Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Wali yako etu i Yesu manganto’o wo’u, “Pakatao kojo naka ne’e komi mangika palaong to matao ojo damampapokitaka tau boros. Apa ane ewa wetu nuika ngkomi, komi taa damangarata ntanapa mpalaong to matao etu, ntanapa to yako resi Pa’a ngkomi to ndate saruga.
2 “Wali see naka ane komi mangansawang tau to masiasi, ne’e rapakarebaka resi tau boros. Ne’e mangika ewa naika ntau to ojo gombonya manoto. Tau etu ane mangika palaong to matao ri raya banua to napampotunde nto Yahudi, bara ri jaya, sira manganto’oka sa’e mangantawuis tarompet see tau boros damangansani palaong to matao naika nsira panewa tau boros etu damangabarong sira. Wali Aku manganto’oka komi, monso pu’u tau to ewa wetu nabarong nto lino pei ojo etu semo ntanapa to si sira. Tamo re’e ntanapanya to yusa to darawaika resi sira.
3 Pei ane komi mangansawang tau to masiasi, ne’e ragagangika sa’e. Palaong to ewa wetu maya raporapaka ewa pale to tondo ngkii taa nansani palaong to matao to naika mpale to tondo ngkana.
4 Wali sawang tau to masiasi see sa’e taa mangansani palaong to matao to nuika ngkomi. Pei nempo taa nakita nsa’e, pei re’e to mangkita palaong ngkomi etu. Etu semo Pa’a ngkomi to ndate saruga. Wali Ia semo damangawaika komi ntanapa ri tango ntau boros.”
5 Roo see i Yesu manganto’o, “Wali tempo komi makai-kai resi i Pue Allah ne’e seja mangika ewa naika ntau to ojo gombonya manoto. Apa sira masanang makore makai-kai nja’u banua to napampotunde nto Yahudi pasi nja’u panganjaya see danakita ntau boros. Wali Aku manganto’oka komi, monso pu’u sira danakita ntau boros pei ojo etu semo ntanapa nsira. Tamo re’e ntanapanya to yusa to darawaika resi sira.
6 Pei ane komi makai-kai, inta njo’u songimu samba’a pei samba’a pei ba’a wombonya panewa roo see pokai-kai resi Pa’a ngkomi. Ika ewa wetu see sa’e taa mangkita. Pei nempo taa nakita nsa’e, pei re’e to mangkita palaong ngkomi etu. Etu semo Pa’a ngkomi to ndate saruga semo. Ia taa maya rakita, pei Ia mangkita komi. Wali Ia semo damangawaika komi ntanapa ri tango ntau boros.
7 Pasi tempo komi makaikai, ne’e katele-tele masae kojo manganto’o gombo to tare batuanginya ewa naika ntau to taa mangansani i Pue Allah. Naka pei sira mangika ewa wetu apa sira mampobuuka pokai-kainya etu nadonge i mPue Allah ane marade kojo.
8 Wali ne’e komi mawali ewa tau to ewa wetu, apa re’e katawanya komi mamporapika bara kesaa yako resi Pa’amu, Ia nansanimo yami anu to parluu ngkomi.
9 Wali tempo komi makai-kai, ewa si’i raika. To’o, ‘Pue Allah, Pa’a mami to ndate saruga, masipato kami to lino mampakabae Komi.
10 Biakamo Komi mawali Makole nto lino. Pasi biakamo pamporani ngKomi semo to mawali ri lino si’i sewaju ewa to mawali ndate saruga.
11 Kami marapi resi Komi, waika resi kami pangkoni to gana seo si’i.
12 Pasi lapa sala mami sewaju ewa naika mami mangalapa sala nsa’e.
13 Pasi kami marapi seja see Komi mangansawang kami ane mangarata soba, pasi lapa kami yako resi ia to pu’u nsamparia anu to maja’a. (Kami mamporapika ewa wetu apa Komi semo to masipato mawali Makole pasi to re’e kuasa pasi to masipato rabarong rataka ri singkasaenya. Amin. ) Wali ewa wetu semo raika makai-kai.
14 Apa ane komi mangalapa sala nsa’e, ane ewa see Pa’a ngkomi to ndate saruga damangalapa seja sala ngkomi.
15 Pei ane komi taa mangalapa sala nsa’e, Pa’amu taa seja damangalapa sala ngkomi.”
16 Wali yako etu i Yesu manganto’o wo’u, “Ane komi mangorop mangalulu ada nu agama, ne’e maromong ewa naika ntau to ojo gombonya manoto to rani nabarong nsa’e. Apa sira mangawali yau ta’a nu lionya see sa’e mangansani sira re’e tongo mpangorop. Wali Aku manganto’oka komi, monso pu’u sa’e damangansani sira mangorop, pei ojo etu semo ntanapa to si sira. Tamo re’e ntanapanya to yusa to darawaika resi sira.
17 Pei ane komi mangorop, selaga wayuamu pasi pando’u ewa biasa raika
18 see taa miyala resi sa’e komi re’e mangorop. Pei nempo taa nakita nsa’e, pei re’e to mangkita palaong ngkomi etu. Etu semo Pa’a ngkomi to ndate Saruga. Ia taa maya rakita, pei Ia mangkita komi. Wali Ia semo to mangansani komi mangorop. Wali Ia semo damangawaika komi ntanapa ri tango ntau boros.”
19 Wali i Yesu manganto’o wo’u, to’oNya, “Ne’e komi mamporomung kasugi to komi mangarata ri lino si’i. Apa kasugi to etu maya nakoni yau ane bara katiisi yau. Pasi kasugi to etu maya naoko yau nto palima to masua ri raya banuamu.
20 Pei to tao-tao komi mamporomung kasugi ngkomi ndate saruga. Apa ndate ria tare ane bara katiisi pasi taa seja re’e to palima to masua damangoko yau kasugimu etu.
21 Wali ika palaong to bae batuanginya see re’e kasugi ngkomi ndate saruga. Apa imbare kasugimu, etu semo to napobuu-buuka ngkomi.
22 “Wali ne’e ojo kasugi ri lino to nupobuuka ngkomi. Apa ane ojo kasugi ri lino to komi sangkani mampobuuka, ane ewa see komi tamo mampobuuka pamporani i mPue Allah, see naka i Pue Allah taa maya mampakanasaka raya ngkomi mangkonong pamporaniNya etu. Wali ane ewa see, raya ngkomi raporapaka ewa tampa to mawuri apa tare pansona. Wali komi ewa tau to maroo ri raya ngkawuri, pasi kawuri etu mawuri kiji! Komi ewa tau to maja’a matanya, to taa maya mangkita bara kesaa. Pei ane komi sangkani mampobuuka mangkonong pamporani i mPue Allah, ane ewa see Ia maya mampakanansaka raya ngkomi mangkonong pamporaniNya etu. Wali tempo i Pue Allah mampakanasaka raya ngkomi pamporaniNya etu, palaong etu raporapaka ewa pansona to mampakareme tampa to mawuri. Wali ane ewa see, komi ewa tau to matao matanya see naka mayoas mangkita reme mpansona etu. Wali komi maroo ri raya ngkareme.
23 (6:22)
24 “Wali si’i wo’u rapa mangkonong kasugi. Wali ane rapanya watua, ia taa maya dua tau puenya. Apa ane ia dua tau puenya, ia maja’a nakita samba’a pasi mamporayang samba’a. Ia manga’angga samba’a pasi mangkaengas samba’a. Wali ewa see seja komi. Komi taa maya mawali to papolaong i mPue Allah pasi to papolaong ngkasugi apa ane mamporayang kasugi, komi taa mamporayang i Pue Allah.”
25 Wali yako etu i Yesu manganto’o wo’u, to’oNya, “Wali si’a kasugi ngkomi ri lino si’i to bae batuanginya resi i Pue Allah. See naka Aku manganto’oka komi ne’e mampomoruka doi to danupake ngkomi damangarata anu to danupake. Ne’e mampobuu-buuka, ‘Bara yako imbare darapangarata pangkoningku pasi anu to dakuinu?’ Pasi ne’e seja mampomoruka koro ngkomi, mampobuuka, ‘Bara yako imbare darapangarata pakengku?’ Wali ne’e mampomoruka anu etu apa katuwu semo to bae-bae batuanginya pei pangkoni, pasi koro semo to baebae batuanginya pei pake. Wali i Pue Allah semo to mangawaika komi katuwumu pasi koromu, wali taa manto’o Ia damangawaika seja komi pangkoni pasi pake.
26 Lo’a tonsi njo rao. Sira tare mamuya bara mamota. Pasi sira tare seja mangkalisoka pangkoninya ri raya ngkonda. Pei Pa’a ngkomi to ndate saruga, Ia semo to mampotungku sira. Wali taa manto’o komi pei taa danawaika i mPue Allah pangkoni apa komi semo to bae-bae batuanginya pei tonsi!
27 Wali tare batuanginya komi moru-moru rayamu. Apa kamoru ndaya taa kojo maya mangansawang komi see datidugang wo’u katuwu ngkomi nempo ojo samba’a jam kasaenya.
28 “Pasi maka pei komi morumoru rayamu mampobuuka pakemu? Pobuuka kaya to magaya sesenya to tuwu nja’u pada, apa kaya etu taa mapalaong ruyu see mangarata sesenya etu.
29 Pei Aku manganto’oka komi sakowa bue ngkita i Makole Salomo, to meyawa kojo tempo owi, ia taa seja re’e pakenya to gaya-gaya pei sese ngkaya etu.
30 Wali kaya etu taa bae kojo batuanginya apa nempo tuwu seo si’i, nile tamo re’e apa roomo rawetas yau pei ratunju yau. Pei nempo taa bae batuanginya, kaya etu tiroo nawaika i mPue Allah sesenya to raporapaka ewa pakenya. Wali ane kaya to taa bae batuanginya etu pei nawaika i mPue Allah pakenya, taa manto’o komi. Gete komi kodi kojo pangayamu apa komi taa mansarumaka i Pue Allah damangawaika komi anu to danupake!
31 Wali ne’e moru-moru sampe manganto’o, ‘Bara kesaa to dakukoni?’ pasi ‘Bara kesaa to dakuinu?’ pasi ‘Bara kesaa to dakupake?’
32 Apa etu semo to napobuuka ntau to taa mangansani i Pue Allah. Wali ne’e manganto’o ewa wetu. Apa Pa’a ngkomi to ndate saruga, Ia mangansani komi parluu samparia anu to etu.
33 Wali ne’e anu ri lino si’i to mawali bae kojo batuanginya resi komi. Pei to masipato mawali bae kojo batuanginya resi komi, etu semo mangabiaka i Pue Allah mawali Makole ngkomi, pei mangika anu to singkonong pei Ia. Apa ane ewa wetu nuika ngkomi, komi darawaika seja samparia anu to parluu ngkomi etu.
34 Wali see naka ne’e moru-moru raya ngkomi mampobuuka kasusa to damawali nile. Apa ane rata nile re’e wo’u kasusa to rapomoruka. Wali ponto eo gana kasusa, wali ne’e radugang wo’u mampobuuka kasusa to tawa rata.”
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA