Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ "Niosi-singina! Nako 'o 'agama ma mau-mau niadiai 'uwa niosidumutika. Sababu nako niosidumutika, nia Dea daku 'o sorogaaka kowiniparasengiwa.

² Ge'enau so nako yosusa-susa niakiriwo, 'uwa niosidumutika 'isoka gee yoma'uca-'uca. 'Ona yoduaka 'o lo-lomu ma woa-woaka de 'o tapakioka la bari 'o nyawa yakisiarene. Niosi-singina! 'Ona ge'ena yamakekau manga parasengi, ge'ena la 'o nyawa yakisiarene.

³ Ma nako nia sadakaa niokula, ge'ena kanimasiriidino la 'o nyawa 'uwa yanako.

⁴ Madaka la nia sadakaa niokula ge'ena duga ka ma Jo'oungu ma Dutu wanako. 'Una 'asa winiparasengi gee winimake kanimasiriidino."

⁵ "Nako niomalahidoa, ge'ena 'uwa 'isoka gee 'o nyawa yoma'uca-'uca la salingou ka 'o lo-lomu ma woaka yaika, bolo 'o ngekomo ma ridabioka la 'o kawasa yakimake. Niongano-nganono! Ge'enau to 'ona manga parasengi yamakekau ge'ena la 'o nyawa yakisiarene.

⁶ Duga nako la nimalahidoa, ge'ena nimasidebenoka nia kamarioka la nia Dea gee 'o nyawa kowimake-makewa wamake koge'ena de winiparasengi.

⁷ Nako niolahidoa ge'ena ma betongo 'uwa kage'ena niogi-gilio 'isoka 'o nyawa gee ma Jo'oungu ma Dutu kowinako-nakowa. 'Ona yongose nako manga lahidoa ma betongo 'ikudai de 'ito-to'ingoka ge'ena dua ma Jo'oungu ma Dutu wadawongo.

⁸ 'Uwa 'isoka 'ona, sababu nia Dea wanakokau 'ania paraluu koniolahidoawasi 'ena.

⁹ So niolahidoa konee: 'Mia 'Aba 'o sorogaaka! Tanu ngomi 'o nyawa mioodumu 'ani ronga miositedene.

¹⁰ Tanu ngona noparetau 'o duniaka, de tanu 'ani mau miamoteke ne'enaka 'isoka 'o sorogaaka.

¹¹ Tanu nokula mia 'inomo gee mioparaluu ne'ena ma wange.

¹² 'Uwa nosi-singina mia sowono 'isoka ngomioli komiosi-singinawau 'o nyawa manga sowono.

¹³ De 'uwa minisimadaka mitaili, ma minisipidili 'o dorouoka. [Ngona ge'ena ma Koana, nopa-pareta, minisitedene kaisi'ado-'adonika. 'Amin. Koge'enau.]'

¹⁴ Sababu nako konimadonoakuwa 'o nyawa yosowono nginika, nia Dea 'o sorogaaka mita kowosi-singinawau to ngini nia sowono.

¹⁵ Ma nako ngini nia singinaka nimadonoaku 'o nyawa manga sowono, ge'ena dua nia Dea 'o sorogaaka mita kowinisipidiluwa to ngini nia sowono."

¹⁶ "Nako niopuasa, ge'ena 'uwa nia biono kailamahaninou 'isoka 'o nyawa gee yoma'uca-'uca la manga biono ma yangalioka, yakarana 'o nyawa yakinako 'ato 'ona yopuasaka la yakisiarene. Niongano-nganono! Ge'enau to 'ona manga parasengi yamakekau.

¹⁷ Ma nako ngini niopuasaka, ge'ena nimama-marauka de nimausika.

¹⁸ La 'o nyawa 'uwa yanako 'ato niopuasaka, duga ka nia Dea gee 'o nyawa kowimake-makewa 'una 'asa winiparasengi gee wamake kaniosigi'iunino."

¹⁹ "'Uwa nimadolomu 'o harataa 'o duniaka, dua kayabo-boruoka de kaimookoka, de yotosi-tosiki yoboa yatosioka.

²⁰ Duga nimadolomu 'o harataa 'o sorogaaka gee koyabo-boruwau de koimookuawau, de yotosi-tosiki koyatosikuawau.

²¹ Sababu kiaka naga nia harataa, nia singina mita ge'enaka."

²² "Nanga ako ge'ena kaimatero de nanga roese ma silo. Nako nia ako 'idoto ge'ena dua nimasimake 'itiai 'okia sonaa niodi-diaioka. Ma nako nia ako koidodonuwa ge'ena ngini dua 'isoka 'o darusoka. So nako nia silo koiletonguwa, ge'ena dua posironga 'itarusoka."

²³ (6:22)

²⁴ "Komoiwa yomanarama manga balusu yamididioka; sababu dua wimoika 'ifoloi widora de gee wimoikali, bolo dua wimoika 'ifoloi wisingounu de gee wimoikali. Koge'enali mita ngini. Ngini koidadiwa niamanarama to ma Jo'oungu ma Dutu 'awi mau, ma de nio'ahu kanimadolomu 'o duniaka ma harataa.

²⁵ Sababu ge'ena niosi-singina! 'Uwa niododato ma ngale nia 'ahu, ge'ena la 'okia dua nia'odomo de nia'okere de nimasinoa. Ma gou-goungu 'o 'ahu 'ifoloi 'ibaraguna de 'o 'inomo, de nia roese 'ifoloi 'ibaraguna de 'o pakeangi.

²⁶ Nialega 'o namoro 'o diwangika, 'ena koimadutudukuwa de koimadugutukuwa, de mita koimada-daotuwa ma rawongino, ma ma Jo'oungu ma Dutu watowo! De nginioli? ngini de 'o namoro ge'ena nginiosi 'ifoloi niobaraguna?

²⁷ Nago'ona nginioka ne'ena yodo-dodato so manga 'umuru 'iganapu ngaro ka ma eta ma?

²⁸ 'Ido'oa so niododato ma ngale nia pakeangi? Nialega 'o bunga-bunga 'igo'oode 'o godoaka, 'ena koimanaramuwa de ma baju koimaditiaiwa;

²⁹ ma ma Koana 'o Salomo wikorago koge'ena, ma koma'iwa womapakeangi ma sure 'isoka 'o bunga-bunga ge'ena.

³⁰ 'O 'ubutu 'o godoaka ne'ena ma wange 'igo'oode de bibinoka yatuuku yabootokau. Ma ma Jo'oungu ma Dutu wadiai koge'ena ma sure. De nginioli! Ma ngini koniongakuwa rekeni!

³¹ 'Uwa niododato de 'uwa niongose 'ato 'okia dua pa'odomo de pa'okere, de 'okia dua pomasinoa?

³² Koge'ena dau ge'ena, 'o nyawa gee ma Jo'oungu ma Dutu kowinako-nakowa kaitaurika yanonu. Momongo 'ania Dea daku 'o sorogaaka wanakokau ngini nioparaluu 'iodumu ge'ena.

³³ So niosisira-sira to ma Jo'oungu ma Dutu 'awi pareta la nia 'ahu wapareta. De dua nia paraluu 'iodumu 'asa winikula.

³⁴ Sababu ge'ena 'uwa niododato ma ngale bibinie, sababu bibinie ge'ena de ma 'enali to 'ena ma susa. Ne'ena ma wange yaowakau to 'ena ma susa, so 'uwau niadogo."

Matius

Video Matius 6

Ikuti Kami:

KONTAK | PARTISIPASI | DONASI