Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 "Aleg ngesala' nelun baken, pad muyuh pana' na uen ngesala' teh.
2 Ngaceku Allah ngukum nemuyuh mepad kudeng muyuh pana' ngedat nelun baken. Idi dengan uad luk muyuh nguad kuan lun baken, kudeng ineh teh Allah nguad kuan muyuh.
3 Ngudehké iko nier mumuk kayuh luk bang mateh kinanakmu ineh, iamo' na kali'mu batang luk bang matehmu sebuleng?
4 Ngudehké iko mekuu' pebala nan kinanakmu, 'Nima' negku ngeruat mumuk kayuh rat bang matehmu,' iamo' inan batang bang matehmu sebuleng?
5 O lun luk siayu, ngeruat batang rat bang matehmu sebuleng atun; idi muci iko miak nier dengan megala' pad miak ngeruat mumuk kayuh rat bang mateh kinanakmu ineh.
6 "Aleg maré luk meligan kuan uko'-uko', idi aleg mepet bau mutiara muyuh pa kiung barek, pad ideh na ngeradu' neneh pa liang kukuddeh, idi lemubed amé' musing nemuyuh.
7 "Do' mutuh, idi miak barén nemuyuh; do' nakap, idi muyuh miak ngalap; nateg tanga', idi tanga' ineh miak kabin kuan muyuh.
8 Ngaceku anid-anid lemulun luk mutuh miak ngalap; idi lemulun luk nakap miak kali', idi kuan lemulun luk nateg, tanga' miak kabin kuanneh.
9 Taman sapehké rat arang muyuh, kudeng anakneh mutuh ruti, ieh maré batu kuanneh?
10 Idi kudeng ieh mutuh lawid, ieh maré menipeh?
11 Ngaceku ineh kudeng muyuh luk dat, kali' teh maré luk do' kuan anak-anak muyuh, meluun teh Taman muyuh luk bang surga sikal maré luk do' kuan lemulun luk mutuh Neneh?
12 "Anun-anun luk pian muyuh ruen lun baken kuan muyuh, kudeng ineh teh, do' muyuh nganau' kuandeh; ngaceku ini ilung Ukum Musa idi bada' nabi-nabi.
13 "Do' muyuh semuet maya' tanga' luk meperi'; ngaceku rayeh tanga' idi rayeh pipang dalan luk nguit amé' bang luk ngaté, idi mula' lemulun luk semuet bang ineh.
14 Ngaceku meperi' tanga', idi isuut pipang dalan, luk nguit amé' bang ulun, idi pawa' lemulun luk semuet bang ineh.
15 "Do' muyuh matar do'-do' ratnan nabi luk mebalih luk amé nemuyuh, dengan ngayung ku buluh dumba, iamo' bang niatdeh mepad kudeng bungalé luk mesangit.
16 Ratnan bua' kekamendeh muyuh miak ngiti nedeh. Lemulun na miak mureg bua' anggur ratnan lawa tabpa', idi mureg bua' gita' ratnan bitarung.
17 Kudeng ineh teh lawa kayuh luk do' ngeruat bua' luk do'; iamo' lawa kayuh luk dat ngeruat bua' luk dat.
18 Na miak lawa kayuh luk do' ngeruat bua' luk dat, idi lawa kayuh luk dat ngeruat bua' luk do'.
19 Lawa kayuh luk na ngeruat bua' luk do' ineh miak tebangen idi talan bang apui.
20 Ngaceku ratnan bua'-bua'deh muyuh miak ngiti nabi luk mebalih ineh.
21 "Baken anid-anid lemulun luk pebala Negku, 'Tuhan, Tuhan,' miak semuet bang Imet surga; iamo' lemulun luk maya' pian TamanKu luk bang surga.
22 Kareb aco ineh mula' lemulun sikal pebala Negku, keburi'deh, 'Tuhan, Tuhan, kai nemada' bang ngadanMu, idi bang ngadanMu kai nenala' ada', idi bang ngadanMu kai nenganau' kekamen luk rayeh.'
23 Idi kareb ineh Ui pebala nedeh, 'Na tu Ui miti nemuyuh. Buro muyuh rat Negku, O muyuh luk nganau' luk dat.'
24 "Ngaceku ineh anid-anid lemulun luk ninger balaKu ini, idi maya' ineh, ieh mepad kudeng lun mileh luk nemudut ruma'neh luun batu.
25 Idi netemurun udah luk mula', idi abpa' netemubu', idi barui luk metueh nengeduyung ruma' ineh; idi na ieh neluka', ngaceku dirineh inau' luun batu.
26 "Anid-anid lemulun luk ninger balaKu ini, idi na sikal maya' ineh, ieh mepad kudeng lun mebacé luk nemudut ruma'neh luun bada.
27 Idi netemurun udan luk mula', idi abpa' netemubu', idi barui luk metueh nengeduyung ruma' ineh, idi petacu ieh neluka'; idi luka'neh pelaba bura'."
28 Idi pangeh Yésus nemada' bala ini, idi lun mula' mawa ku bada'Neh ineh.
29 Ieh nemada' nedeh mepad kudeng lemulun luk inan lalud, baken tu-tu ratnan guru-guru Ukum.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA