Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ "Ba’na ja’ ahakime oreng laen, sopaja ba’na dibi’ ta’ ehakime bi’ Allah.

² Sabab ba’na bakal ehakimana Allah akantha ba’na se ahakime oreng laen. Ban okoran se eangguy ba’na ka oreng laen, bakal egabaya okoran ka ba’na keya bi’ Allah.

³ Arapa ba’na me’ ngabas ka kaju satembil se badha e matana oreng laen, tape balo’ se badha e matana ba’na dibi’ me’ ta’ epekkere?

⁴ Baramma ba’na me’ bisa ngoca’ ka taretanna, ‘Mara bi’ sengko’ kaju se satembil jareya epakalowarragiya dhari matana,’ mon e matana ba’na dibi’ badha balo’na?

⁵ He, monafik! Pakalowar gallu balo’ dhari matana ba’na dibi’, saellana jareya buru ba’na terrang pangabassa, ban bisa makalowar kaju se satembil dhari matana taretanna.

⁶ Ja’ magi barang se socce ka pate’, sabab pate’ jareya tanto pas abalik nyerrang ba’na. Ban ja’ magi motteyara ka babi, sabab motteyara jareya tanto enyek-enyek bi’ babi jareya."

⁷ "Mara menta, ba’na tanto narema. Mara sare, ba’na tanto nemmo. Mara thokthok, tanto ba’na ebukka’e labang.

⁸ Sabab oreng se menta bakal narema’a: oreng se nyare bakal nemmowa; ban oreng se athokthok bakal ebukka’ana labang.

⁹ E antarana ba’na ba’ badha’a eppa’ se aberri’ bato ka ana’na mon ana’na jareya menta roti?

¹⁰ Otabana se aberri’ olar mon ana’na jareya menta juko’?

¹¹ Sanajjan ba’na jahat, ba’na tao keya aberri’ se becce’ ka na’-ana’na. Apa pole Ramana ba’na e sowarga! Salerana bi-lebbi tanto apareng se becce’ ka oreng se menta.

¹² Daddi parlakowagi oreng laen akantha parlakowan ekaterro ba’na dhari oreng laen. Jareya essena hokomma Mosa ban pangajaranna bi-nabbi."

¹³ "Mon maso’a, lebat e labang se cope’, sabab labang ban jalan ka naraka reya raja ban lebar, ban bannya’ oreng se lebat e jadhiya.

¹⁴ Sabaligga labang ban jalan se ngeba oreng ka odhi’ reya cope’ ban malarat elebadi. Daddi sakone’ oreng se nemmo labang ban lorong jareya."

¹⁵ "Pate-ngate ngadhebbi bi-nabbi palsu. Reng-oreng jareya dhateng ka ba’na aropa dumba, tape sanyatana reng-oreng jareya pate’ alas se galak.

¹⁶ Ba’na bakal taowa sapa reng-oreng jareya dhari hasella lalakonna. Alas se adhuri ta’ kera abuwa anggur, ban ombut se adhuri ta’ kera ngasellagi buwana ara.

¹⁷ Kajuwan se bagus ngasellagi buwa se becce’, ban kajuwan se ta’ bagus ngasellagi buwa se juba’.

¹⁸ Kajuwan se bagus ta’ kera ngasellagi buwa se juba’, ban kajuwan se ta’ bagus ta’ kera ngasellagi buwa se becce’.

¹⁹ Saneyap kajuwan se ta’ ngasellagi buwa se becce’ tanto epoger pas eobbar.

²⁰ Bariya keya bi-nabbi se palsu. Ba’na tanto tao sapa reng-oreng jareya dhari hasella lalakonna."

²¹ "Ta’ sakabbiyanna oreng se ngolok Sengko’, ‘Guste, Guste,’ daddiya anggotana ommadda Allah, tape pera’ reng-oreng se ajalannagi kasokanna Tang Rama se e sowarga.

²² E Are Keyamat bannya’ oreng se ngoca’a kantha reya ka Sengko’, ‘Guste, Guste, gu ta’ kalaban asmana Junandalem abdidalem ampon manapa’ dhabuna Allah? Jugan gu ta’ kalaban asmana Junandalem abdidalem ampon ngojuk roh-erroh jahat sareng mabadha kaajiban sabannya’na?’

²³ Tape Sengko’ nyaoda, ‘Sengko’ ta’ tao kennal ka ba’na! Kassa’ ondur dhari dhinna’, ba’na se alako jahat!’"

²⁴ "Daddi, oreng se ngedhing Tang oca’ reya, sarta atoro’ ka oca’ jareya, padha ban oreng penter se maddek bengko e attassa bato.

²⁵ Teppa’na toron ojan, ban banjir sarta angen tandhes nambu bengko jareya, bengko jareya ta’ robbu sabab la epaddek e attassa dhasar bato.

²⁶ Ban oreng se ngedhing Tang oca’ reya, tape ta’ atoro’ ka oca’ jareya, padha ban oreng budhu se maddek bengkona e attassa beddhi.

²⁷ Teppa’na toron ojan, ban aeng banjir sarta angen tandhes nambu bengko jareya, bengko jareya robbu. Ban karosaganna ce’ berra’na!"

²⁸ Dhi-budhina Isa mare se morok, ban reng-oreng se badha e jadhiya ce’ heranna ngedhing pangajaranna jareya.

²⁹ Sabab se morok katon kobasa, ta’ akantha ru-guru agama laenna.

Matius

Video Matius 7

Ikuti Kami:

KONTAK | PARTISIPASI | DONASI