Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ "Pade inget solah-solah, ndaq side ngelaksaneang ibadahde lẽq julun dengan siq maksut adẽq teserioq siq ie pade. Lamun side pade maraq nike, side pade ndẽq gen teican upaq siq Bapa side lẽq sorge.

² Jari, lamun side besedekah ojok dengan miskin, ndaq belẽq-belẽqang hal nike maraq saq tepiaq siq dengan munapik. Ie pade demen ngelaksaneang hal nike lẽq dalem balẽ ibadah dait lẽq rurung-rurung belẽq adẽqne teajum siq dengan. Pade inget, ie pade sampun nerimaq upaqne.

³ Laguq lamun side pade ngebẽng sedekah, bẽng secare tedoq-tedoq, adẽq ndẽq araq saq nenaoq.

⁴ Alurang perbuatande nike ndẽq tetaoq siq sai juaq, kecuali Bapa side saq lẽq sorge. Ie cingakin perbuatan side saq ndẽq teserioq siq dengan, dait gen ngicanin upaq tipaq side pade."

⁵ "Lamun side pade bedo'e, ndaq bedo'e maraq dengan munapik. Ie pade demen bedo'e nganjeng lẽq balẽ ibadah dait lẽq perempatan adẽqne teserioq siq dengan. Tiang badaq side, nike upaq saq sampun ie pade terimaq.

⁶ Laguq lamun side pade bedo'e, tame ojok kamar dait impet lawangne, terus bedo'e tipaq Bapa side saq ndẽq penggitan nike, make Bapa side saq cingakin perbuatande saq ndẽq tetaoq siq dengan gen ngicanin upaq lẽq side.

⁷ Lamun side pade bedo'e, ndaq bẽlo-bẽlo maraq dengan saq ndẽq kenal Allah. Ie pade paran bahwe napi saq ie pade tunas nike gen tepirengang lantaran do'e ie pade saq bẽlo nike.

⁸ Ndaq maraq ie pade. Bapa side sampun wikan napi saq side pade perluang, sendẽqman side pade tunas.

⁹ Jari, bedo'e maraq niki: 'Bapa tiang pade saq araq lẽq sorge, tesuciang pesẽngan Deside.

¹⁰ Rauhang Kerajaan Deside, jariang pekayunan Deside lẽq gumi maraq lẽq sorge.

¹¹ Lẽq jelo niki icanin tiang pade keloran saq tiang pade perluang.

¹² Ampunin tiang pade lẽman salaq tiang pade, maraq tiang pade sampun ngampunin dengan saq salaq tipaq tiang pade;

¹³ dait sampunang gadingang tiang pade ojok dalem cobe, laguq bẽbasang tiang pade lẽman kuase saq jahat. [Sẽngaq Deside ẽpẽn dowẽ Kerajaan dait kuase dait kemuliean jangke selaẽq-laẽqne. Amin.]'

¹⁴ Sẽngaq lamun side pade ngampunin dengan saq salaq lẽq side pade, make Bapa side lẽq sorge ẽndah gen ngampunin kesalaqande.

¹⁵ Laguq lamun side pade ndẽq ngampunin salaq dengan lain, Bapa side saq lẽq sorge ẽndah ndẽq gen ngampunin kesalaqande."

¹⁶ "Lamun side pade puase, ndaq petitoqang ruende saq susah, maraq dengan munapik. Ie pade salin sebengne adẽq selapuq dengan nenaoq bahwe ie pade puase. Pade inget, nike upaq saq ie pade sampun terimaq.

¹⁷ Laguq lamun side pade puase, beseraup dait sisir bulunde,

¹⁸ adẽq ndẽq araq saq nenaoq bahwe side pade puase, kecuali Bapa side saq ndẽq penggitan nike doang. Ie cingakin perbuatande saq ndẽq penggitan nike dait gen ngicanin upaq tipaq side pade."

¹⁹ "Ndaq ngumpulang harte umaq diriqde lẽq gumi; lẽq gumi temerẽnẽ dait karat gen nyenyẽdaq dait maling gen dateng paling harte nike.

²⁰ Laguq, kumpulang harte umaq diriqde lẽq sorge; lẽq sorge temerẽnẽ dait karat ndẽq gen nyenyẽdaq dait maling ndẽq dateng paling harte nike.

²¹ Sẽngaq lẽq mbẽ hartende araq, lẽq derike ẽndah angende!"

²² "Penenteng nike dilah lẽq awak. Lamun penentengde solah, selapuq awakde jari terang.

²³ Laguq lamun penentengde jahat, selapuq awakde jari peteng dedet. Jari lamun terang saq araq lẽq dalem diriqde nike peteng, berembẽ peteng dedetne peteng nike!"

²⁴ "Ndẽq araq sopoq dengan juaq saq bau begawẽan lẽq due majikan. Sẽngaq lamun maraq nike ie gen meriq lẽq saq sopoq dait ngasihin saq lain, atao ie gen setie lẽq saq sopoq dait ndẽq gen merhatiang saq lain. Maraq nike ẽndah halne side pade; side pade ndẽq bau begawẽan tipaq Allah dait tipaq dowẽ bande ẽndah.

²⁵ Keranaq nike Tiang badaq side pade: Ndaq side pade kuatir mengenai idupde, napi saq gen side pade kelor atao inem, atao napi saq gen side pade kadu. Tekan idup nike pentingan lẽman keloran dait awak pentingan lẽman kelambi?

²⁶ Pade serioq kedit lẽq langit. Ie pade ndẽq uwah sawur binẽq, ndẽq uwah mataq dait ndẽq uwah ẽndah ngumpulang hasil taletanne lẽq dalem lumbung, laguq Bapa side saq lẽq sorge peliharaq ie pade. Tekan side pade jaoq belẽqan ajine ketimbang kedit?

²⁷ Sai lẽq antare side pade siq kuatirne bau ngeromboq umurne timaqne sekediq?

²⁸ Kembẽq side pade kuatir mengenai kelambinde? Perhatiang berembẽ kembang bakung saq tiwoq lẽq lendang. Kembang-kembang nike ndẽq uwah begawẽan dait ndẽq uwah nyẽsẽk;

²⁹ laguq Tiang badaq side: Nabi Sulaiman timaq ie sugih gati, ndẽq ngengadu kelambi saq solahne maraq kembang-kembang nike!

³⁰ Pupaq lẽq lendang tiwoq jelo niki dait lẽmaq tesedut jangke bis. Laguq Allah payas pupaq nike solah gati. Lebih-lebih side pade! Laguq side pade kurang percaye!

³¹ Keranaq nike, ndaq side pade kuatir dait bebase, 'Napi saq gen ite kelor?' atao 'Napi saq gen ite inem?' atao 'Napi saq gen ite kadu?'

³² Selapuq nike teboyaq siq bangse-bangse saq ndẽq kenal kance Allah. Padahal napi saq side pade perluang lẽq dalem idupde, selapuqne nike sampun tewikanang siq Bapa side pade.

³³ Laguq boyaq juluq Kerajaan Allah dait kebenaranne, make selapuq saq lain ẽndah gen teromboqang tipaq side pade siq Allah.

³⁴ Keranaq nike, ndaq kuatir mengenai jelo saq lẽmaq. Sẽngaq jelo saq lẽmaq araq kesusahanne mẽsaq. Jari, kesusahan sejelo cukup jari sejelo."

Matius

Video Matius 6

Ikuti Kami:

KONTAK | PARTISIPASI | DONASI