Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Wali ojo karoonya Eo Rapandoo, kaeonya rao etu semo eo Minggu, wali i Maria to yako ri kampu Magadan pasi i Maria to yusa, sira yau damangalo’a dayo i Yesu.
2 Tempo sira yau etu kodi majoli re’e lengko tana to maroso kojo apa rata samba’a pomakau i mPue Allah yako ndate saruga rata nja’u dayo etu. Pomakau to etu mangawewoka yau watu ba’a nu dayo panewa ia matunda ri wawonya.
3 Pomakau etu ta’anya makilo kojo ewa bilak pasi pakenya buya kojo.
4 Wali tentara to mangajagai dayo, sira sakanjonjo panewa tamua apa meka kojo raya nsira.
5 Pei pomakau i mPue Allah manganto’oka tau we’a to owo rata etu, to’onya, “Ne’e meka, apa Aku kunsani komi dua ma’i mangalo’a i Yesu anu roomo rapaku ri kaju pasape.
6 Pei Ia tamo re’i rire apa Ia nambangu munimo yako ri kapateNya ewa to’oNya tempo ruyu. Wali mai lo’a wakanya Ia rapoduli.
7 Panewa intamo pakajoli pei to’oka anaguruNya Ia nambangu munimo yako ri kapateNya. Pasi to’oka sira Ia njo’umo mampatiruyu mangampago propinsi Galilea. Wali to’oka sira mangalulu Ia, panewa nja’u ria sira damangkita Ia. Ne’e rakalingan gombo to to’ongku si’i.”
8 Wali tau we’a etu mekameka raya nsira pasi sira seja ndende kojo rayanya. Sira mansaka mampiyaika dayo pei maripo yau damampakarebaka resi kami to anaguru i Yesu anu to nawali etu.
9 Tongo mpariponya etu, kodi majoli i Yesu ma’i mangantomu sira pei mangantabea sira. Wali sira dua yau mampago Ia pei mambokotu ri tangoNya. Sira mangangkongko witiNya apa manga’angga Ia. Pasi sira mampue mampakabae Ia.
10 Wali i Yesu manganto’oka sira dua, to’oNya, “Ne’e meka. Intamo pei to’oka pua’ingKu yau njo’u propinsi Galilea. Nja’u ria panewa sira damangkita Aku.”
11 Wali tempo tau we’a dua etu yau mangampago kami to anaguru i Yesu, tempo etu semo re’e sawei mba’a tau to nangajagang dayo i Yesu to yau njo’u kota. Sira yau mangansaritaka resi kepala-kepala nto pampue mangkonong samparia palaong to nawali tempo pomakau i mPue Allah rata ri dayo etu.
12 Wali kepala-kepala nto pampue etu sira siromu sindara-ndara pei tau tu’a nto Yahudi panewa sira mangika songka. Sira mangawaika resi to panjaga etu doi to bae,
13 panewa manganto’oka sira, “To’oka tau anaguru i Yesu yau ri raya mburi pei mampolima yau lembaNya tempo komi yore.
14 Pei ane bara nadonge i gubernur komi yore ri tempo mangajagang dayo etu, kami semo to damanganto’o noto ngkomi see komi taa damangarata huku.”
15 Wali to panjaga mangoko doi to nawaika ntau etu sira panewa yau mangika anu to rato’oka resi sira mangika. See naka rataka ri tempo si’i sarita to nato’o nto panjaga etu, etu semo sarita to tiroowa napakarebaka nto Yahudi.
16 Wali yako etu ratamo tau we’a dua etu resi kami to anaguru i Yesu to sampuyu pei samba’a. Sira mamporata resi kami patuu i Yesu. Wali see naka kami yau njo’u propinsi Galilea. Ojo karata mami nja’u ria kami yau njo’u tongku ewa room yami nato’oka i Yesu kami seore.
17 Rata nja’u ria kami mangkita i Yesu. Wali ojo pangkita mami etu, kami mampue mampakabae Ia. Pei re’e kami to tiroowa bata-bata raya mami.
18 Wali i Yesu ma’i ri awe mami pei manganto’o, “Samparia kuasa to re’e ri saruga pasi to re’e ri lino si’i roomo nakuasangika i mPue Allah Aku.
19 Wali apa saba kuasangKu etu, see naka Aku manganto’oka komi inta resi samparia tau ri sambawo lino pei pakarebaka resi sira kareba matao see sira damawali seja anagurungKu. Panewa baptis sira mangika tondong see nansani nsa’e sira i Pue Allah Pa’a puenya, pasi Ana i mPue Allah puenya, pasi i Nosa Mapasing seja puenya.
20 Pasi patundeka sira see sira damangika seja samparia anu to roomo kuporentangika resi komi. Pei ne’e nukalingan, Aku sangkani re’e resi komi rataka ri kapuranya temponya to si’i, pasi rataka ri singkasaenya.” Wali etu semo patuu i Yesu.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA