Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ "Mafandendelek, fo boso makalala'ok agama hoholo-lalanen nai lea matan, fo hataholi la lita. Metema emi tao leondiak soona, neukose emi Amam manai nusa so'da ka, Ana ta fe emi ngga'di fa.

² Hu ndia de, metema emi tulu-fali hataholi nuu ta kala soona, boso tui kii-konak dede'ak ndia, sama leo hataholi mana dea-dale kala tatao-nono'in. Hataholi matak leo sila kala, ala hii tao leondiak nai uma mamaso kala dalek, ma lai okofoo la lain, fo ela hataholi la koa-kios. Tehu mafandendelek te, ala sipo basa ngga'di nala nde ndia so.

³ Tehu metema emi tulu-fali hataholi nuu ta kala soona, fe no denge-dengek fo daenga hataholi boso bubuluk.

⁴ Neme na fo emi tatao-nono'im ndia hataholi boso bubulu kana, fo ela ka'da emi Amam manai nusa so'da ka mesa kana nde bubuluk emi tatao-nono'i nafunim ndia, fo daenga Ana fe emi ngga'di nai nusa so'da ka."

⁵ "Metema emi hule-haladoi soona, boso sama leo hataholi mana dea-dale kala. Ala hii ka'da lapadeik leu uma mamaso kala dalek, ma leu leo eno kaba'e kala soona, besa ka ala hule haladoi. Ala tao leondiak fo sue ka nde hataholi la lita. Mafandendelek leona te, ala sipo basa sila ngga'di na nde ndia so.

⁶ Tehu metema emi hule-haladoi soona, meu leo kama dale meu, fo kena lelesu a neu, fo hule-haladoi neu emi Amam fo nananita tak ndia. Soona emi Amam fo manai nusa so'da ka, nita emi tatao-nono'i nafunim ndia, de neukose Ana fe emi ngga'di.

⁷ Metema ladenu emi hule-haladoi soona, boso makadedesik sama leo hataholi fo ta lalelak Lamatua ka fa. Nanahu hataholi matak leo sila kala, laedaenga Manetualain namanene sila huhule-haladoi manalu inan ndia,

⁸ Emi boso mete hataholi sila la. Nanahu emi beita hule-haladoi boen te emi Amam bubuluk basa hata fo emi paluun nai emi huhule-haladoim ndia dalek so.

⁹ Hu ndia de, metema emi hule-haladoi soona mae leo ia, 'Ou, Ami amam manai nusa so'da ka: O nde Manetualain fo Kisak Ela leo bee na. Lakaluku-lakatele ma ala fe ha'da-holomata neu O.

¹⁰ Ami mane ma nde O, Ela leo bee na, O paleta nai daebafa ka fo ela ala tao tunga O hihii-nanaum, sama leo nai nusa so'da ka.

¹¹ Fe ami nana'a-nininu mana daik nai faik ia dale na.

¹² Fe do'o do ampon neu ami sala-singo mala, sama leo, ami fe do'o do ampon neu basa hataholi fo mana tao salak neu ami a.

¹³ Matetea ami namahele ma, nai faik fo soso'ba-susu'di ka so'ba-su'di ami, tehu mapo'ik ami neme nitu mangalau ka koasa na mai. Nanahu O nde Manek mana koasa, ma mandela masa'ak, losa dodoo na. Amin.'

¹⁴ Makanaema emi fe do'o do ampon neu hataholi mana tao salak neu emi soona, neukose emi Amam manai nusa so'da ka boeo, Ana fe do'o do ampon neu emi sala-singo mala.

¹⁵ Tehu metema emi ta fe do'o do ampon neu hataholi fe'ek sala-singon fa soona, emi Amam manai nusa so'da ka boeo, neukose Ana ta fe do'o do ampon neu emi sala-singom boen."

¹⁶ "Metema emi oka ao mala soona, boso fe mata-panam bee male, sama leo hataholi mana dea-dale kala fo mata panan bedae, fo sue ka nde hataholi la litas soona, lae sila oka ao nala. Mafandendelek te, ala sipo la sila ngga'di na nde ndia so.

¹⁷ Tehu metema emi oka ao mala soona, malou oe, ma sau langa mala,

¹⁸ fo daenga hataholi la boso bubuluk emi oka ao mala, ta'da fe'e emi Amam fo nananita tak ndia mesa kana nita emi tatao-nono'im nananafunik ndia, fo neukose Ana fe emi ngga'di."

¹⁹ "Boso tunga sanga ka'da hata-heto daebafak, fo andae ma lulutu'ka hapu tao lalutus, ma nakodaa mai fo namanako ninis.

²⁰ Tehu tunga sanga ka'da hata-heto manai nusa so'da ka, fo andae ma lulutu ka ta hapu tao nalutu fas, boema nakodaa ta hapu namanako nini fas.

²¹ Nanahu, metema emi hata-hetom nai bee soona, emi dale ma boeo nai ndia!"

²² "Ita mata na, sama leo banuk esa neu ita ao paa na. Hu ndia de, metema emi mata ma neu ka soona, emi ao paa ma boeo nandela-nasa'a.

²³ Tehu metema emi mata ma keluha'bu ka soona, emi ao paa ma makiu-makahatuk. Da'di metema banuk manai emi ao paa ma dalek ndia, makahatuk soona, makahatuk ndia ba'u na seli!"

²⁴ "Ta hapu hataholi esa tao-no'i fe tuan dua la'iesa fa. Nanahu neukose ana sue-lai esa lenaheni esa ka. Boema neukose ana lilineka nahele tuan esa, tehu esa ka soona ta. Leondiak boe, ba'eneu emi. Emi ta hapu tao-no'i soaneu Manetualain, ma soaneu hata-heto daebafa ka fa.

²⁵ Hu ndia de, mafandendelek; fo boso bii neu emi so'da ma. Boso dodoo ka'da, hata fo emi mi'a-minu, do hata fo emi pake-nggao nai faik ia dale na. Ade ita so'dan ia, beli na ta lena heni nana'a-nininu ka, do ita ao paa na ta lena heni papake-ngganggao ka fa do?

²⁶ Mete su'dik manupui manai lalai la. Ala ta tao tina-osi, ala ta ketu-kolu, ma ha'de soka ta kala boe, tehu emi Amam manai nusa so'da ka bei nakaboboi naheles tunga faik! Ade emi beli ma ta ba'ulena manupui sila fa do?

²⁷ Emi see ka nde hu ka nde bibii-namata'u ka de ana hapu tao namanalu teu fain, leomae ka'da faa anak mesan boe?

²⁸ Tao le'e de emi bii soaneu emi papake-ngganggaom? Taoafik matalolole laisona se'ba ana moli nai mo ka. Ana ta tao hata esa boen, ma ana ta tenu-henge fa;

²⁹ tehu Mane Salomo fo tou kamasu'i ina ndia, bua lo'a papake na, lole na ta dai bunga sila la lole-napun fa!

³⁰ Na'u manai mo ka faik ia ana moli, tehu balahaa soona ala de'dehenin. Tehu Manetualain heheo-hihiluk na'u sila la, de lole nala seli. Muda hata neu emi bai! Hu ka nde emi namahehele ma, beita dai fa!

³¹ Hu ndia de boso bii, boema emi bee doo mae, 'Ita ta'a beek,' do 'ita tinu beek', do 'ita pake-nggao beek bai'?

³² Ka'da hataholi fo ta lalelak Manetualai na nde, usi basa dede'ak sila la. Te see ko na emi Amam manai nusa so'da ka, Ana bubuluk basa, emi paluu basa sila la.

³³ Hu ndia de, sanga makahuluk Manetualain hihii-nanaun, fo daenga Manetualain paleta emi so'da ma soona, neukose Manetualain fe basa hata lala'ena neu emi.

³⁴ Hu ndia de boso bii la'eneu fai bala ha. Nanahu fai kala esa-esak nok nininin. Faik ia susa na dai so, de boso boe tama selu kana bai."

Matius

Video Matius 6

Ikuti Kami:

KONTAK | PARTISIPASI | DONASI