "Te'da na ia ngasan to tau to metamba-tamba lako kale-Ku' nakua, 'Oo Puang! Oo Puang!' to la menjaji umma'-Na Puang Allataala. Apa iara to tau mpugauk pakkaeloran-Na Ambe'-Ku' jao suruga, la menjaji umma'-Na.

²² Ia ke Kiama'mi lino, buda tau la mangkada lako kale-Ku' kumua, 'Oo, Puang! Ia tongkipangpeissenan Kareba Kasalamatan ba'tu nnula'ikan setang sola mpugauk buda tanda mejangngaran, sangan-Ta' kipau.'

²³ Apa la kukuan pissenri, 'Ee togaja', palai kamu' ntee! Tangngia kamu' taung-Ku'!'"

²⁴ Mangngajahhimi Puang Isa nakua, "Iamo joo, ia to tompesa'dingngii tee kadang-Ku', napugaukki, iamo dipasusi tomandalan tangngah to mpake'deh bolana jao pondasi batu.

²⁵ Ianna uran rambak nasaba' to wai, namangngiri' to angin bara' ssiokki joo bola, te'da naro'pok, nasaba' dipake'dehhi jao pondasi batu.

²⁶ Apa ia to tossa'ding kadang-Ku', na te'da napugaukki, iamo dipasusi tobango' mpake'deh bolana jao bungin.

²⁷ Ianna uran rambakmo nasaba' to wai, namangngiri' to angin bara' ssiokki joo bola, ta'pa ro'pokmi."

²⁸ Ia tonna mangka ngasanmo napangpangngajaran Puang Isa joo, sijangngaranmi to tobuda ssa'ding pangngajaran-Na,

²⁹ nasaba' matongko ke mangngajahhii, te'da nasusi guru agama.

Matius

Video Matius 7

Ikuti Kami:

KONTAK | PARTISIPASI | DONASI