Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ "Ingokdo, dang keti ngelakuko kewajiban agama di hadap umum in diliak ulun. Kik keti bebuat sebagai reno, keti mak haga dikeni upah ulih-Ni Bapamu di surga.

² Jadi, kik keti ngeni sedekah jama ulun mejerih, dang hak ngegembor-gemborko hal seno injuk sai dilakuko ulih ulun-ulun munafik. Tian risok ngelakuko ano di delom lamban ibadah rik di renglaya, in dipuji ulun. Ingokdo, tian radu nerima upahni.

³ Kidang keti, kik keti ngeni sedekah, kenikodo hema-hema, sehingga mak ngedok sai pandai.

⁴ Tagando perbuatanmu ano mak dipandai ulih sapa pun, kecuali Bapamu di surga. Ia ngeliak perbuatanmu sai tesegok ano rik haga ngeni upah jama niku."

⁵ "Kik keti bedua, dang hak injuk jelma-jelma sai gering icak-icak. Tian gering bedua sambil cecok di lamban ibadah rik di simpang renglaya in diliak ulun. Ingokdo, udido upah sai tian radu terima.

⁶ Kidang kik keti bedua, kurukdo delom kamar rik salokko rangok, raduni beduado jama Bapamu sai mak keliakan ano. Maka Bapamu sai ngeliak perbuatanmu sai tesegok haga ngeni upah jama niku.

⁷ Kik keti bedua, dang hak betele-tele sebagai jelma-jelma sai mak mengenal Tuhan. Tian nyangko bahwa kiluan tian haga didengi mani dua tian sai kejung udi.

⁸ Dang injuk tian. Bapamu radu pandai api sai keti perluko, semakkung keti ngilu.

⁹ Jadi beduado injuk reji, 'Bapa sekam di surga: Nikudo Allah sai Esa. Semoga Niku disumbah rik dihormati.

¹⁰ Nikudo Raja sekam. Semoga Niku memerintah di bumi rik kehaga-Mu ditaati injuk di surga.

¹¹ Keniko pada rani inji kanikan sai sekam perluko.

¹² Ampunido sekam jak kesalahan sekam, injuk sekam radu ngampuni jelma sai besalah jama sekam.

¹³ Dang naganko sekam kelebonan percaya waktu sekam dicubai kidang lepasko sekam jak kuasa si Jahat. [Niku Raja sai bekuasa rik mulia untuk selama-lamani. Amin.]'

¹⁴ Kik keti ngampuni jelma sai besalah jama niku, Bapamu di surga pun haga ngampuni kesalahanmu.

¹⁵ Kidang kik keti mak ngampuni kesalahan ulun bareh, Bapamu di surga juga mawat haga ngampuni kesalahanmu."

¹⁶ "Kik keti bepuasa, dang hak pudak muram injuk jelma sai gering icak-icak. Tian ngubah way pudakni in sunyinni ulun pandai bahwa tian bepuasa. Ingokdo, udido upah sai tian radu terima.

¹⁷ Kidang kik keti bepuasa, basuhdo pudakmu rik sualdo buokmu,

¹⁸ in mak ngedok sai pandai bahwa keti bepuasa, kecuali Bapamu sai mak keliakan udi gaoh. Ia ngeliak perbuatanmu sai tesegok ano rik haga ngeni upah jama niku."

¹⁹ "Dang hak ngumpulko harta untuk dirimu di dunia, di dipa anai-anai rik karat dapok nyadangkoni rik maling ratong malingni.

²⁰ Sebalikni, kumpulkodo harta di surga, di dipa anai-anai rik karat mak dapok nyadangkoni, rik maling mak ratong malingni.

²¹ Mani di dipa hartamu, di dudi juga hatimu!"

²² "Mata yakdo lampu untuk badan. Kik matamu jernih, sunyinni badanmu terang benderang.

²³ Kidang kik matamu kabor, sunyinni badanmu halom legam. Jadi kik lampu di delom dirimu ano kelam, hara kelam nihan udi!"

²⁴ "Mak sai jelma pun dapok beguai untuk rua majikan. Mani ia haga lebih mengasihi salah sai jak sai bareh. Atau ia haga lebih setia jama majikan salah sai jak jama sai bareh. Injuk reno juga jama keti. Keti mak dapok beguai untuk Allah rik untuk harta benda juga.

²⁵ Ulihni seno ingokdo; dang hak khuater tentang hurikmu, yakdo api sai haga keti kanik rik inum, atau api sai haga keti pakai. Bukankah hurik lebih jak kanikan, rik badan lebih jak kawai?

²⁶ Liakdo burung di udara. Tian mak nanom, mak ngegetas, rik mak juga ngumpulko hasil tanomanni delom lumbung. Meskipun injuk reno Bapamu sai di surga memelihara tian! Bukankah keti jaoh lebih berega jak burung?

²⁷ Sapa jak keti sai jama kekhuateranni dapok ngejungko umorni walaupun cutik?

²⁸ Mengapi keti khuater tentang kawaimu? Perhatiko kumbang-kumbang bakung sai tuoh di padang. Kumbang-kumbang udi mak beguai rik mak nenun;

²⁹ kidang Raja Salomo sai mebatin nihan pun, mak makai kawai sai sehelau kumbang-kumbang udi!

³⁰ Jukuk di padang tuoh rani inji juga rik jemoh disuah bela. Kidang Allah ngedandani jukuk ano helau nihan. Apilagi keti! Kidang keti kurang percaya!

³¹ Dang hak khuater rik cawa, 'Api sai haga ram kanik,' atau 'api sai haga ram inum', atau 'api sai haga ram pakai'?

³² Hal-hal ano selalu dibedak ulih jelma-jelma sai mak mengenal Allah. Padahal Bapamu sai di surga pandai bahwa keti memerluko sunyinni ano.

³³ Jadi, usahako pai in Allah memerintah atas hurikmu rik liakdo kehaga-Ni. Maka sunyinni sai bareh haga dikeniko Allah juga jama niku.

³⁴ Mani ulihni seno, dang khuater tentang rani jemoh. Mani jemoh wat lagi khuaterni tenggalan. Rani inji radu cukup kesusahanni, dang ditambah lagi."

Matius

Video Matius 6

Ikuti Kami:

KONTAK | PARTISIPASI | DONASI